စက်တင်ဘာ ၆၊ ၂၀၁၈
M-Media
ပါလက်စတိုင်းရွာတစ်ခုကို ဖျက်ဆီးရန် အစ္စရေး စီစဉ်
============
ပါလက်စတိုင်းပိုက်နက်တစ်ခုဖြစ်တဲ့ အနောက်ဖက်ကမ်း ဂျေရုစလင်မြို့နားက ချန် အလ်-အေမာရ်ရွာကို ဖြိုချဖျက်ဆီးဖို့အတွက် အစ္စရေးတရားရုံးက မနေ့မှာ စစ်တပ်ကို ခွင့်ပြုချက် ပေးလိုက်ပါတယ်။ ဘဒူအင်လူမျိုးတွေနေထိုင်တဲ့ အဲဒီနေရာဟာ အစ္စရေးရဲ့ ကျူးကျော်အိမ်ယာနှစ်ခု အလယ်မှာ ရှိနေတာပါ။ အစ္စရေးအာဏာပိုင်တွေက အလ်-အေမာရ်ရွာမှာ ကျူးကျော်အိမ်ယာတည်ဆောက်ကာ ဂျေရုစလင်ကို ပါလက်စတိုင်းရွာတွေနဲ့ အဆက်အသွယ်ဖြတ်တောက်ဖို့ ရည်ရွယ်နေတာ ဖြစ်ပါတယ်။ ရွာဖြိုချမှုကြောင့် ပါလက်စတိုင်း ၁၈၀ လောက် အိုးမဲ့အိမ်မဲ့ဖြစ်ဖို့ ရှိနေပြီး၊ ပါလက်စတိုင်းအာဏာပိုင်အဖွဲ့နဲ့ လူ့အခွင့်အရေးအဖွဲ့တွေက အစ္စရေးရဲ့ ဒီလုပ်ရပ်ကို ရှုတ်ချခဲ့ပါတယ်။
ဂျပန်တွင် ငလျင်လှုပ်မှုကြောင့် ၁ ဦးသေဆုံး
================
ဂျပန်နိုင်ငံမြောက်ပိုင်း ဟိုကိုင်းဒိုးကျွန်းမှာ ဒီနေ့မနက် အစောပိုင်းက ပြင်းအား ၆.၆ မဂ္ဂနီကျုရှိတဲ့ ငလျင်တစ်ခု လှုပ်ခတ်မှုကြောင့် အနည်းဆုံး ၁ ဦးသေဆုံးပြီး ၃၀ ကျော် ပျောက်ဆုံးနေပါတယ်။ ငလျင်ကြောင့် မြေပြိုမှုတွေ အဆောက်အဦး ပြိုကျပျက်ဆီးမှုတွေ ရှိခဲ့ပါတယ်။ နောက်ဆက်တွဲငလျင် တော်တော်များများလည်း တစ်ညလုံ လှုပ်ခတ်ခဲ့ပါတယ်။ ဇွန်လတုန်းက အိုဆာကာမှာ အင်အားပြင်းငလျင်တစ်ခု လှုပ်ခတ်ခဲ့တာကြောင့် ၅ ဦးသေဆုံးပြီး ၃၅၀ လောက် ဒဏ်ရာရခဲ့ပါတယ်။ ဂျပန်နိုင်ငံအနောက်ပိုင်းမှာလည်း မနေ့က တိုင်ဖုန်းမုန်တိုင်းဒဏ်ကို ခံစားခဲ့ရပါတယ်။
ကိုရီးယားနှစ်နိုင်ငံ ထိပ်သီးတွေ့ဆုံပွဲ ယခုလအတွင်း ပြုလုပ်မည်
============
အခုလ ၁၈ ရက်နေ့ကနေ ၂၀ ရက်နေ့အထိ မြောက်ကိုရီးယားမြို့တော် ပြုံးယမ်မှာ နျူဖျက်သိမ်းရေး ထိပ်သီးအစည်းအဝေး ကျင်းပဖို့အတွက် ကိုရီးယားနှစ်နိုင်ငံက မနေ့မှာ သဘောတူလိုက်ပါတယ်။ ဒါဟာ အခုနှစ်အတွင်း နှစ်နိုင်ငံခေါင်းဆောင်တွေ ၃ ကြိမ်မြောက်တွေ့ဆုံမှု ဖြစ်လာမှာ ဖြစ်ပါတယ်။ တောင်ကိုရီးယား အမျိုးသားလုံခြုံရေးအကြံပေးနဲ့ မနေ့က တွေ့ဆုံမှုအတွင်း မြောက်ကိုရီးယားခေါင်းဆောင် ကင်ဂျုံအွန်က သူ့အနေနဲ့ နျူကင်းစင်ရေးကို တောင်ကိုရီးယား၊ အမေရိကန်တို့နဲ့ ပူးပေါင်းဆောင်ရွက်ဖို့ စိတ်ဆန္ဒရှိတယ်လို့ ပြောကြားခဲ့ပါတယ်။
Ref: Aljazeera, CNA
