ဒီဇင်ဘာ ၁၅ ၊ ၂၀၁၄
M-Media
– ပရီးမီးယားလိဂ် ပွဲစဉ် ၁၆ ကို စနေနေ့မှာ ၆ ပွဲကစားခဲ့ပြီး တနင်္ဂနွေနေ့မှာ ၃ ပွဲကစားခဲ့ပါတယ်။ စနေနေ့ပွဲမှာတော့ ဆောက်သက်တမ် လေးပွဲဆက်ရှုံးခဲ့ပြီး ချယ်ဆီး၊ အာဆင်နယ်၊ မန်စီးတီးတို့ အသီးသီးအနိုင်ရခဲ့ပါတယ်။ တနင်္ဂနွေနေ့ပွဲမှာတော့ ဗန်ဂါးလ်ရဲ့မန်ယူက လီဗာပူးလ်ကို နှိပ်ကွပ်နိုင်ခဲ့ပြီး စပါးတို့လည်း နောက်ဆုံးမိနစ်ဂိုးနဲ့ အဝေးကွင်းမှာ အနိုင်ရခဲ့ပါတယ်။
ပြီးခဲ့တဲ့တစ်ပတ်က ချယ်ဆီးကို ပထမဆုံး ရှုံးပွဲတွေ့စေခဲ့တဲ့ နယူးကာဆယ်တို့ ဒီတစ်ပတ်မှာတော့ အာဆင်နယ်ကို မရှုမလှ အရေးနိမ့်ခဲ့ရပါတယ်။ ချန်ပီယံလိဂ်မှာရတဲ့ ပုံစံကောင်းကို ပရီးမီးယားလိဂ်ကို ယူလာနိုင်တဲ့ အာဆင်နယ်အတွက် ပွဲအစ ၁၅ မိနစ်မှာပဲ ဂျရူးက ဦးဆောင်ဂိုး သွင်းပေးခဲ့တာပါ။ နောက်ပိုင်းမှာလည်း အာဆင်နယ်ပဲ အသာရခဲ့ပြီး ၅၈ မိနစ်မှာ ဂျရူးက နောက်ထပ်တစ်ဂိုး ၅၄ မိနစ်နဲ့ ၈၈ မိနစ်တို့မှာ ပင်နယ်တီတစ်လုံးအပါအ၀င် ကာဇိုလာက ၂ ဂိုးသွင်းပေးခဲ့တာကြောင့် အိမ်ကွင်းမှာ မျက်နှာပန်းလှခဲ့ပြီး နယူးကာဆယ်ကတော့ ၆၃ မိနစ်မှာမှ နှစ်သိမ့်ဂိုး ၁ ဂိုး ရခဲ့ပါတယ်။
ဒီတစ်ပတ်ရဲ့ Match of the Week ဖြစ်တဲ့ မန်ယူနဲ့ လီဗာပူးလ်တို့ရဲ့ ပွဲစဉ်မှာတော့ မန်ယူဂိုးသမား ဒေးဗစ်ဂီယာရဲ့ အကောင်းဆုံး လက်စွမ်းပြမှုနဲ့အတူ မန်ယူတို့ ပြီးခဲ့တဲ့နှစ် ၃ ဂိုးပြတ်ရှုံးကြွေးကို ပြန်ဆပ်နိုင်ခဲ့ပါတယ်။ ပွဲအစပိုင်းမှာ လီဗာပူးလ်တို့ အကောင်းဆုံး တိုက်စစ်ဆင်နိုင်ခဲ့ပြီး ဂိုးသွင်းခွင့် ၃ ကြိမ်လောက် ရခဲ့ပါတယ်။ ဒါပေမယ့် ဒေးဗစ်ဂီယာ ကောင်းလွန်းနေတာကြောင့် ဂိုးမရခဲ့ပါဘူး။ နောက်ပိုင်းမှာ ကစားကွင်းပိုင်းအရ မန်ယူက အသာရခဲ့ပြီး အနိုင်ဂိုး ၃ ဂိုးစလုံးကိုလည်း အခက်အခဲမရှိ သွင်းနိုင်ခဲ့ပါတယ်။
ဂိုးတွေကိုတော့ ရူနီ၊ မာတာနဲ့ ဗန်ပါစီတို့က သွင်းပေးခဲ့တာပါ။ ရူနီရဲ့ဒီဂိုးဟာ နောက်ဆုံး ၈ ပွဲမှာ ၉ ဂိုးမြောက် သွင်းယူနိုင်တာလည်း ဖြစ်ပါတယ်။
ပြီးခဲ့တစ်ပတ်က ခြေချော်ခဲ့တဲ့ချယ်ဆီး ဒီတစ်ပတ် အိမ်ကွင်းမှာ အမှားအယွင်းမရှိခဲ့ပါဘူး။ ပွဲအစ ၇ မိနစ်မှာပဲ ဟဇာ့ဒ်က ဦးဆောင်ဂိုးသွင်းပေးခဲ့ပြီး ၆၈ မိနစ်မှာ ဒီယေဂိုကော်စတာက ဒုတိယဂိုး ထပ်သွင်းပေးခဲ့ပါတယ်။ နောက်ဆုံး ၉ ပွဲမှာ နိုင်ပွဲမရှိသေးတဲ့ ဟားလ်စီးတီးကတော့ တန်းဆင်းဇုံထဲမှာပဲ တစ်ဝဲလည်လည် ဖြစ်နေပါတယ်။
အဝေးကွင်းမှာ လမ်းပတ်ရဲ့ တစ်လုံးတည်းသောဂိုးနဲ့ အနိုင်ရတဲ့ မန်စီးတီးကတော့ ပြိုင်ပွဲအားလုံးမှာ ၇ ပွဲဆက်တိုက် အနိုင်ရခဲ့တာဖြစ်ပါတယ်။ ဒီဂိုးဟာ မန်စီးတီးအတွက် လမ်းပတ်ရဲ့ ၆ ဂိုးမြောက်ဖြစ်ပြီး ကစားသမားဘ၀တစ်လျှောက် စုစုပေါင်း ၁၇၅ ဂိုးနဲ့ ပရီးမီးယားလိဂ် ဂိုးအများဆုံးစာရင်းမှာ အာဆင်နယ်တိုက်စစ်မှူးဟောင်း ဟင်နရီနဲ့အတူ နံပါတ် ၄ နေရာမှာ ရှိနေပါတယ်။
ရာသီအစ ပုံစံကောင်းပြပြီး အဆင့် ၂ နေရာအထိ တက်လှမ်းခဲ့တဲ့ ဆောက်သက်တမ်တို့ကတော့ ပွဲစဉ် ၁၃ ကတည်းက တောက်လျှောက်ရှုံးခဲ့ပြီး မနေ့က ကစားခဲ့တဲ့ ပွဲမှာလည်း ဇယားအောက်နားက ဘန်လေကို ၁ ဂိုး ဂိုးမရှိနဲ့ ရှုံးခဲ့ပါတယ်။ ဘန်လေအတွက် အနိုင်ဂိုးကိုတော့ အက်ရှက်လေဘန်းစ်က သွင်းပေးခဲ့တာဖြစ်ပြီး အိမ်ကွင်းလေးပွဲဆက် မရှုံးတဲ့ စံချိန်လည်း ဘန်လေတို့ ရရှိခဲ့ပါတယ်။
ပွဲစဉ် ၁၆ အပြီးမှာတော့ ထိပ်ဆုံးလေးနေရာမှာ ချယ်ဆီး၊ မန်စီးတီး၊ မန်ယူ၊ ၀က်စ်ဟမ်း တို့ရှိနေပြီး အာဆင်နယ်ကတော့ အဆင့် ၆ နေရာမှာရှိနေကာ အဆင့် ၄ နဲ့ ၂ မှတ်သာ ကွာပါတော့တယ်။ လီဗာပူးလ်ကတော့ အဆင့် ၁၀ ရောက်သွားခဲ့ပြီး ဘန်လေကတော့ အောက်ဆုံး ၃ သင်းကနေ ရုန်းထွက်နိုင်ခဲ့ပါတယ်။
ဒီတစ်ပတ် ပရီးမီးယားလိဂ် ရလဒ်များကတော့ အောက်ပါအတိုင်း ဖြစ်ပါတယ်။
ဘန်လေ ၁-၀ ဆောက်သက်တမ်
ချယ်ဆီး ၂-၀ ဟားလ်စီးတီး
ခရစ္စတယ်ပဲလေ့စ် ၁-၁ စတုတ်
လက်စတာ ၀-၁ မန်စီးတီး
ဆန်းဒါးလန်း ၁-၁ ၀က်စ်ဟမ်း
ဝက်စ်ဘရွန်း ၁-၀ အက်စတွန်ဗီလာ
အာဆင်နယ် ၄-၁ နယူးကာဆယ်
မန်ယူ ၃-၀ လီဗာပူးလ်
ဆွမ်ဆီး ၁-၂ စပါး
