Tag: SaudiArabia

မတ် ၃၀၊ ၂၀၂၀
M-Media

-နိုင်ငံအတွင်း ကိုရိုနာဗိုင်းရပ်စ် ကူးစက်နေသူတွေကို နိုင်ငံသား၊ နိုင်ငံခြားသားမရွေး အခမဲ့ ပြုစုကုသပေးဖို့အတွက် ဆော်ဒီဘုရင် ဆလ်မန် ဘင် အဘ်ဒူလ်အဇစ်က ကျန်းမာရေးဝန်ကြီးဌာနကို ဒီကနေ့မှာ အမိန့်ပေးလိုက်ပါတယ်။

နိုင်ငံခြားသားတွေထဲမှာ တရားဝင်နေထိုင်သူဖြစ်စေ၊ တရား၀င်မဟုတ်သူဖြစ်စေ ကုသပေးဖို့လည်း ပါဝင်တယ်လို့ ကျန်းမာရေးဝန်ကြီး သောင်ဖစ်က် အလ်-ရာဘီယာက ပြောကြားခဲ့ပါတယ်။ ဆော်ဒီအာရေဗျမှာ နိုင်ငံသားအားလုံးအတွက် ကျန်းမာရေးစောင့်ရှောက်မှုဟာ အခမဲ့ဖြစ်ပြီး ဘုရင်ဆလ်မန်ရဲ့ ဒီအမိန့်ကြောင့် ကိုရိုနာဗိုင်းရပ်စ်ကူးစက်နေတဲ့ နိုင်ငံခြားသားတွေပါ အခမဲ့ ကုသနိုင်မှာ ဖြစ်ပါတယ်။

ဝန်ကြီး အလ်-ရာဘီယာက ​ရောဂါလက္ခဏာ ပြသနေသူတွေအနေနဲ့ နီးစပ်ရာ​ ဆေးရုံဆေးခန်းတွေမှာ လာရောက်ပြသဖို့လည်း တိုက်တွန်းခဲ့ပါတယ်။ ဆော်ဒီအာရေဗျဟာ အရည်အသွေးမြင့် ကျန်းမာရေးစောင့်ရှောက်မှုပေးနိုင်တဲ့ ထိပ်တန်း နိုင်ငံ ၃၀ ထဲမှာ ပါဝင်ပါတယ်။

လက်ရှိ ဆော်ဒီမှာ COVID-19 ကူးစက်သူအရေအတွက်ဟာ ၁၄၅၃ ဦး ရှိပြီး သေဆုံးသူက ၈ ဦးရှိပါတယ်။ ပြန်ကောင်းလာသူကတော့ စုစုပေါင်း ၁၁၅ ဦး ရှိပါတယ်။ ဆော်ဒီအစိုးရဟာ နိုင်ငံတစ်ဝှမ်း လှုပ်ရှားသွားလာမှုကန့်သတ်တဲ့ အမိန့်လည်း ထုတ်ပြန်ထားပါတယ်။

Ref: Alarabiya

မတ် ၁၆၊ ၂၀၂၀
M-Media

-လာဘ်ပေးလာဘ်ယူမှု၊ အာဏာအလွဲသုံးစား လုပ်မှုတွေနဲ့​ အစိုးရဝန်ထမ်း ၃၀၀ နီးပါးကို ဆော်ဒီက ဖမ်းဆီးလိုက်ပြီး အဲဒီအထဲမှာ စစ်ဖက် ထိပ်တန်းအရာရှိတွေလည်း ပါဝင်ပါတယ်။

ဆော်ဒီအမျိုးသား ခြစားမှုတိုက်ဖျက်ရေးကော်မရှင် (​Nazaha) ရဲ့ မနေ့ကညပိုင်း ထုတ်ပြန်ချက်မှာ ဆော်ဒီရီယဲလ် ၃၇၉ သန်း (ဒေါ်လာ ၁၀၁ သန်း) တန်ဖိုးရှိတဲ့ ခြစားမှု၊ ငွေကြေးခဝါချမှု၊ အာဏာအလွဲသုံးစား လုပ်မှုတွေအတွက် လူ ၂၉၈ ဦးကို ဖမ်းဆီးထိန်းသိမ်းထားပြီး ရာဇဝတ်မှုတွေနဲ့ တရားစွဲဆိုသွားမယ်လို့ ဖော်ပြထားပါတယ်။

အိမ်ရှေ့မင်းသား မိုဟာမက် ဘင် ဆလ်မန် ဦးဆောင်တဲ့ Nazaha ဟာ ၂၀၁၇ ခုနှစ်တုန်းကလည်း ခြစားမှုတိုက်ဖျက်ရေးခေါင်းစဉ်နဲ့ တော်၀င်အသိုင်းအဝိုင်းက မင်းသားတွေ၊ စီးပွားရေးလုပ်ငန်းရှင်တွေကို ဖမ်းဆီးထိန်းသိမ်းခဲ့ဖူးပါတယ်။ အဲဒီဖမ်းဆီးမှုအတွင်း အချို့က အလွဲသုံးစား လုပ်ထားတာတွေကို ပြန်လျော်ပေးဖို့ သဘောတူတဲ့အတွက် လွှတ်ပေးခဲ့ပြီး တစ်ချို့ကိုတော့ တရားစွဲဆိုခဲ့တယ်လို့ ထုတ်ပြန်ပါတယ်။

ဒါပေမယ့် ဒါဟာ အိမ်ရှေ့မင်းသား အာဏာကို စုစည်းနိုင်အောင် လုပ်ဆောင်မှုတစ်ခုဖြစ်တယ်လို့ နောက်ပိုင်းမှာ ဝေဖန်မှုတွေ ပေါ်ထွက်ခဲ့ပါတယ်။

အခုဖမ်းဆီးမှုအတွင်း ဗိုလ်မှူး ၃ ဦး၊ ဗိုလ်ချုပ် ၁ ဦးနဲ့ ဗိုလ်မှူးချုပ်တစ်ဦး အပါအဝင် စစ်ဖက်က အရာရှိ ၈ ဦး၊ တရားသူကြီး ၂ ဦး၊ မြို့တော်ရီယာ့ဒ်က Almaarefa တက္ကသိုလ် တာဝန်ရှိသူ ၉ ဦး ပါဝင်တယ်လို့ ဆိုပါတယ်။ Nazaha ဟာ နာမည်တွေ ထုတ်မပြောခဲ့သလို အသေးစိတ်အချက်အလက်တွေကိုလည်း မထုတ်ပြန်ခဲ့ပါဘူး။

အိမ်ရှေ့မင်းသား မိုဟာမက် ဘင် ဆလ်မန်ဟာ အခုလအစောပိုင်းမှာ ဘုရင် ဆလ်မန်ရဲ့ညီ အဟ်မဒ် ဘင် အဘ်ဒူလ် အဇစ်၊ အိမ်ရှေ့မင်းသားဟောင်း မိုဟာမက် ဘင် နာယက်ဖ်တို့အပါအဝင် တော်ဝင်အသိုင်းအဝိုင်းက ဩဇာရှိသူတစ်ချို့ကို ဖမ်းဆီးခဲ့တယ်လို့ အနောက်တိုင်း မီဒီယာတွေက ဖော်ပြပါတယ်။ ဒီကိစ္စနဲ့ပတ်သက်လို့ ဆော်ဒီအစိုးရက တရားဝင်ထုတ်ပြန်တာမျိုး မရှိပါဘူး။

အိမ်ရှေ့မင်းသားဟာ လာမယ့်နိုဝင်ဘာ G20 ထိပ်သီးအစည်းအဝေးမတိုင်ခင် ဘုရင်ဖြစ်လိုတဲ့ ရည်ရွယ်ချက်ရှိတယ်လို့လည်း မီဒီယာတစ်ချို့က ဖော်ပြခဲ့ကြပါတယ်။

Ref: Aljazeera