Tag: Palestine

ဖေဖော်ဝါရီ ၇၊ ၂၀၁၆
M-Media

– ကမ္ဘာ့အနောက်ဖက်ခြမ်းက ပါလက်စတိုင်းရဲ့ ပထမဆုံး သံရုံးကို ဘရာဇီးလ်နိုင်ငံ မြို့တော် ဘရာစီလီယာမြို့မှာ ယခုတစ်ပတ်အတွင်း ဖွင့်လှစ်လိုက်တယ်လို့ သိရပါတယ်။

သံရုံးဖွင့်ပွဲအခမ်းအနားကို ဘရာဇီးလ်နိုင်ငံဆိုင်ရာ ပါလက်စတိုင်းသံအမတ် အီဗရာဟင် အလ်ဇီဘန်က ဦးဆောင်ခဲ့ပြီး ဘရာဇီးအစိုးရ တာဝန်ရှိသူတွေ၊ အာရပ်နိုင်ငံတွေက သံအမတ်တွေနဲ့ ဘရာဇီးလ်ရှိ အာရပ်အသိုင်းအ၀ိုင်းက ပြည်သူတွေ တက်ရောက်ခဲ့ကြပါတယ်။

“ဒါဟာ လွန်ခဲ့တဲ့ နှစ် ၄၀ လုံးလုံး ကျွန်တော်နဲ့ ကျွန်တော့်ရဲ့ လုပ်ဖော်ကိုင်ဖက်တွေ မက်ခဲ့ရတဲ့ အိပ်မက်ရဲ့ အဆုံးသတ်ဖြစ်ပါတယ်” လို့ အလ်ဇီဘန်က ပြောကြားခဲ့ပါတယ်။ နောက်ပြီး ဒီလိုဖွင့်လှစ်နိုင်မှုဟာ ဘရာဇီးလ်နဲ့ ပါလက်စတိုင်းတို့အကြား ဆက်ဆံရေး အခြေအနေသစ်တစ်ခုကို အစပျိုးလိုက်တာဖြစ်ပြီး မိမိတို့နှစ်နိုင်ငံဟာ ပိုမိုနီးကပ်စွာနဲ့ အလုပ်အကိုင်တွေကို ပိုမိုဆောင်ရွက်နိုင်တော့မယ်လို့ သူက ထည့်သွင်းပြောကြားခဲ့ပါတယ်။

ဘရာဇီးလ်က အဲဒီပါလက်စတိုင်းသံရုံးကို ယခင် ဘရာဇီးလ်သမ္မတဟောင်း လူးဝစ် အီနာစီယို လူလာ ဒါဆေးလ်ဗားကလှူဒါန်းတဲ့ မြေမှာ ဆောက်လုပ်တာဖြစ်ပြီး၊ ဘရာဇီးလ်အစိုးရ အဆောက်အအုံတွေ၊ သမ္မတနန်းတော်နဲ့ တရားရုံးချုပ်တို့လို အချက်အခြာကျတဲ့နေရာတွေနဲ့ နီးနီးကပ်ကပ် တည်ရှိနေပါတယ်။

အလ်ဇီဘန်ကတော့ ဘရားဇီးလ်သံရုံးကို အရှေ့ဂျေရုဆလင်မှာ ဖွင့်လှစ်သွားနိုင်ဖို့ မျှော်လင့်နေပြီး ပါလက်စတိုင်းအနေနဲ့ တောင်အမေရိကနိုင်ငံတွေနဲ့ လွတ်လပ်စွာ ကုန်သွယ်ရေး သဘောတူညီချက်ကိုလည်း လက်မှတ်ရေးထိုးသွားဖို့ ရှိနေပါတယ်။

ဘရာဇီးလ်ဟာ ၂၀၁၀ ခုနှစ်မှာ ပါလက်စတိုင်းကို အချုပ်အခြာအာဏာပိုင်နိုင်ငံတစ်ခုအဖြစ် သတ်မှတ်ခဲ့ပြီး၊ တောင်အမေရိကနိုင်ငံ တော်တော်များများကလည်း ပါလက်စတိုင်းအပေါ် အပြည့်အ၀ ထောက်ခံမှု ပေးထားကြပါတယ်။

Ref : Presstv

ဖေဖော်ဝါရီ ၁၊ ၂၀၁၆
M-Media

– ပါလက်စတိုင်းပိုင်နက်များကို အစ္စရေးက ဆယ်စုနှစ်များစွာကြာ ကျူးကျော်သိမ်းပိုက်ကာ တရားမ၀င်အခြေချအိမ်ယာများ ဆောက်လုပ်နေမှုအား ကုလသမဂ္ဂ အထွေထွေအတွင်းရေးမှူးချုပ်က ထပ်မံရှုတ်ချလိုက်သည်။

“ပါလက်စတိုင်းပြည်သူတွေဟာ ကျူးကျော်သိမ်းပိုက်မှုကို အမြဲတမ်း ခုခံနေရတယ်ဆိုတာ သမိုင်းက သက်သေခံနေပါတယ်” ဟု ဘန်ကီမွန်က ၎င်း၏ အတွေးအမြင်ဆောင်းပါးတွင် ထည့်သွင်းရေးသားခဲ့ပြီး ထိုဆောင်းပါးကို နယူးယောက်တိုမ်းစ်သတင်းစာ၏ ၀ဘ်ဆိုက်မှ တနင်္ဂနွေနေ့တွင် ဖော်ပြခဲ့ကာ၊ ယနေ့ထုတ်သတင်းစာတွင်လည်း ထပ်မံဖော်ပြခဲ့သည်။

ပါလက်စတိုင်းပိုင် အနောက်ဖက်ကမ်းရှိ လယ်မြေဧက ၃၇၀ ကို သိမ်းယူကာ တရားမ၀င်အခြေချအိမ်ယာသစ် ၁၅၀ ထပ်မံဆောက်လုပ်ရန် မကြာသေးမီက အစ္စရေး၏ ကြေငြာမှုကိုလည်း ဘန်ကီမွန်က ထပ်မံ ရှုတ်ချခဲ့သည်။

“အစ္စရေးက တရားမ၀င်အခြေချအိမ်ယာတွေကို ဆက်လက်တိုးချဲ့နေတယ်။ တစ်ချိန်တည်းမှာ အနောက်ဖက်ကမ်းက ပါလက်စတိုင်းထောင်ပေါင်းများစွာရဲ့ နေအိမ်တွေကလည်း ဖျက်ဆီးခံရမယ့်အန္တရာယ် ရှိနေပါတယ်။ နှစ် ၅၀ နီးပါးလောက် ကျူးကျော်သိမ်းပိုက်ခံရမှုအောက်မှာ ပါလက်စတိုင်းတွေရဲ့ စိတ်ပျက်မှုနဲ့ နစ်နာမှုတွေက ကြီးထွားလို့သာ လာနေပါတယ်။ ဒါဟာ လစ်လျူရှုလိုက်တာနဲ့ ပျောက်သွားမယ့်ကိစ္စမျိုး မဟုတ်ပါဘူး” ဟု ဘန်ကီမွန်က ထည့်သွင်းရေးသားခဲ့သည်။

ထို့ပြင် အဆုံးသတ်ရန်မရှိသည့် ကျူးကျော်သိမ်းပိုက်မှုအောက်တွင် ပါလက်စတိုင်းများ နေထိုင်နေရခြင်းက အစ္စရေးနှင့် ပါလက်စတိုင်းပြည်သူများ၏ အနာဂတ်လုံခြုံရေးကို ပျက်ဆီးစေသည်ဟုလည်း ဘန်က ဆိုသည်။

ပါလက်စတိုင်းပိုင်နက်များတွင် ပါလက်စတိုင်းပြည်သူများနှင့် အစ္စရေးတပ်ဖွဲ့တို့အကြား တင်းမာမှုများ မြင့်တက်လာခြင်းကိုလည်း ဘန်က စိုးရိမ်ကြောင်း ပြောကြားခဲ့ပြီး ၂ နိုင်ငံတည်ရှိရေးအဖြေကို ပျက်ဆီးစေနိုင်သည်ဟု မှတ်ချက်ပေးခဲ့သည်။

“နှစ်နိုင်ငံအဖြေအတွက် ပြန်လမ်းမရှိတဲ့ အခြေနေတစ်ခုကိုများ သွားနေလားဆိုတာကို ကျွန်တော် တော်တော်လေး စိုးရိမ်မိပါတယ်”

ပါလက်စတိုင်းပိုင်နက်များအား အစ္စရေးက ကျူးကျော်သိမ်းပိုက်မှုကို ပြီးခဲ့သည့်တစ်ပတ်ကလည်း ဘန်ကီမွန်က ပြင်းပြင်းထန်ထန်ဝေဖန်ခဲ့ပြီး၊ အစ္စရေးဝန်ကြီးချုပ်နေတန်ယာဟုက ဘန်ကီမွန်မှာ အကြမ်းဖက်ဝါဒကို အားပေးအားမြှောက်ပြုနေကာ၊ ကုလမှာလည်း ဘက်မလိုက်မှု ပျောက်ဆုံးနေသည်ဟု ပြန်လည်တုန့်ပြန်ခဲ့သည်။

၁၉၆၇ ခုနှစ် စစ်ပွဲပြီးကတည်းက အစ္စရေးမှာ ပါလက်စတိုင်းပိုင်နက်များတွင် တရားမ၀င်အခြေချအိမ်ယာများကို ကျူးကျော်ဆောက်လုပ်ခဲ့ပြီး လက်ရှိအချိန်တွင် အိမ်ယာ ၂၃၀ ကျော် ရှိနေပြီဖြစ်ကာ အစ္စရေးသန်းဝက်ခန့်မှာ ထိုအိမ်ယာများတွင် နေထိုင်နေကြသည်။

ပြင်သစ်ကလည်း အစ္စရေး၏ ထိုလုပ်ရပ်များနှင့် နေတန်ယာဟုက ဘန်ကီမွန်အား အကြမ်းဖက်မှုကို အားပေးသည်ဟု ပြောဆိုမှုအတွက် ပြီးခဲ့သည့်တစ်ပတ်က ဝေဖန်ရှုတ်ချခဲ့ပြီး၊ မကြာမီ မိမိတို့စီစဉ်ပေးမည့် နိုင်ငံတကာ ညီလာခံတစ်ခုတွင် ပါလက်စတိုင်း-အစ္စရေးအရေး အဖြေမထွက်ပါက ပါလက်စတိုင်းအား လွတ်လပ်သော အချုပ်အခြာအာဏာပိုင်နိုင်ငံအဖြစ် အသိအမှတ်ပြုတော့မည်ဟု ကြေငြာခဲ့သည်။

Ref: Press TV

ဇန်န၀ါရီ ၂၂၊ ၂၀၁၆
M-Media

– အီဂျစ်နိုင်ငံသို့ ရောက်ရှိနေသည့် တရုတ်သမ္မတ ရှီကျင်ပင်းက အရှေ့ဂျေရုစလင်ကို မြို့တော်အဖြစ်ထား၍ ပါလက်စတိုင်းနိုင်ငံထူထောင်ရန်အတွက် တိုက်တွန်းဆော်သြလိုက်သည်။

၎င်း၏ ဒုတိယအကြိမ်မြောက် အရှေ့အလယ်ပိုင်းခရီစဉ်အဖြစ် ရောက်ရှိနေသည့် ရှီက ပါလက်စတိုင်းကိစ္စအား ဘေးဖယ်ထား၍မရဟုလည်း ဆိုသည်။

“အရှေ့အလယ်ပိုင်းမှာ ငြိမ်းချမ်းတဲ့လုပ်ငန်းစဉ်နဲ့ အရှေ့ဂျေရုစလင်ကို မြို့တော်အဖြစ်ထားပြီး ပါလက်စတိုင်းနိုင်ငံ ထူထောင်မှုကို ထောက်ခံပါတယ်” ဟု ရှီကျင်ပင်းက အာရပ်လိဂ်ရုံးချုပ်တွင် ပြုလုပ်ခဲ့သည့်မိန့်ခွန်း၌ ထည့်သွင်းပြောကြားခဲ့သည်။

ထို့ပြင် ပါလက်စတိုင်းပိုက်နက်များ၌ နေစွမ်းအင်သုံးကာ ဓာတ်အားထုတ်လုပ်ပေးနိုင်မည့် စီမံကိန်းများ တည်ဆောက်ရေးအတွက် ကန်ဒေါ်လာ ၇.၆ သန်း ကူညီသွားမည်ဟုလည်း တရုတ်သမ္မတက ကြေငြာခဲ့ကာ ပါလက်စတိုင်း-အစ္စရေး ပြဿနာကို အဆုံးသတ်ရန်အတွက် ဆွေးနွေးညှိနှိုင်းမှုများကိုလည်း ရှေ့တိုးဆောင်ရွက်သင့်သည်ဟု ပြောကြားခဲ့သည်။

“ပါလက်စတိုင်းပြည်သူတွေရဲ့ တရားဝင်အကျိုးစီးပွားကို ထိန်းသိမ်းကာကွယ်တာဟာ အာရပ်လိဂ်နဲ့ နိုင်ငံတကာအသိုင်းအ၀ိုင်းရဲ့ တာဝန်ဝတ္တရားပါပဲ”

အရှေ့ဂျေရုစလင်ကို မြို့တော်အဖြစ်သတ်မှတ်၍ ပါလက်စတိုင်းနိုင်ငံထူထောင်ရေးကို နိုင်ငံတကာအသိုင်းအ၀ိုင်းက တရားဝင် အသိအမှတ်ပြု ထောက်ခံထားသော်လည်း အစ္စရေးက ထိုနေရာအား ကျူးကျော် ပိတ်ဆို့ထားကာ ပါလက်စတိုင်း ပိုင်နက်များတွင်လည်း တရားမ၀င်အခြေချအိမ်ယာများကို ဆက်လက်ဆောက်လုပ်လျက်ရှိနေသည်။

ဆီးရီးယား၊ ဂျော်ဒန်၊ လက်ဘနွန်၊ လစ်ဗျားနှင့် ယီမင်နိုင်ငံများသို့ လူသားချင်းစာနာထောက်ထားမှု အကူအညီ ကန်ဒေါ်လာ ၃၅ သန်း ပေးအပ်သွားမည်ဟုလည်း ရှီက ကြေငြာခဲ့သည်။

“ဆီးရီးယားပြဿနာမှာ အနိုင်ရတဲ့သူ မပေါ်တဲ့အတွက် ရှေ့မဆက်သင့်တော့ပါဘူး။ ဆီးရီးယားပြည်သူတွေကသာ ဒီကိစ္စမှာ ခံစားရတာပါ။ ဒီပဋိပက္ခကို အဆုံးသတ်ဖို့အတွက် ချက်ချင်းဦးစားပေးလုပ်ရမှာက အပစ်ရပ်ရေးနဲ့ နိုင်ငံရေးအတွက် ဆွေးနွေးညှိနှိုင်းမှုတွေပါ။ တစ်ချိန်တည်းမှာပဲ ဆီးရီးယားမှာ လူသားချင်းစာနာထောက်ထားမှုဆိုင်ရာ လုပ်ငန်းတွေ ချက်ချင်း လိုအပ်ပါတယ်”

ရှီကျင်ပင်းမှာ ကိုင်ရိုသို့ ဗုဒ္ဓဟူးနေ့က ရောက်ရှိလာခြင်းဖြစ်ပြီး ၁၂ နှစ်တာကာလအတွင်း အီဂျစ်သို့ ပထမဆုံး ရောက်ရှိသည့် တရုတ်သမ္မတ ဖြစ်သည်။ အီဂျစ်နှင့် တရုတ်နိုင်ငံတို့မှ တာဝန်ရှိသူများမှာ စီးပွားရေးနှင့် ရင်းနှီးမြှုပ်နှံမှုသဘောတူစာချုပ်ပေါင်း ၂၁ ခုကို လက်မှတ်ရေးထိုးခဲ့ကြသည်။

Ref: Aljazeera