Tag: SriLanka

စက်တင်ဘာ ၂၃၊ ၂၀၂၄
M-Media

-တနင်္ဂနွေ့နေ့က ပြီးဆုံးခဲ့ပြီဖြစ်တဲ့ သီရိလင်္ကာ သမ္မတရွေးကောက်ပွဲမှာ မာ့စ်၀ါဒယိမ်းတဲ့ နိုင်ငံရေးသမား အနူရာ ကူမာရာ ဒီဆာနာယာကီက အနိုင်ရရှိသွားပါတယ်။

အနူရာဟာ အသက် ၅၅ နှစ်အရွယ်ရှိပြီး ပြည်သူ့လွတ်မြောက်ရေးပါတီ (JVP) နဲ့ ပြည်သူ့အင်အား မဟာမိတ်တပ်ပေါင်းစု (NPP) ရဲ့ ခေါင်းဆောင်လည်းဖြစ်ပါတယ်။

ပထမအကြိမ် ရွေးကောက်ပွဲမှာ သမ္မတလောင်းတွေ မဲရရှိမှု ၅၀ ရာခိုင်နှုန်း မကျော်တဲ့အတွက် ဒုတိအကြိမ် မဲပြန်ရေခဲ့ရပြီး ဒါဟာ နိုင်ငံ့သမိုင်းမှာ ပထမဆုံးဖြစ်ပါတယ်။ အနူရာက မဲအရေအတွက် ၄၂ ဒဿမ ၃၁ ရာခိုင်နှုန်း ရခဲ့ပြီး အတိုက်အခံခေါင်းဆောင် ဆာဂျစ် ပရီ မာဒါဆာက ၃၂ ဒဿမ ၇၆ ရာခိုင်နှုန်း ရရှိခဲ့ပါတယ်။

လက်ရှိသမ္မတ ရာနီလ် ၀စ်ကရီမီဆင်ဟီက ၁၇ ဒဿမ ၂၇ ရာခိုင်နှုန်းသာ ရရှိခဲ့ပါတယ်။ သီရိလင်္ကာဟာ ၂၀၂၂ ခုနှစ်မှာ စီးပွားရေး ပြိုလဲခဲ့ပြီး ဒီဒဏ်ကို အခုအချိန်အထိ ခံစားနေရဆဲပါ။ သမ္မတသစ် ကူမာရာရဲ့ အဓိက စိန်ခေါ်မှုဟာ စီးပွားရေး ဦးမော့လာအောင် ပြန်လည်လုပ်ဆောင်ဖို့ ဖြစ်ပါတယ်။

Ref: Reuters

နို၀င်ဘာ ၃၊ ၂၀၂၂

M-Media 

• 

-သီရိလင်္ကာနိုင်ငံမှာ အစိုးရဆန့်ကျင်ရေး လူထုဆန္ဒပြမှုတွေ တစ်ကျော့ပြန် ဖြစ်လာပါတယ်။ 

မနေ့က ရာနဲ့ချီတဲ့လူတွေဟာ မြို့တော်ကိုလံဘိုမှာ စု၀ေးပြီး ဆန္ဒထုတ်ဖော်ခဲ့ကြတာပါ။ အစိုးရက အခွန်မြှင့်ဖို့ စီစဥ်နေတာ၊ ငွေကြေးဖောင်းပွမှု မြင့်လာတာ၊ လူထုအပေါ် ဖိနှိပ်မှု တိုးလုပ်လာတာတွေကို ဆန့်ကျင်ခဲ့ကြတာ ဖြစ်ပါတယ်။ 

ဆန္ဒပြပွဲကို အတိုက်အခံနိုင်ငံရေးသမားတွက ဦးဆောင်ပြုလုပ်တာဖြစ်ပြီး အရပ်ဖက်အဖွဲ့တွေ၊ အလုပ်သမားသမဂ္ဂတွေနဲ့ ပြည်သူတွေ ပါ၀င်ခဲ့ကြပါတယ်။ 

အစိုးရရဲတပ်ဖွဲ့က ဆန္ဒပြသူတွေကို ပိတ်ဆို့လူစုခွဲမှု ပြုလုပ်ခဲ့ပါတယ်။ 

နိုင်ငံရေးကို ဆယ်စုနှစ်ချီ ကြီးစိုးထားတဲ့ ရာဂျာပက်ဆာ မိသားစုကြောင့် သီရိလင်္ကာဟာ လွတ်လပ်ရေးရပြီးနောက်ပိုင်း အဆိုးရွားဆုံး စီးပွားရေးအကြပ်အတည်းကို ပြီးခဲ့တဲ့နှစ်ကစပြီး ကြုံတွေ့ခဲ့ရပါတယ်။ လူထုဆန္ဒပြမှုကြောင့် ရာဂျာပက်ဆာမိသားစုလည်း ဇူလိုင်လမှာ ထွက်ပြေးခဲ့ရပါတယ်။ 

အဲ့ဒီနောက်ပိုင်း ၀န်ကြီးချုပ်ဟောင်း ရာနီလ် ၀စ်ကရီမီဆင်ဟီက သမ္မတဖြစ်လာပေမယ့် အစိုးရဟောင်းရဲ့ ပေါ်လစီအတိုင်းသာ ဆက်သွားနေတဲ့အတွက် လူထုက မကျေမနပ် ဖြစ်လာတာပါ။ 

နို၀င်ဘာ ၁၄ ရက်နေ့မှာ သီရိလင်္ကာအစိုးရက လာမယ့်နှစ်အတွက် ဘက်ဂျက်ထုတ်ပြန်ဖို့ရှိနေပြီး လူထုကတော့ ဒါကို စောင့်ကြည့်နေပါတယ်။

Ref: Reuters

စက်တင်ဘာ ၃၊ ၂၀၂၂
M-Media

-ပြည်သူလူထုရဲ့ ဆန္ဒပြမှုကြောင့် တိုင်းပြည်ကနေ ထွက်ပြေးသွားရတဲ့ သီရိလင်္ကာသမ္မတ ဂိုတာဘာယာ ရာဂျာပက်ဆာဟာ ဒီကနေ့မနက်ပိုင်းမှာ တိုင်းပြည်ကို ပြန်ရောက်လာပါတယ်။

သီရိလင်္ကာအစိုးရ ၀န်ကြီးတစ်ချို့ ဂိုတာဘာယာကို သွားကြိုခဲ့တယ်လို့လည်း သတင်းထွက်ပါတယ်။

ရာဂျာပက်ဆာမိသားစုဟာ တိုင်းပြည်ကို ၁၀ စုနှစ်ချီ အုပ်စိုးခဲ့ပြီး၊ မူ၀ါဒအမှားတွေ၊ ခြစားမှုတွေ၊ ဖိနှိပ်ချုပ်ခြယ်မှုတွေကြောင့် သီရိလင်္ကာဟာ လွတ်လပ်ရေးရပြီးနောက်ပိုင်း အဆိုးရွားဆုံး စီးပွားရေး အကြပ်အတည်းကို ရင်ဆိုင်ခဲ့ပြီး ဒေ၀ါလီ ခံခဲ့ရပါတယ်။

ပြည်သူလူထုကလည်း အာဏာချုပ်ကိုင်ထားတဲ့ ရာဂျာပက်ဆာ မိသားစုကို အကြီးအကျယ် ဆန္ဒပြခဲ့ပြီး ၀န်ကြီးချုပ်နဲ့ သမ္မတနေအိမ်တွေကို ၀င်ရောက်စီးနင်းတဲ့အထိ လုပ်ဆောင်ခဲ့ပါတယ်။

ဂိုတာဘာယာဟာ ဇူလိုင်လက စစ်လေယာဥ်နဲ့ မော်လ်ဒိုက်ကို ထွက်ပြေးခဲ့ပြီး အဲဒီကမှ စင်ကာပူ၊ အဲဒီနောက် ထိုင်းကို သွားရောက်ခိုလှုံခဲ့တာပါ။ ဒီကနေ့မနက်မှာတော့ စင်ကာပူလေကြောင်းလိုင်းနဲ့ ကိုလံဘိုကို ပြန်ရောက်လာတာ ဖြစ်ပါတယ်။

လက်ရှိသီရိလင်္ကာသမ္မတ ၀စ်ကရီမီဆင်ဟီဟာ ဂိုတာဘာယာရဲ့ မဟာမိတ်ဖြစ်ပြီး ကိုလံဘိုမှာ ဂိုတာဘာယာနေထိုင်ဖို့ အိမ်တစ်လုံး စီစဥ်ပေးထားပါတယ်။

ဂိုတာဘာယာ ဒီလို မြန်မြန်ဆန်ဆန် ပြန်ရောက်လာမယ်လို့ သီရိလင်္ကာ နိုင်ငံရေးအသိုင်းအ၀ိုင်းက မျှော်လင့်မထားခဲ့ပါဘူး။ နိုင်ငံရေးမှာ ဂိုတာဘာယာနဲ့ သူ့ရဲ့ မိသားစု ပြန်လည်ပါ၀င်လာမလားဆိုတာ ရှင်းရှင်းလင်းလင်း မသိရသေးဘဲ လူထုရဲ့ ဆန့်ကျင်မှုတွေ မြင့်တက်လာနိုင်တယ်လို့ နိုင်ငံရေးသုတေသီတွေက သုံးသပ်ပါတယ်။

Ref: BBC

သြဂုတ် ၂၃၊ ၂၀၂၂
M-Media

-ပြည်သူလူထုရဲ့ ဆန့်ကျင်မှုကြောင့် တိုင်းပြည်ကနေ ထွက်ပြေးသွားတဲ့ သီရိလင်္ကာသမ္မတ ဂိုတာဘာယာ ရာဂျာပက်ဆာဟာ စက်တင်ဘာမှာ ပြည်တော်ပြန်ဖို့ ရှိတယ်လို့ နီးစပ်သူတွေက ရိုက်တာသတင်းဌာနကို ပြောကြားခဲ့ပါတယ်။

ဂိုတာဘာယာနဲ့ သူ့ရဲ့အစ်ကို ၀န်ကြီးချုပ် မာဟင်ဒါ ရာဂျာပက်ဆာတို့ရဲ့ မူ၀ါဒ အလွဲတွေကြောင့် သီရိလင်္ကာဟာ လွတ်လပ်ရေးရပြီးနောက်ပိုင်း အဆိုးရွားဆုံး စီးပွားရေးအကြပ်အတည်းနဲ့ ကြုံတွေ့ခဲ့ရပါတယ်။

ပြည်သူလူထုရဲ့ အကြီးအကျယ် ဆန္ဒပြမှုကြောင့် ဂိုတာဘာယာဟာ ဇူလိုင်လ ၁၃ ရက်နေ့က မိသားစုနဲ့အတူ တိုင်းပြည်ကနေ ထွက်ပြေးခဲ့ပါတယ်။

လက်ရှိ ထိုင်းနိုင်ငံမှာ ခိုလှုံနေပြီး စာရိတ်ထောင်းတာက ဂိုတာဘာယာတစ်ယောက် သီရိလင်္ကာကို ပြန်ရတဲ့ အကြောင်းအရင်းတစ်ရပ်ဖြစ်တယ်လို့ သတင်းရင်းမြစ်တစ်ခုက ဆိုပါတယ်။

အခုတစ်ပတ် ဗုဒ္ဓဟူးနေ့မှာ ပြန်လာမယ်လို့ သီရိလင်္ကာ ပြည်တွင်းမီဒီယာတွေက ရေးပေမယ့် သူ့ရဲ့ လုံခြုံရေးနဲ့ အခြားကိစ္စရပ်တွေအတွက် အာဏာရပါတီ SLPP နဲ့ အစိုးရတို့အကြား ဆွေးနွေးညှိနှိုင်းမှုတွေ မပြီးပြတ်သေးတာကြောင့် စက်တင်ဘာမှ ပြန်လာဖွယ် ရှိနေပါတယ်။

တိုင်းပြည်ကနေ ထွက်ပြေးပြီးနောက်ပိုင်း စင်ကာပူ၊ ထိုင်းတို့မှာ နေထိုင်၊ သုံးစွဲနေတဲ့ ဂိုတာဘာယာမိသားစုရဲ့ ကုန်ကျစားရိတ်ဟာ ရူပီး သန်းရာချီ ရှိနေတယ်လို့ နီးစပ်သူတွေက ပြောပါတယ်။

အာဏာရ SLPP ပါတီက ဂိုတာဘာယာ ပြန်လာရေးအတွက် လက်ရှိ၀န်ကြီးချုပ် ရာနီလ် ၀စ်ကရီမီဆင်ဟီနဲ့ ဆွေးနွေးညှိနှိုင်းနေတယ်လို့ အတည်ပြုပါတယ်။

ပြီးခဲ့တဲ့တစ်ပတ် ရိုက်တာသတင်းဌာနနဲ့ အင်တာဗျူးမှာ ရာနီလ်က ဂိုတာဘာယာ ပြန်လာမလားဆိုတာ မသိသေးဘဲ ပြန်လာရင် ဥပဒေရ အရေးယူမှုတွေ ရှိလာနိုင်တယ်လို့ ပြောကြားခဲ့ပါတယ်။

Ref: Reuters

ဇူလိုင် ၂၀၊ ၂၀၂၂
M-Media

-ပြည်သူလူထုက နှုတ်ထွက်ဖို့ တောင်းဆိုခဲ့တဲ့ သီရိလင်္ကာ ၀န်ကြီးချုပ် ရာနီလ် ၀စ်ကရီမီဆင်ဟီဟာ ဒီကနေ့မှာ သမ္မတသစ် ဖြစ်လာပါတယ်။

လွှတ်တော်မဲခွဲရာမှာ ထောက်ခံမဲ ၁၃၄ မဲနဲ့ ပြိုင်ဘက်ကို ၅၁ မဲကွာပြီး အရွေးခံလိုက်ရတာပါ။ သမ္မတ ဂိုတာဘာယာ ရာဂျာပက်ဆာ တိုင်းပြည်က ထွက်ပြေးသွားပြီးတဲ့နောက် ရာနီလ်က ယာယီသမ္မအဖြစ် ဆောင်ရွက်ခဲ့တာ ဖြစ်ပါတယ်။

ရာနီလ်ဟာ ဂိုတာဘာယာရဲ့ မဟာမိတ်ဖြစ်ပြီး ပြည်သူလူထုက နှုတ်ထွက်ခိုင်းတဲ့သူတွေထဲမှာ ပါ၀င်သူလည်း ဖြစ်ပါတယ်။ ပြီးခဲ့တဲ့တစ်ပတ် သမ္မတအိမ်တော်ကို လူထုရဲ့ စီးနင်းမှုမှာ ရာနီလ်ရဲ့အိမ်ကိုလည်း ပြည်သူတွေက ၀င်စီးကာ မီးရှို့ခဲ့ပါတယ်။

ရာနီလ် သမ္မတသစ်ဖြစ်လာတဲ့အတွက် စိတ်ပျက်ကြောင်း ပြည်သူလူထုက ဆိုရှယ်မီဒီယာတွေမှာ ပေါ်ပေါ်ထင်ထင်ပဲ ရေးသားလာကြပါတယ်။

ရာနီလ်ဟာ ၂၀၂၄ ခုနှစ် နို၀င်ဘာအထိ သမ္မတတာ၀န် ထမ်းဆောင်ရမှာ ဖြစ်ပါတယ်။

Ref: BBC