Tag: SaudiArabia

စက်တင်ဘာ ၂၊ ၂၀၂၁
M-Media

-ဆော်ဒီအာရေဗျရဲ့ ပထမဆုံး စစ်သမီးတွေဟာ မနေ့က အမျိုးသမီးစစ်သင်တန်းကျောင်းကနေ အောင်မြင်စွာ သင်တန်းဆင်းခဲ့ပြီ ဖြစ်ပါတယ်။

သင်တန်းဆင်းပွဲအခမ်းအနားကို စစ်ဦးစီးအရာရှိချုပ် ဖေယဒ် အလ်-၇ူဝေလီအပါအဝင် စစ်ဖက် ထိပ်တန်းပုဂ္ဂိုလ်တွေ တက်ရောက်ခဲ့ကြပါတယ်။

ဆော်ဒီစစ်တပ်ရဲ့ ပညာရေးနဲ့ လေ့ကျင့်သင်ကြားမှုဆိုင်ရာ အကြီးအကဲ ​ဗိုလ်ချုပ် အဒဲလ် အလ်-ဘာလာဝီက အမျိုးသမီးစစ်သည်တွေကို နိုင်ငံကာ စံချိန်စံညွှန်းနဲ့အညီ သင်ရိုးရေးဆွဲကာ စစ်ပညာ၊ ကာကွယ်ရေးနဲ့ပတ်သက်တဲ့ ပညာရပ်တွေကို သင်ကြားပေးခဲ့ကြောင်း၊ အနာဂတ် စစ်တပ်ရဲ့ ရည်မှန်းချက် ရည်ရွယ်ချက် အောင်မြင်ရေးမှာ အမျိုးသမီးတွေရဲ့ စွမ်းဆောင်ရည်က အထောက်အကူပေးနိုင်မှာဖြစ်ကြောင်း ပြောကြားခဲ့ပါတယ်။

တိုင်းပြည်ရဲ့ စီးပွားရေးနဲ့ လူမှုရေးမှာ ပြုပြင်ပြောင်းလဲမှုတွေ လုပ်ဆောင်နေတဲ့ ဆော်ဒီအာရေဗျဟာ အမျိုးသမီးတွေနဲ့ပတ်သက်ပြီး နိုင်ငံအတွင်းရှိနေတဲ့ ရှေးရိုးစွဲအမြင်တွေ၊ ကန့်သတ်မှုတွေ ပယ်ဖျက်တာကိုလည်း လုပ်ဆောင်နေပါတယ်။

နှစ်ပေါင်းများစွာ ရှိလာတဲ့ အမျိုးသမီးကားမောင်းခွင့် ပိတ်ပင်ထားမှုကို ၂၀၁၈ ခုနှစ်မှာ ပယ်ဖျက်ခဲ့သလို၊ အမျိုးသားအုပ်ထိန်းသူပါမှ ခရီးသွားခွင့်ရှိတဲ့ ကန့်သတ်ချက်ကိုလည်း ၂၀၁၇ ခုနှစ်မှာ ပယ်ဖျက်ခဲ့ပါတယ်။

နိုင်ငံစစ်တပ်မှာ အမျိုးသမီးတွေ စစ်မှုထမ်းခွင့်ကို အခုနှစ်အစောပိုင်းကစတင်ပြီး ခွင်ပြုခဲ့ပါတယ်။ အသက် ၂၁ နှစ်ကနေ ၄၀ အရွယ်အတွင်းရှိတဲ့ အမျိုးသမီးတွေဟာ ဆော်ဒီကြည်းတပ်၊ ရေတပ်၊ လေတပ်၊ ဒုံးကျည်တပ်နဲ့ လေကြောင်းရန်ကာကွယ်ရေးတပ်ဖွဲ့တွေမှာ တာဝန်ထမ်းဆောင်နိုင်မှာ ဖြစ်ပါတယ်။

Ref: Al Arabiya

ဩဂုတ် ၂၃၊ ၂၀၂၁

M-Media 

– ပြည်ပသွင်းကုန် လျှော့ချရေးနဲ့ ပြည်တွင်းကုန်ထုတ်လုပ်မှု တိုးတက်ရေး ရည်ရွယ်တဲ့ Made in Saudi စီမံကိန်းမှာ စာရင်းသွင်းထားတဲ့ ကုမ္ပဏီပေါင်း ၉၀၀ ကျော်ရှိတယ်လို့ ဆော်ဒီအာရေဗျ ပို့ကုန် ဖွံ့ဖြိုးတိုးတက်ရေး အာဏာပိုင်အဖွဲ့ (SEDA) က ပြောပါတယ်။ 

Made in Saudi စီမံကိန်းကို အခုနှစ် မတ်လက စတင်ခဲ့ပြီး အီလက်ထရောနစ်၊ ဆောက်လုပ်ရေးပစ္စည်း၊ ဓာတုဗေဒပစ္စည်း အပါအဝင် လုပ်ငန်းကဏ္ဍပေါင်း ၁၆ ခုပါဝင်ကာ နောက်ပိုင်းမှာ အခြားကဏ္ဍတွေကိုလည်း တိုးချဲ့ဖို့ ရှိနေပါတယ်။ 

လက်ရှိ စာရင်းသွင်းထားတဲ့ ကုမ္ပဏီ ၉၀၀ ကျော်ဟာ ကုန်ပစ္စည်းပေါင်း နှစ်ထောင်ကျော်ကို ထုတ်လုပ်မှာဖြစ်ပါတယ်။ 

နိုင်ငံစီးပွားရေး ရေနံအပေါ်မှီခိုနေရမှုကို လျှော့ချရေးနဲ့ နယ်ပယ်စုံ ဖွံ့ဖြိုးတိုးတက်ရေးအတွက် ဆော်ဒီဟာ ၂၀၃၀ စီမံကိန်း ထားရှိဆောင်ရွက်နေတာ ဖြစ်ပါတယ်။ အဲဒီစီမံကိန်းထဲမှာ ကုန်ထုတ်လုပ်ငန်းတိုးမြှင့်ပြီး ပြည်တွင်းမှာသာမက ပြည်ပကိုပါတင်ပို့နိုင်ရေး ဆောင်ရွက်ဖို့လည်း ပါဝင်ပါတယ်။ 

Made in Saud စီမံကိန်းကို ဆော်ဒီအစိုးရက ထိထိရောက်ရောက် ပံ့ပိုးကူညီပေးပြီး ၂၀၃၀ ရောက်ရင် ပြည်တွင်း ကုတ်ထုတ်မှုလုပ်ငန်းဟာ နိုင်ငံ GDP ရဲ့ ၆၅ ရာခိုင်နှုန်းရှိရေး၊ ရေနံမဟုတ်တဲ့ ကုန်ပစ္စည်းတင်ပို့မှု ၅၀ ရာခိုင်နှုန်းအထိ ရှိရေး ရည်မှန်းထားတာ ဖြစ်ပါတယ်။ 

Ref: Saudi Gazette