Tag: Palestine

မတ် ၁၉၊ ၂၀၁၆
M-Media

– ပြီးခဲ့သည့်နှစ်က ဂျူးအစွန်းရောက်များ၏ နေအိမ်မီးရှို့မှုကြောင့် မိသားစုတစ်ခုလုံးကို ဆုံးရှုံးခဲ့ရသည့် ပါလက်စတိုင်းကလေးငယ် အဟ်မဒ် ဒါဝဘ်ရှာ၏ ၎င်းအားတွေ့ချင်သည့် အိပ်မက်ကို ရီးယဲလ်တိုက်စစ်မှူး ခရစ္စတီယာနို ရော်နယ်ဒိုက ဖြည့်ဆည်းပေးခဲ့သည်ဟု သိရသည်။

မတ်လ ၁၇ ရက်နေ့က ရီးယဲလ်မက်ဒရစ်ကွင်းတွင် တွေ့ဆုံခဲ့ခြင်းဖြစ်ပြီး အသက် ၅ နှစ်အရွယ် အဟ်မဒ်မှာ ရော်နယ်ဒို၊ ဘေးလ်၊ မာဆယ်လို ဗီယာရာတို့နှင့် ဓာတ်ပုံအတူ တွဲရိုက်ခဲ့ကာ ၎င်းတို့၏ လက်မှတ်များထိုးထားပြီး အဟ်မဒ်၏ အမည်ရေးထိုးထားသည့် ရီးယဲလ်မက်ဒရစ် အင်္ကျီတစ်ထည်ကိုလည်း ရရှိခဲ့သည်။

ထိုသို့တွေ့ဆုံရန် ရီးယဲလ်မက်ဒရစ်အသင်းက မတ်လ ၅ ရက်နေ့တွင် ပါလက်စတိုင်းဘောလုံးအဖွဲ့ချုပ်ထံ အကြောင်းကြားခဲ့ခြင်းဖြစ်ပြီး ထိုကလေးငယ်အား မက်ဒရစ်သို့ ခေါ်ဆောင်လာရန် ဖိတ်ကြားခဲ့သည်။

“ဒီလိုဖိတ်ကြားမှုဟာ ရီးယဲလ်နဲ့ ရော်နယ်ဒိုတို့ဘက်က သဘောထားကြီးမှု လက္ခဏာပါပဲ။ ဒါပေမယ့် ဒီလည်ပတ်မှုမှာ ကူညီပေးခဲ့သူ သူရဲကောင်း ဇီနဒင်း ဇီဒိန်းကိုလည်း ကျေးဇူးတင်ကြောင်း ပြောပါရစေ။ ဒီလို လူသားချင်းစာနာထောက်ထားမှုဆိုင်ရာ ဆောင်ရွက်မှုက မိသားစုတစ်ခုလုံး ဆုံးရှုံးခဲ့ရတဲ့ ဒီကလေးကို အကူအညီဖြစ်စေလိမ့်မယ်လို့ ကျွန်တော်တို့ မျှော်လင့်ပါတယ်” ဟု ပါလက်စတုိုင်း ဘောလုံးအဖွဲ့ချုပ် အကြီးအကဲဖြစ်သူ ဂျီဘရီလ် ရာဂျွဘ်က ပြောကြားခဲ့သည်။

ပါလက်စတိုင်းပိုင် အနောက်ဖက်ကမ်း နဘ်လုစ်မြို့အနီး ဒူမားရွာရှိ အဟ်မဒ်လေး၏ မိသားစုနေအိမ်ကို အစ္စရေး၏ တရားမ၀င်အိမ်ယာများတွင် နေထိုင်သော ဂျူးအစွန်းရောက်များက ရေနံဆီဗုံးဖြင့် ပစ်ပေါက်ကာ မီးရှို့ခဲ့ခြင်းကြောင့် အဟ်မဒ်၏ မိဘနှစ်ပါးနှင့် အသက် ၁ နှစ်ခွဲအရွယ် ညီငယ်လေးမှာ မီးလောင်ဒဏ်ရာများကို အပြင်းအထန် ခံစားခဲ့ရကာ သေဆုံးခဲ့သည်။ အဟ်မဒ် ကိုယ်တိုင်မှာလည်း ခန္ဓာကိုယ်၏ ၉၀ ရာခိုင်နှုန်း မီးလောင်ဒဏ်ရာများ ရရှိခဲ့ပြီး ၈ လတိုင်တိုင် ဆေးကုသမှု ခံယူခဲ့ရသည်။

Ref: Middleeastmonitor

မတ် ၁၄၊ ၂၀၁၆
M-Media

– ဒုက္ခသည်ကလေးငယ်များကို ပညာသင်ကြားပေးနေသည့် ပါလက်စတိုင်း ကျောင်းဆရာမ ဟာနန် အလ် ဟာရွဘ်မှာ ကမ္ဘာလုံးဆိုင်ရာ ကျောင်းဆရာဆုကို ဆွတ်ခူးရရှိခဲ့သည်ဟု သိရသည်။

အဆိုပါဆုမှာ ထိပ်တန်းပညာရေးဆုတစ်ခုဖြစ်ပြီး ဒူဘိုင်း၌ပြုလုပ်ခဲ့သည့် ဆုပေးပွဲအခမ်းအနားတွင် ပုပ်ရဟန်းမင်းကြီးဖရန်စစ်ကိုယ်တိုင် ဗီဒီယိုမှတစ်ဆင့် ဆုရရှိသူကို ကြေငြာပေးခဲ့ခြင်းဖြစ်သည်။

အလ် ဟာရွဘ်မှာ ပါလက်စတိုင်းဒုက္ခသည်စခန်းတွင် ကြီးပြင်းခဲ့သူဖြစ်ပြီး ဒုက္ခသည်ကလေးများကို ပညာသင်ကြားနေကာ အကြမ်းဖက်မှုများကြောင့် စိတ်ထိခိုက်ခံစားနေရသူများကိုလည်း ကူညီအားပေးနေသည်။ ပုပ်ရဟန်းမင်းကြီးက ကျောင်းဆရာများမှာ ငြိမ်းချမ်းရေးနှင့် ညီညွတ်ရေးကို တည်ဆောက်သူများဖြစ်သည်ဟု ပြောကြားခဲ့ပြီး၊ ဗြိတိန် အိမ်ရှေ့မင်းသား ၀ီလီယံကလည်း ဗီဒီယိုမှတစ်ဆင့် အလ် ဟာရွဘ်အား ချီးကျူးစကား ပြောဆိုခဲ့သည်။

ဟာနန် အလ် ဟာရွဘ်ကမူ ကျောင်းဆရာများမှာ ကမ္ဘာကြီးကို ပြောင်းလဲနိုင်မည်ဟု ပြောကြားခဲ့သည်။

“ဒီစင်မြင့်ပေါ်မှာ ရပ်ရတဲ့ ပါလက်စတိုင်းကျောင်းဆရာမတစ်ဦး ဖြစ်ရတာကို ကျွန်မ ဂုဏ်ယူပါတယ်” ဟု ဆုချီးမြှင့်ပွဲအခမ်းအနားတွင် ပြောကြားခဲ့ပြီး ရရှိသည့် ဆုကြေးငွေ ကန်ဒေါ်လာ ၁ သန်းကို ကျောင်းသားများအတွက် အသုံးပြုသွားမည်ဟု ဆိုသည်။

ကမ္ဘာလုံးဆိုင်ရာ ကျောင်းဆရာဆု၏ နောက်ဆုံး ဇကာတင်စာရင်းတွင် အိန္ဒိယ၊ ကင်ညာ၊ ဖင်လန်နှင့် အမေရိကန်တို့မှ ကျောင်းဆရာများ ပါဝင်ခဲ့သည်။ အဆိုပါဆုကို Varkey ဖောင်ဒေးရှင်းမှ ဖန်တီးချီးမြှင့်ခဲ့ခြင်းဖြစ်ပြီး ပညာသင်ကြားရေးကဏ္ဍ တိုးတက်ရေးအတွက် ရည်ရွယ်ခြင်းဖြစ်သည်။

Ref: BBC