ဇွန် ၁၄၊ ၂၀၁၇
M-Media
– အစ္စလာမ်ဘာသာဝင်ထို့ အထွဋ်အမြတ်ထားသည့် ကအ်ဗာကျောင်းတော်တည်ရှိရာ မက္ကာမြို့ရှိ မတ်စ်ဂျစ်ဒ်ဟရမ် ဗလီဝတ်ကျောင်းသို့ လာရောက်မှုတွင် မည်သည့်မွတ်စလင်ကိုမှ တားဆီးခြင်းမရှိဟု မက္ကာအုပ်ချုပ်ရေးမှူး မင်းသား ခါလစ် အလ်-ဖိုင်ဆဲလ်က ယနေ့တွင် ပြောကြားလိုက်သည်။
ခါလစ် အလ်-ဖိုင်ဆဲလ်မှာ မက္ကာနှင့် မဒီနာရှိ မြင့်မြတ်သော ဗလီဝတ်ကျောင်းတော် ၂ လုံးအား ထိန်းသိမ်းစောင့်ရှောက်မှုအဖွဲ့၏ အကြံပေးလည်းဖြစ်ပြီး ဆော်ဒီနှင့် သံတမန်ရေးအရ ပြဿနာ ဖြစ်ပွားနေသည့် ကာတာနိုင်ငံမှ နိုင်ငံသားများအား မတ်စ်ဂျစ်ဒ်ဟရမ်သို့ ၀င်ရောက်ခွင့်မပေးဆိုသည့် သတင်းများကို တုန့်ပြန်လိုက်ခြင်းလည်းဖြစ်သည်။
ကာတာ အမျိုးသားလူ့အခွင့်အရေးကော်မရှင်က မိမိတို့နိုင်ငံသားများ မတ်စ်ဂျစ်ဒ်ဟရမ် ဗလီဝတ်ကျောင်းတော်သို့ ၀င်ရောက်သည့်အခါ ဆော်ဒီအာဏာပိုင်များက တားမြစ်မှုများ ပြုလုပ်သည်ဟု တိုင်ကြားချက်ရရှိကြောင်း ပြီးခဲ့သည့်သီတင်းပတ်တွင် ဖွင့်ဟခဲ့သည်။
အုပ်ချုပ်ရေးမှူးက မြင့်မြတ်သော ဗလီဝတ်ကျောင်းတော်သို့ လာရောက်သည့် မည်သူ့ကိုမဆို လိုအပ်သည့် ၀န်ဆောင်မှုများ ပေးအပ်သွားမည်ဖြစ်ကြောင်း၊ ယခု ရမ်ဇာန်ဥပုသ်လတွင် မတ်စ်ဂျစ်ဒ်ဟရမ် ဗလီဝတ်ကျောင်းတော်သို့ လာရောက်သူ ၂.၅ သန်းဝန်းကျင်ရှိကြောင်း ပြောကြားခဲ့သည်။
ထို့ပြင် ဗလီဝတ်ကျောင်းတော် လုံခြုံရေးအတွက် ဆောင်ရွက်ပေးနေကြသော အသင်းအဖွဲ့များ၊ ၀န်ထမ်းများကို ကျေးဇူးတင်သည်ဟု ခါလစ် အလ်-ဖိုင်ဆဲလ်က ထည့်သွင်းပြောဆိုခဲ့သည်။
Ref: Alarabiya
