Tag: PremierLeague

ဇန်န၀ါရီ ၂၊ ၂၀၁၅
M-Media

– ယမန်နေ့က ဆောက်သက်တမ်အား ၂ ဂိုးပြတ်ဖြင့် ရှုံးနိမ့်ခဲ့သည့်ပွဲတွင် အာဆင်ဝင်းဂါးကို ဆဲဆိုခဲ့သည့် အာဆင်နယ် ပရိတ်သတ်တစ်ဦးမှာ ဖမ်းဆီးခြင်းခံခဲ့ရသည်ဟု သိရသည်။

ပွဲပြီးဆုံးရန် ၁၀ မိနစ်ခန့်အလိုတွင် အသင်း၏ ရှုံးနိမ့်နေမှုကို မကျေနပ်သည့် အသက် ၂၅ နှစ်အရွယ် ပရိတ်သတ်တစ်ဦးက အာဆင်နယ်နည်းပြအဖွဲ့များ ထိုင်ရာ ခုံတန်းသို့ ၀င်လာသောကြောင့် လုံခြုံရေးများက ထိန်းသိမ်းခဲ့ရပြီး နောက်ပိုင်းတွင် ရဲလက်သို့ အပ်ခဲ့သည်။

အဆိုပါ ပရိတ်သတ်မှာ ၀င်းဂါးနှင့် ၎င်း၏ လက်ထောက်နည်းပြအား စော်ကားသည့် အမူအရာကို လုပ်ပြခဲ့ပြီး နှုတ်ဖြင့်လည်း ဆဲရေးတိုင်းထွား ခဲ့သည်ဟု သိရသည်။

ဝင်းဂါးကမူ ထိုပရိတ်သတ်မှာ အကြမ်းဖက်မှုပုံစံမျိုး မပြုလုပ်ကြောင်း၊ သို့သော်လည်း မိမိတို့၏ ပရိတ်သတ်မဟုတ်ဘဲ ဆောက်သက်တမ် ပရိတ်သတ် ဖြစ်မည်ဟု ထင်ကြောင်း ပွဲအပြီး၌ ပြောကြားခဲ့သည်။

`ဟုတ်ပါတယ်။ လူငယ်တစ်ယောက်ပါ။ သူက ဆောက်သက်တမ်ပရိတ်သတ်လို့ ကျွန်တော်ထင်ပါတယ်။ သူ လုံးဝ ရန်မလိုပါဘူး။ တစ်ခုခုပြောလိုက်တယ်လို့ လည်း ကျွန်တော်မထင်ပါဘူး´ ဟု ၀င်းဂါးက သတင်းထောက်များအား ပြောကြားခဲ့သည်။

ဆောက်သက်တမ်နည်းပြ ရော်နယ်လ်ကိုးမန်းကမူ ထိုအဖြစ်အပျက်ကို မမြင်တွေ့ခဲ့ဟု ဆိုသည်။

ချန်ပီယံလိဂ်ဝင်ခွင့်အတွက် တိုက်ပွဲဝင်နေရသည့် အာဆင်နယ်အသင်းမှာ ပရိတ်သတ်များ၏ ငြိုငြင်မှုကို ခံနေရပြီး ဒီဇင်ဘာလကလည်း စတုတ်စီးတီးအသင်း အား ၃ ဂိုး ၂ ဂိုးဖြင့် ရှုံးနိမ့်ခဲ့သည့်ပွဲတွင် ၀င်းဂါးမှာ ပရိတ်သတ်များ၏ လှောင်ပြောင်မှုကို ခံခဲ့ရသည်။

Ref : goal.com

ဇန်န၀ါရီ ၂၊ ၂၀၁၅
M-Media

– ပြီးခဲ့သည့်ပွဲစဉ် ၂ ခုတွင် မိမိတို့မှာ ဒိုင်လူကြီးကပေးသော ခရစ္စမတ်လက်ဆောင် များ ရရှိခဲ့သည်ဟု ချယ်ဆီးနည်းပြ မော်ရင်ဟိုက လှာင်ပြောင်ပြောကြား လိုက်သည်။

မော်ရင်ဟိုမှာ ပြီးခဲ့သည့် တနင်္ဂနွေနေ့ကပင် မိမိအသင်းအား အပြစ်ပေးရန် ဒိုင်လူကြီးများအကြား လှုပ်ရှားမှုများ ရှိနေသည်ဟု ပြောကြား ခဲ့ပြီး၊ ယမန်နေ့က ကစားခဲ့သည့် ပရီးမီးယားလိဂ်ပွဲစဉ်တွင် ချယ်ဆီးမှာ မြို့ခံပြိုင်ဘက် စပါး အသင်းအား ၅ ဂိုး ၃ ဂိုးဖြင့် ရှုံးနိမ့်ခဲ့ပြီးနောက်တွင် မူ ဒိုင်လူကြီးများအပေါ် မော်ရင်ဟို၏ သဘောထားမှာ ပိုမိုတင်းမာလာခဲ့သည်။

`ကျွန်တော်အရှုံးကို မုန်းပါတယ်။ ဒါပေမယ့် နယူးကာဆယ်နဲ့ပွဲရှုံးတာကို ကျွန်တော်လက်ခံပါတယ်။ ပွဲတာဝန်ရှိသူတွေရဲ့ စွမ်းဆောင်ရည်က သန့်ရှင်း ခဲ့တယ်လေ။ ရှုံးသွားတဲ့ပွဲအတွက် မတူညီတဲ့ ခံစားမှုမျိုး ရှိပါတယ်။ ပြီးခဲ့တဲ့ ပွဲစဉ် ၂ ခုမှာ ကျွန်တော်တို့ အရေးပါတဲ့ ခရစ္စမတ်လက်ဆောင်တွေ ရခဲ့ပါတယ်။ ဘောလုံးကို ချစ်မြတ်နိုးသူတိုင်း မကြိုက်တဲ့ လက်ဆောင်မျိုးပေါ့ဗျာ´ ဟု မော်ရင်ဟိုက ပြောကြားခဲ့သည်။

ထို့ပြင် စပါးအသင်းအား ရှုံးနိမ့်ခဲ့သည့်ပွဲစဉ်တွင် မိမိတို့အသင်းမှာ နောက်တန်းအမှားများ ရှိခဲ့ကြောင်း၊ စပါးအသင်းမှ တိုက်စစ်မှူးများကို မထိန်းနိုင်ခဲ့ကြောင်း မော်ရင်ဟိုက ၀န်ခံပြောကြားခဲ့သည်။

Ref : goal.com

ဇန်န၀ါရီ ၂၊ ၂၀၁၅
M-Media

– လီဗာပူးလ်အသင်းတွင် ၁၆ နှစ်ကျော် ကစားလာခဲ့သည့် အင်္ဂလန်ကွင်းလယ်လူ စတီဗင်ဂျရတ်က မိမိအနေဖြင့် ရာသီ ကုန်တွင် အသင်းမှ ထွက်ခွာတော့မည်ဟု ပြောကြားလိုက်သည်။

ဂျရတ်၏ လက်ရှိစာချုပ်မှာ ယခုနှစ်ဘောလုံးရာသီအပြီးတွင် ကုန်ဆုံးမည်ဖြစ်ပြီး နည်းပြ ဘရန်ဒန်ရော်ဂျာကမူ ဂျရတ်အား အသင်းတွင် ဆက်လက် ရှိနေစေချင်ကာ အသင်းကလည်း ပြီးခဲ့သည့် ဒီဇင်ဘာလတွင် စာချုပ်သစ်ချုပ်ဆိုရန် ကမ်းလှမ်းခဲ့သည်။

သို့သော်လည်း အသက် ၃၄ နှစ်အရွယ်ရှိပြီဖြစ်သည့် ဂျရတ်က ၎င်းအနေဖြင့် မိမိ၏ ဘောလုံးသမားဘ၀အား ပရီးမီးယားလိဂ် အပြင်ဘက်တွင် ကုန်ဆုံး ချင်သည်ဟု ဆိုသည်။

`ကျွန်တော့်ရဲ့ဘ၀မှာ အခက်ခဲဆုံး ဆုံးဖြတ်ချက်ဖြစ်ပြီး ကျွန်တော်နဲ့ ကျွန်တော့် မိသားစုဟာ ကောင်းမွန်တဲ့ အချိန်တစ်ခု အတွက် တော်တော်လေးစဉ်းစားပြီး ဆုံးဖြတ်ခဲ့တာပါ´ ဟု ဂျရတ်က ပြောကြားခဲ့သည်

ဂျရတ်အား ထိပ်တန်းအသင်း အများအပြားက စိတ်ဝင်စားနေပြီး အမေရိကန် မေဂျာလိဂ်ကလပ် အလ်အေ ဂလက်ဆီ အသင်းကလည်း ခေါ်ယူရန် ကြိုးစားနေသည်။

ဂျရတ်ကမူ အသင်းမှ ထွက်ခွာတော့မည်ဟု ကြေညာခြင်းမှာ မိမိ၏ အနာဂတ်နှင့် ပတ်သက်၍ ကောလဟာလများက နည်းပြနှင့် အသင်းအား အနှောက်အယှက် မဖြစ်စေရန် ဖြစ်ကြောင်း၊ မိမိ၏ဘ၀တွင် ကြီးမားသောအစိတ်အပိုင်းမှ ပါဝင်သည့် ကလပ်အသင်းအား နှုဆက်ပါသည်ဟု ပြောကြားရခြင်းမှာ အလွန်ခက်ခဲကြောင်း ထည့်သွင်းပြောကြားခဲ့သည်။

Ref : goal.com

ဇန်န၀ါရီ ၁၊ ၂၀၁၅
M-Media

– အမေရိကန် မေဂျာလိဂ်ကလပ် နယူးယောက်စီးတီး အသင်းမှ အငှားဖြင့် ခေါ်ယူထားသည့် ကွင်းလယ်ကစားသမား လမ်းပတ်အား မန်စီးတီးအသင်းက ယခုနှစ်ရာသီကုန်အထိ သက်တမ်းတိုးခဲ့သည်ဟု သိရသည်။

ပြီးခဲ့သည့်နွေရာသီက နယူးယောက်စီးတီးအသင်းနှင့် စာချုပ်ချုပ်ဆိုခဲ့သည့် ချယ်ဆီး ကွင်းလယ်လူဟောင်း လမ်းပတ်မှာ မန်စီးတီးအသင်းသို့ ဇန်န၀ါရီလအထိ အငှားဖြင့် လာရောက်ကစားနေခြင်းဖြစ်သည်။

သို့သော်လည်း လမ်းပတ်မှာ ထိပ်တန်းအဆင့် ခြေစွမ်းရှိသေးကြောင်း သက်သေ ပြနိုင်ခဲ့ပြီး မန်စီးတီးအသင်း၌ ၁၇ ပွဲပါဝင်ကစားကာ ၆ ဂိုး သွင်းယူပေးနိုင်ခဲ့သည်။

`ဒီနှစ်ရာသီကုန်အထိ ဖရန့်လမ်းပတ်ကို စာချုပ်သက်တမ်းတိုးလိုက်တယ်ဆိုတာ မန်စီးတီးက အတည်ပြုနိုင်ပါတယ်´ ဟု မန်စီးတီးအသင်းမှ ထုတ်ပြန်သော ကြေညာချက်တွင် ဖော်ပြထားသည်။

နယူးယောက်စီးတီးအသင်း၏ ဒါရိုက်တာဖြစ်သူ ကလော်ဒီယို ရေနာကလည်း ဘောလုံးစတားတစ်ယောက်ဖြစ်သည့် လမ်းပတ်မှာ မန်စီးတီးအသင်းအား နေ့စဉ် ကူညီပေးခြင်း၏ အကျိုးရလဒ်ကို ခံစားရခြင်းဖြစ်ကြောင်း ထည့်သွင်းပြောကြား ခဲ့သည်။

လာမည့် ဆောင်းရာသီအပြောင်းအရွှေ့တွင် အသင်းသို့ ကစားသမားအသစ်များ ခေါ်ယူမည်လားဆိုသည်နှင့် ပတ်သက်၍ မန်စီးတီးနည်ပြ ပယ်လီဂရီနီက မိမိတို့တွင် ဘဏ္ဍာရေးအကန့်အသတ်ရှိနေပြီး ကစာသမားအသစ်များ ခေါ်ယူသွားမည်မဟုတ်ဟု ပြောကြားခဲ့သည်။

Ref : goal.com

ဒီဇင်ဘာ ၃၁၊ ၂၀၁၄
M-Media

– တနင်္လာနေ့က ကစားခဲ့သည့် ပရီးမီးယားလိဂ်ပွဲတွင် ဆွမ်ဆီးကစားသမား ဖာနန်ဒက်ဇ်၏ မျက်နှာကို တွန်းထိုးခဲ့သည့် လီဗာပူးလ်တိုက်စစ်မှူး စတာလင်မှာ FA ၏ ပြစ်ဒဏ်ခတ်မှုမှ လွတ်မြောက်ခဲ့သည်ဟု သိရသည်။

လီဗာပူးလ်မှ ၄ ဂိုး ၁ ဂိုးဖြင့် အနိုင်ရခဲ့သည့် အဆိုပါပွဲတွင် စတာလင်မှာ ဖာနန်ဒက်ဇ်အား စည်းကြပ်ဒိုင်၏ အရှေ့၌ မျက်နှာကို တွန်းထိုးခဲ့ခြင်းဖြစ်သည်။

ရန်လိုသည့်ထိုလုပ်ရပ်က ပွဲပယ်ခံရနိုင်သည့် အခြေအနေမျိုးအထိ ဖြစ်သွားနိုင်ပြီး တိုက်စစ်အားနည်းနေသည့် လီဗာပူးလ်အသင်းအတွက် စိုးရိမ်စရာဖြစ်ခဲ့သည်။

သို့သော်လည်း စတာလင်မှာ ပြစ်ဒဏ်ခတ်မှုမှ လွတ်မြောက်ခဲ့ပြီး FA မှ ပြောရေးဆိုခွင့်ရှိသူ တစ်ဦးကမူ ထိုကိစ္စမှာ ပွဲတာဝန်ရှိသူများ ရှေ့မှောက်တွင် ဖြစ်ပွားခဲ့သည့်အတွက် ပြစ်ဒဏ်ခတ်ခံရမှုမှ ကင်းလွတ်ခဲ့ခြင်းဖြစ်သည်ဟု ပြောကြားခဲ့သည်။

သို့သော်လည်း ထိုပွဲ၏ အခြားပြစ်ဒဏ်ကျူးလွန်မှုတစ်ခုတွင် ပါဝင်ခဲ့သည့် ဆွမ်ဆီးကွင်းလယ်လူ ရှဲလ်ဗီမှာ တရားစွဲဆိုခြင်းခံခဲ့ရပြီး ယနေ့နောက်ဆုံးထား၍ ခုခံချေပရမည်ဖြစ်သည်။

ရှဲလ်ဗီမှာ လီဗာပူးလ်ကစားသမား အီမရီကန်အား တံတောင်ဖြင့် တွတ်ခဲ့ခြင်ဖြစ်ပြီး ထိုအဖြစ်အပျက်ကို ပွဲတာဝန်ရှိသူများက မမြင်ခဲ့သော်လည်း ပွဲဗီဒီယိုကို ပြန်လည်ကြည့်ရှုပြီးနောက် FA က ယခုကဲ့သို့ တရားစွဲဆိုခဲ့ခြင်းဖြစ်သည်။