Tag: russia

ဒီဇင်ဘာ ၁၄၊ ၂၀၂၀
M-Media

-ရုရှားဟာ အသံထက် ၈ ဆ မြန်တဲ့ ဒုံးကျည်ကို မနေ့က ပင်လယ်ဖြူအတွင်းမှာ အောင်မြင်စွာ စမ်းသပ်နိုင်ခဲ့ပြီး ဒါဟာ ရေတပ်အင်အားရဲ့ ချိန်ခွင်လျှာကို အပြောင်းအလဲ ဖြစ်စေလိမ့်မယ်လို့ ရုရှားရေတပ်က ပြောကြားခဲ့ပါတယ်။

Zircon လို့ အမည်​ပေးထားတဲ့ အဲဒီဒုံးကျည်ကို Admiral Gorshkov စစ်သင်္ဘောကနေ ပစ်လွှတ်ခဲ့ပြီး ကီလိုမီတာ ၃၅၀ အကွာမှာရှိတဲ့ ကမ်းခြေက ပစ်မှတ်ကို ​ထိအောင်ပစ်နိုင်ခဲ့ပါတယ်။ အရင်နှစ်ကြိမ်က ရေပြင်ပစ်မှတ်တွေနဲ့သာ စမ်းသပ်ခဲ့တာဖြစ်ပြီး အခုတစ်ကြိမ်ဟာ ပထမဆုံး ​ကုန်းပေါ်က ပစ်မှတ်ကို ပစ်ခဲ့တာပါ။

ရုရှားသမ္မတ ဗလာဒီမီရ်ပူတင်ရဲ့ ၂၀၁၉ ခုနှစ်က ပြောကြားမှုမှာ Zircon ဒုံးကျည်ဟာ အသံထက် ၉ ဆမြန်တဲ့ Mach 9 အမြန်နှုန်းနဲ့ ပစ်နိုင်တယ်လို့ ပြောကြားခဲ့ပါတယ်။ ဒါဟာ ကီလိုမီတာ ၁၀၀၀ အကွာအဝေးထိ ပစ်နိုင်တဲ့ မြန်နှုန်းပါ။

Zircon ဟာ ရေပြင်ကနေပစ်တဲ့ ခရုဇ်ဒုံးကျည်အမျိုးအစားမှာ ကမ္ဘာ့ပထမဆုံး အသံထက်မြန်တဲ့ဒုံးကျည် ဖြစ်ပြီး လာမယ့်နှစ်ကျရင် ရုရှားရေတပ်မှာ တပ်ဆင်အသုံးပြုမှာ ဖြစ်ပါတယ်။

စနေနေ့တုန်းကလည်း ရုရှားဟာ Bulava ဒုံးကျည်ကို နျူကလီးယားစွမ်းအင်သုံး ရေငုပ်သင်္ဘောကနေ အောင်မြင်စွာ ပစ်လွှတ်နိုင်ခဲ့ပါတယ်။ Bulava ကို နောက်ဆုံးပေါ် Borel-class ရေငုပ်သင်္ဘောမှာ တပ်ဆင်အသုံးပြုဖို့ ထုတ်လုပ်ထားတာဖြစ်ပြီး ဒီရေငုပ်သင်္ဘောဟာ Bulava ဒုံးကျည် ၁၆ လုံး တပ်ဆင်ထားနိုင်ပါတယ်။

Ref: RT

နိုဝင်ဘာ ၇၊ ၂၀၂၀
M-Media

-သမ္မတတွေ ရာထူးမရှိတော့တဲ့ချိန်မှာ နောက်ကြောင်းပြန်အရေးယူမှုကို တားမြစ်ပိတ်ပင်တဲ့ ဥပဒေမူကြမ်းတစ်ခုကို ရုရှားလွှတ်တော်အမတ်တွေက တင်သွင်းလိုက်ပါတယ်။

လက်ရှိဥပဒေအရ သမ္မတတွေဟာ တာဝန်ထမ်းဆောင်တဲ့ သက်တမ်းအတွင်းမှာသာ အရေးယူခံရမှုကနေ ကင်းလွတ်ခွင့်ရတာပါ။ အခုဥပဒေသစ်ကြောင့် ရာထူးကနေ အနားယူပြီး အသက်သေဆုံးချိန်အထိ ရာဇဝတ်ကြောင်းအရ နောက်ကြောင်းပြန်အရေးယူခံရမှုကနေ ကင်းလွတ်ခွင့် ရတော့မှာ ဖြစ်ပါတယ်။

နိုင်ငံတော်သစ္စာဖောက်မှုနဲ့ အခြား ကြီးလေးတဲ့ရာဇဝတ်မှုတွေအတွက် ​လွှတ်တော်နှစ်ရပ်ရဲ့ ထောက်ခံမှု ၃ ပုံ ၂ ပုံရမယ်ဆိုရင် ကင်းလွတ်ခွင့်ကို ပယ်ဖျက်နိုင်တယ်ဆိုတဲ့ အချက်လည်း ဥပဒေသစ်မှာ ပါဝင်ပါတယ်။

သမ္မတပူတင်ရဲ့ အခြေခံဥပဒေ ပြုပြင်ပြောင်းလဲရေးကို ပြီးခဲ့တဲ့နွေရာသီမှာ ပြည်လုံးကျွတ်ဆန္ဒခံယူပွဲနဲ့ ရုရှားက အတည်ပြုနိုင်ခဲ့ပါတယ်။ ဒီပြုပြင်ပြောင်းလဲရေးကြောင့် ပူတင်ဟာ ၂၀၃၆ အခုနှစ်အထိ သမ္မတာဝန် ထမ်းဆောင်ခွင့်ရသွားခဲ့ပါတယ်။

သမ္မတဟောင်းတွေကို နောက်ကြောင်းပြန်အရေးမယူရေး၊ အထက်လွှတ်တော်မှာ သမ္မတဟောင်းတွေအတွက် နေရာတစ်နေရာ ထားရှိရေး စတဲ့အချက်တွေလည်း ဒီပြုပြင်ပြောင်းလဲရေးမှာ ပါဝင်ပါတယ်။

အခုတင်သွင်းတဲ့ ဥပဒေမူကြမ်းကို အထက်လွှတ်တော်နဲ့ အောက်လွှတ်တော်တို့က အတည်ပြုပြီးတဲ့နောက် သမ္မတက လက်မှတ်ရေးထိုးမှာ ဖြစ်ပါတယ်။

လက်ရှိသမ္မတပူတင်ဟာ ၂၀၀၀ ခုနှစ်ကတည်းက ရုရှားနိုင်ငံကို အုပ်စိုးလာခဲ့တာဖြစ်ပါတယ်။

Ref: The Moscow Times

အောက်တိုဘာ ၈၊ ၂၀၂၀
M-Media

-​ အသံထက်မြန်တဲ့ သင်္ဘောဖျက် ခရုဇ်ဒုံးကျည်တစ်မျိုးကို အောင်မြင်စွာ စမ်းသပ်ပစ်လွှတ်နိုင်ခဲ့တယ်လို့ ရုရှားက ထုတ်ပြန်ကြေငြာလိုက်ပြီး သမ္မပူတင်ကလည်း တိုင်းပြည်အတွက် ကြီးကျယ်တဲ့ အောင်မြင်မှုတစ်ခု လို့ ပြောကြားလိုက်ပါတယ်။

Tsirkon လို့အမည်ပေးထားတဲ့ အဲဒီဒုံးကျည်ကို အင်္ဂါနေ့မှာ ပင်လယ်ဖြူမှာရှိတဲ့ Gorshkov ဖရီးဂိတ်ရေယာဉ်ကနေ စမ်းသပ်ပစ်လွှတ်ခဲ့တာဖြစ်ပြီး အသံထက် ၈ ဆမြန်တဲ့ အရှိန်နဲ့သွားကာ မိုင် ၂၈၀ အကွာမှာရှိတဲ့ ပစ်မှတ်ကို ​အတိအကျ ထိမှန်ခဲ့တယ်လို့ ဆိုပါတယ်။

သမ္မတပူတင်က ဒီလက်နက်ဟာ ကမ္ဘာမှာ ပထမဆုံးဖြစ်ပြီး စစ်တပ်အတွက်သာမက ရုရှားတစ်နိုင်ငံလုံးအတွက် ကြီးကျယ်တဲ့ အောင်မြင်မှုဖြစ်ကြောင်း၊ တိုင်းပြည်ရဲ့ ကာကွယ်ရေးအင်အားကို ရေရှည်မှာ ပိုမိုတောင့်တင်းစေမယ်ဆိုတာ သေချာကြောင်း ပြေကြားခဲ့ပါတယ်။

ရုရှားကာကွယ်ရေးဝန်ကြီးဌာနက​တော့ Tsirkon ဒုံးကျည်တွေကို တိုက်ရေယာဉ်တွေနဲ့ ရေငုပ်သင်္ဘောတွေမှာ တပ်ဆင်အသုံးပြုသွားမယ်လို့ ပြောကြားခဲ့ပါတယ်။

အသံထက် ၉ ဆမြန်ပြီး မိုင် ၆၂၀ လောက်​အထိရောက်မယ့် လက်နက်တစ်မျိုးကို မကြာခင် ထုတ်ပြမယ်လို့ ပူတင်က ၂၀၁၉ ခုနှစ် ဖေဖော်ဝါရီလမှာ ပြောခဲ့ပါတယ်။ ရုရှားဟာ လက်ရှိ ဒုံးကျည်ကာကွယ်ရေးစနစ်တွေကို ဖောက်ထွက်နိုင်မယ့် လက်နက်သစ်တစ်ချို့ကို တီထွင်ထုတ်လုပ်နေတယ်လို့လည်း ဆိုပါတယ်။

Ref: Aljazeera