Tag: Palestine

ဖေဖော်၀ါရီ ၄၊ ၂၀၂၄

M-Media

– အောက်တိုဘာ ၇ ရက်နေ့ ဟားမက်စ်ရဲ့ တိုက်ခိုက်မှုမှာ UNRWA ၀န်ထမ်းတွေ ပါ၀င်ခဲ့တယ်ဆိုတဲ့ စွပ်စွဲချက်နဲ့ပတ်သက်ပြီး အစ္စရေးက ခိုင်လုံတဲ့ သက်သေအထောက်အထား မပေးနိုင်ဘူးလို့ UNRWA ရဲ့ ကော်မရှင်နာ ဖိလစ် လာဇာရီနီက ပြောကြားလိုက်ပါတယ်။ 

အဲဒီစွပ်စွဲချက်ကြောင့် အမေရိကန်၊ ယူကေနဲ့ အစ္စရေးရဲ့ မဟာမိတ်နိုင်ငံ တော်တော်များများက UNRWA အဖွဲ့ကို ငွေကြေးထောက်ပံ့မှု ရပ်ဆိုင်းခဲ့ပါတယ်။ 

UNRWA အဖွဲ့ဟာ အစ္စရေးရဲ့ တိုက်ခိုက်သတ်ဖြတ်မှုတွေကြောင့် အတိဒုက္ခရောက်နေကြတဲ့ ပါလက်တစတိုင်းပြည်သူတွေကို ၁၀ စုနှင့်များစွာ ကူညီလာခဲ့တဲ့ အဖွဲ့အစည်းပါ။ 

၀န်ထမ်း ၁၂ ဦးဟာ အောက်တိုဘာ ၇ ရက်နေ့မှာ အမျိုးသမီးတစ်ဦးကို ပြန်ပေးဆွဲခဲ့တယ်ဆိုတဲ့ အစ္စရေးရဲ့ပြောကြားချက်နဲ့ ပတ်သက်တဲ့ ထောက်လှမ်းရေးအစီရင်ခံစာတွေကို မိမိတို့ ရရှိခဲ့ရာမှာ တိကျသေချာတဲ့ အထောက်အထား မပါ၀င်ဘူးလို့ Financial Times သတင်းစာက ဒီကနေ့မှာ ဖော်ပြပါတယ်။ 

လာဇာရီနီက နိုင်ငံ ၁၅ နိုင်ငံရဲ့ ထောက်ပံ့မှု ရပ်ဆိုင်းသွားတာကြောင့် ဂါဇာမှာ ပါလက်စတိုင်းပြည်သူတွေကို ပေးအပ်နေတဲ့ အသက်ရှင်ရပ်တည်ရေး အကူအညီတွေ၊ လုပ်ငန်းတွေဟာ ဖေဖော်၀ါရီ လကုန်ပိုင်းမှာ ရပ်ဆိုင်းရတော့မယ်လို့ ထည့်သွင်းပြောဆိုခဲ့ပါတယ်။ 

Ref: Aljazeera 

ဖေဖော်၀ါရီ ၂၊ ၂၀၂၄

M-Media 

-ဂါဇာကမ်းမြှောင်မှာ အပစ်ရပ်ရေး အကောင်အထည်ပေါ်ပြီးရင် ပါလက်စတိုင်းကို အချုပ်အခြာအာဏာပိုင် နိုင်ငံအဖြစ် အသိအမှတ်ပြုတော့မယ်လို့ ဗြိတိန်နိုင်ငံခြားရေး၀န်ကြီး ဒေးဗစ် ကင်မရွန်းက ပြောကြားလိုက်ပါတယ်။ 

ဗြိတိန်ရဲ့ ဒီထုတ်ပြန်မှုဟာ အစ္စရေးက ပါလက်စတိုင်းပြည်သူတွေအပေါ် ညှင်းပမ်းသတ်ဖြတ်မှုတွေကို လက်မခံနိုင်တော့ကြောင်း ပြသတာမျိုး ဖြစ်တယ်လို့ ကျွမ်းကျင်သူတွေက သုံးသပ်ပါတယ်။ 

နာဇီရန်ကြောင့် ဥရောပက ထွက်ပြေးလာတဲ့ဂျူးတွေ လက်နက်ကိုင်အဖွဲ့ဖွဲ့ကာ ပါလက်စတိုင်းတွေကို သတ်ဖြတ်မောင်းထုတ် နယ်မြေလုပြီး အစ္စရေးနိုင်ငံအဖြစ် ၁၉၄၈ ခုနှစ်မှာ ထူထောင်ခဲ့ပါတယ်။

ဒီထူထောင်မှုကြောင့် ဖြစ်ပေါ်လာတဲ့ ပဋိပက္ခကို ဖြေရှင်းနိုင်ရေးအတွက် ကုလသမဂ္ဂက သမိုင်း၀င် ပါလက်စတိုင်းဒေသရဲ့ ၆၅ ရာခိုင်နှုန်းကို ဂျူးနိုင်ငံ ၃၅ ရာခိုင်နှုန်းကို ပါလက်စတိုင်းနိုင်ငံအဖြစ် သတ်မှတ်ပေးခဲ့ပါတယ်။ 

ဒီလိုသတ်မှတ်ပြီးနောက်ပိုင်းလည်း အစ္စရေးက ယနေ့အချိန်အထိ ပါလက်စတိုင်းဒေသတွေကို ကျူးကျော်သိမ်းပိုက်နေပါတယ်။ 

ဂါဇာက အစ္စရေးရဲ့ တစ်ကျော့ပြန်လူသတ်ပွဲကြောင့် အမေရိကန်အပါအ၀င် အစ္စရေးရဲ့ အဓိကမဟာမိတ် ဥရောပနိုင်ငံတွေက နှစ်နိုင်ငံတည်ရှိရေးအဖြေကို မြန်မြန်ဆန်ဆန် လုပ်ဆောင်ဖို့ ထုတ်ပြောလာကြပါတယ်။ 

ဒေးဗစ်ကင်မရွန်းက နှစ်နိုင်ငံတည်ရှိရေးအဖြေအတွက် အစ္စရေးနဲ့ ပါလက်စတိုင်းတို့အကြား ဆွေးနွေးမှု လုပ်လုပ်မလုပ်လုပ် ဗြိတိန်ကတော့ ပါလက်စတိုင်းကို အချုပ်အခြာအာဏာပိုင် နိုင်ငံအဖြစ် အသိအမှတ်ပြုတော့မယ်လို့ ဖေဖော်၀ါရီ ၁ ရက်နေ့မှာ ပြောကြားခဲ့ပါတယ်။

လက်ရှိမှာ အမေရိကန်နဲ့ ဗြိတိန်အပါအ၀င် အစ္စရေးရဲ့ မဟာမိတ်တစ်ချို့ဟာ ပါလက်စတိုင်းကို အချုပ်အခြာအာဏာပိုင် နိုင်ငံအဖြစ် အသိအမှတ် မပြုထားပါဘူး။ 

 Ref: Aljazeera 

ဖေဖော်၀ါရီ ၂၊ ၂၀၂၄

M-Media 

-ပါလက်စတိုင်းနိုင်ငံ အနောက်ဖက်ကမ်းမှာ အကြမ်းဖက်တိုက်ခိုက် နယ်မြေခိုးယူမှုတွေ လုပ်ဆောင်နေတဲ့ ဂျူးအစွန်းရောက်တွေကို အမေရိကန်က ပထမဆုံး ပိတ်ဆို့အရေးယူမှုတွေ လုပ်ဆောင်လိုက်ပါတယ်။ 

ပထမအသုတ် အရေးယူမှုမှာ ဂျူးအစွန်းရောက်လေးဦး ပါ၀င်ပါတယ်။ သူတို့ အမေရိကန်မှာ ပိုင်ဆိုင်မှုတွေ ရှိနေရင် သိမ်းဆည်းခံရမှာဖြစ်ပြီး အမေရိကန်လုပ်ငန်းတွေ သူတို့နဲ့ ဆက်သွယ် လုပ်ဆောင်တာကိုလည်း တားမြစ်မှာဖြစ်ပါတယ်။ 

ပါလက်စတိုင်းပိုင်နက်တွေမှာ နေထိုင်နေတဲ့ တရားမ၀င် ဂျူးတွေက ပါလက်စတိုင်းတွေအပေါ် အကြမ်းဖက်တိုက်ခိုက်မှု လုပ်တာကို တားဆီးအရေးယူနိုင်မယ့် အမိန့်တစ်ခုကိုလည်း သမ္မတက ထုတ်ပြန်ထားတယ်လို့ အိမ်ဖြူတော်ရဲ့ ထုတ်ပြန်ချက်မှာ ဖော်ပြထားပါတယ်။ 

အစ္စရေးစစ်တပ်က ဂါဇာမှာ လူသတ်ပွဲလုပ်နေချိန် အနောက်ဖက်ကမ်းမှာလည်း ဂျူးအစွန်းရောက်တွေက ပါလက်စတိုင်းတွေအပေါ် တိုက်ခိုက်သတ်ဖြတ် နယ်မြေလုမှုတွေကို အရင်ကထက် ပိုမိုလုပ်ဆောင်လာနေပါတယ်။ 

Ref: Aljazeera 

(ဓာတ်ပုံ – ပါလက်စတိုင်းပိုင်နက်အတွင်းမှ တရားမ၀င်ဂျူးများ)

ဇန်န၀ါရီ ၃၀၊ ၂၀၂၄

M-Media 

-အောက်တိုဘာ ၇ ရက်နေ့ကစတင်ကာ ဂါဇာမှာ တစ်ကျော့ပြန် ပြုလုပ်ခဲ့တဲ့ လူသတ်ပွဲအတွင်း အစ္စရေးဟာ ကုလအဆောက်အဦးတွေကို အနည်းဆုံး အကြိမ် ၂၆၀ လောက် တိုက်ခိုက်ခဲ့တယ်လို့ ပါလက်စတိုင်း အကူအညီပေးရေးအဖွဲ့ UNRWA က ထုတ်ပြန်ပါတယ်။ 

စာသင်ကျောင်းတွေ၊ စစ်ရှောင်စခန်းတွေ၊ ရိက္ခာသိုလှောင်ရုံတွေ စတဲ့ ကုလသမဂ္ဂက ကြီးကြပ်တဲ့ အဆောက်အဦးတွေ တိုက်ခိုက်ခံခဲ့ရတာ ဖြစ်ပါတယ်။ 

ဒီတိုက်ခိုက်မှုတွေအတွင်း အသတ်ခံရသူ ပါလက်စတိုင်းအရေအတွက်ဟာ အနည်းဆုံး ၃၆၀ ရှိတယ်လို့ UNRWA ရဲ့ ထုတ်ပြန်ချက်မှာ ဖော်ပြထားပါတယ်။ 

အစ္စရေးဟာ ၃ လအတွင်း ကုလ၀န်ထမ်း ၁၅၂ ဦးကိုလည်း သတ်ဖြတ်ခဲ့ပါတယ်။ 

ပါလက်စတိုင်း လွတ်မြောက်ရေးအဖွဲ့ ဟားမက်စ်ကို တုန့်ပြန်တယ်လို့ အစ္စရေးက ခေါင်းစဥ်တပ်ပြီး ဂါဇာက ပါလက်စတိုင်း လူ့အဖွဲ့အစည်းကို တိုက်ခိုက်သတ်ဖြတ်နေရာမှာ ၃ လကျော်အတွင်း အသတ်ခံရသူ အရေအတွက်ဟာ ၂၆၇၅၁ ဦး ရှိလာပြီဖြစ်ပါတယ်။ 

လူ ၇ သောင်းနီးပါး ဒဏ်ရာရထားပြီး၊ အဆောက်အဦးအပျက်စီးတွေကြားမှာ ပိတ်မိနေသူ အရေအတွက်ဟာ တစ်သောင်းနီးပါး ရှိလာပါပြီ။ 

ဂါဇာကမ်းမြှောင်တစ်ခုလုံးက အဆောက်အဦးအားလုံးရဲ့ ၈၀ ရာခိုင်နှုန်းကျော်ကိုလည်း အစ္စရေးက တိုက်ခိုက်ဖျက်ဆီးထားပါတယ်။ 

Ref: Aljazeera 

(ဓာတ်ပုံ – UNRWA ၏ ထုတ်ပြန်မှု)