ဒီဇင်ဘာ ၂၈၊ ၂၀၁၉
M-Media
– တစ်နှစ်ကျော်ကြာ စမ်းသပ်မှုတွေပြုလုပ်ပြီးတဲ့နောက် အသံထက်မြန်တဲ့ တိုက်ချင်းပစ် ဒုံးကျည်စနစ်သစ် Avangard ကို ရုရှားက မနေ့မှာ တပ်ဖြန့်ချထားလိုက်ပါတယ်။
အသံထက် ၂၇ ဆမြန်တဲ့ အဲဒီဒုံးကျည်စနစ်ကို နိုင်ငံတောင်ပိုင်း အူရယ်တောင်တန်းတွေရှိရာ အိုရန်ဘာ့ဂ်ဒေသမှာ ချထားခဲ့တာပါ။ ဒီလို တပ်ဖြန့်ချထားမှုကို ရုရှားကာကွယ်ရေးဝန်ကြီး ဆာဂျီရှီဂူက သမ္မတပူတင်ထံ မနေ့မှာ အကြောင်းကြားခဲ့ပါတယ်။
ဒုံးကျည်စနစ်သစ်ဟာ စစ်တပ်နဲ့ အိုရန်ဘာ့ဂ်ဒေသ တစ်ခုလုံးအတွက် သမိုင်းမှတ်တိုင်သစ် တစ်ခုဖြစ်တယ်လို့ က ဆာဂျီရှီဂူက သတင်းစာရှင်းလင်းပွဲမှာ ပြောကြားခဲ့ပါတယ်။
Avangard ဒုံးကျည်စနစ် အပါအဝင် အနာဂတ်အတွက်ရည်ရွယ်တဲ့ စစ်လက်နက် ပစ္စည်းတွေကို ရုရှားသမ္မတ ပူတင်က ၂၀၁၈ ခုနှစ် မတ်လမှာ ပြုလုပ်တဲ့ နိုင်ငံတော်အခြေပြမိန့်ခွန်းမှာ မိတ်ဆက်ခဲ့တာပါ။
ပူတင်က Avangard စနစ်ဟာ လက်ရှိ ကမ္ဘာပေါ်မှာ အသုံးပြုနေတဲ့ ဒုံးခွင်းစနစ်တွေကို အသက်မဲ့စေမှာဖြစ်ကြောင်း၊ ၁၉၅၇ ခုနှစ်က ရုရှားရဲ့ ကမ္ဘာ့ပထမဆုံးဂြိုဟ်တု လွှတ်တင်မှုလို နည်းပညာပိုင်းဆိုင်ရာအရ ဖောက်ထွက်မှုတစ်ခုဖြစ်ကြောင်း ထည့်သွင်းပြောဆိုခဲ့ပါတယ်။
အသံထက်မြန်တဲ့ ဒုံးကျည်စနစ်ကို တရုတ်ကလည်း ဖန်တီးထုတ်လုပ်နေပါတယ်။
Ref: Aljazeera
