Tag: Syria

မေ ၁၂၊ ၂၀၂၀
M-Media

-ပြီးခဲ့တဲ့နှစ်အတွင်း ဆီးရီးယားနိုင်ငံ အနောက်မြောက်ပိုင်းမှာ အာဆတ်အစိုးရတပ်တွေနဲ့ ရုရှားတပ်တွေရဲ့ လုပ်ရပ်တွေဟာ စစ်ရာဇဝတ်မှု မြောက်နေတယ်လို့ နိုင်ငံတကာ လူ့အခွင့်အရေးအဖွဲ့ Amnesty International က ပြောကြားလိုက်ပါတယ်။

AI အဖွဲ့ရဲ့ မနေ့က ထုတ်ပြန်ချက်ထဲမှာ အာဆတ်အစိုးရတပ်နဲ့ ရုရှားတပ်တွေဟာ ၂၀၁၉ ခုနှစ် မေလ ၅ ရက်နေ့ကနေ ၂၀၂၀ ခုနှစ် ဖေဖော်ဝါရီလ ၂၅ ရက်အတွင်း လက်နက်ကိုင်၊ အရပ်သား မခွဲခြားဘဲ တိုက်ခိုက်တာ၊ စာသင်ကျောင်းတွေ၊ ဆေးရုံတွေကို အနည်းဆုံး ၁၈ ကြိမ်လောက် ပစ်မှတ်ထား တိုက်ခိုက်တာတွေကို ဖော်ပြထားပါတယ်။

“မှတ်တမ်းတင်ထားနိုင်တဲ့ အထောက်အထားတွေအရ ဆီးရီးယားအစိုးရတပ်နဲ့ ရုရှားတပ်တွေရဲ့ တိုက်ခိုက်မှုတွေဟာ နိုင်ငံတကာ လူသားချင်း စာနာထောက်ထားမှုဆိုင်ရာ ဥပဒေကို ဆိုးဆိုးရွားရွားနဲ့ အကြီးအကျယ် ချိုးဖောက်နေတယ် ဆိုတာကို ပြသနေပါတယ်” လို့ အစီရင်ခံစာက ဆိုပါတယ်။

ဆီးရီးယားမှာ အာဆတ်အစိုးရတပ်နဲ့ လက်နက်ကိုင်သူပုန်တွေအကြား ပြည်တွင်းစစ် ဖြစ်ပွားနေတာ ၁၀ နှစ်ရှိလာပြီး သေဆုံးသူ ၄ သိန်းကျော်ကာ သန်းနဲ့ချီ အိုးအိမ်စွန်ခွာ ထွက်ပြေးခဲ့ရပါတယ်။

၃၉ မျက်နှာ ပါဝင်တဲ့ AI အဖွဲ့ရဲ့ အစီရင်ခံစာဟာ တိုက်ခိုက်မှုဒဏ်ကို တိုက်ရိုက်ခံစားခဲ့ရသူတွေ၊ အိုးအိမ်စွန့်ခွာ ထွက်ပြေးရသူတွေ၊ နိုင်ငံတကာ အကူအညီပေးရေးလုပ်သားတွေနဲ့ ကုလဝန်ထမ်းတွေ စုစုပေါင်း ၇၉ ဦးကို တွေ့ဆုံမေးမြန်းကာ ရေးသားထားတာ ဖြစ်ပါတယ်။

အရပ်ဖက်ပစ်မှတ်တွေအပါအဝင် တိုက်ခိုက်မှုတွေမှာ ဆီးရီးယားအစိုးရတပ်ဟာ တားမြစ်လက်နက်တွေ အသုံးပြုတယ်လို့ အစီရင်ခံစာမှာ ဖော်ပြခဲ့ပြီး၊ အိုးအိမ်စွန့်ခွာ ထွက်ပြေးရသူတွေကြားထဲမှာ ရှိနေတဲ့ လူသားချင်းစာနာထောက်ထားမှုဆိုင်ရာ ပြဿနာတွေကိုလည်း ထောက်ပြထားပါတယ်။

Ref: Aljazeera

မတ် ၁၉၊ ၂၀၂၀
M-Media

-ဆီးရီးယားက စစ်ရှောင်ဒုက္ခသည် အသက် ၃ နှစ်အရွယ် အလန်ကာဒီလေးနဲ့ မိသားစု ရေနစ်သေဆုံးမှုမှာ တာဝန်ရှိသူ ၃ ဦးကို တူရကီက ထောင်ဒဏ် ၁၂၅ နှစ်စီ ချမှတ်လိုက်ပါတယ်။

၂၀၁၅ ခုနှစ်က ကာဒီအပါအဝင် ကလေးငယ် ၈ ဦးနဲ့ စုစုပေါင်း လူ ၁၄ ယောက်ပါဝင်တဲ့ ဆီးရီးယားဒုက္ခသည်အုပ်စုတစ်ခုဟာ ဂရိနိုင်ငံကကျွန်းတွေဆီသွားဖို့ အေဂျီယန်ပင်လယ်ကို အဖြတ်မှာ လှေမှောက်ခဲ့ပြီး လှေပေါ်မှာပါလာသူအများစု သေဆုံးခဲ့ပါတယ်။ ကာဒီလေးရဲ့ အသက်မဲ့ခန္ဓာကိုယ် တူရကီကမ်းခြေတစ်ခုပေါ်မှာ သွားတင်နေတဲ့ပုံရိပ်ဟာ ကမ္ဘာလူထုကို တုန်လှုပ်စေခဲ့ပြီး ဆီးရီးယားဒုက္ခသည်တွေ ရင်ဆိုင်နေရတဲ့ ဒုက္ခ၊ သုက္ခကိုလည်း ကမ္ဘာက အာရုံစိုက်လာစေခဲ့ပါတယ်။

ဒီလူကုန်ကူးမှုမှာပါဝင်တဲ့ ဂိုဏ်းခေါင်းဆောင်ကို ပြီးခဲ့တဲ့သီတင်းပတ် အစောပိုင်းက တူရကီနိုင်ငံတောင်ပိုင်းမှာ ဖမ်းဆီးနိုင်ခဲ့ပြီး သူနဲ့အတူ အပေါင်းအပါ ၃ ဦးကို တရားရုံးက ထောင်ဒဏ် ၁၂၅ နှစ်စီ ချမှတ်ခဲ့ပါတယ်။ လူကုန်ကူးမှုမှာ ပါဝင်ခဲ့တဲ့ အခြား တူရကီနဲ့ ဆီးရီးယားနိုင်ငံသားတွေလည်း ထောင်ဒဏ်တွေ ချမှတ်ခြင်း ခံခဲ့ရပါတယ်။

လှေမှောက်မှုအတွင်း ကာဒီရဲ့မိခင် ရီဟန်၊ အသက် ၅ နှစ်အရွယ် အစ်ကိုဖြစ်သူ ဂါလစ်တို့လည်း သေဆုံးခဲ့ပြီး ဖခင်ဖြစ်သူ အဘ်ဒူလာတစ်ဦးတည်းသာ အသက်ရှင်သန်ခဲ့ပါတယ်။ အဘ်ဒူလာဟာ မိသားစုဝင်တွေရဲ့ ရုပ်ကလပ်တွေကို ဆီးရီးယားနိုင်ငံဆီ ပြန်လည်သယ်ဆောင်ကာ သင်္ဂြိုဟ်ခဲ့ပါတယ်။

၂၀၁၁ ခုနှစ်က စတင်ခဲ့တဲ့ ဆီးရီးယားပြည်တွင်းစစ်ကြောင့် ဆီးရီးယားပြည်သူ ၆.၇ သန်းလောက်ဟာ နိုင်ငံကနေ ထွက်ပြေးကာ အိမ်နီးချင်းနိုင်ငံတွေမှာ ဒုက္ခသည်တွေအဖြစ် နေထိုင်နေရပါတယ်။ ဥရောပကို ထွက်ပြေးခိုလှုံကြသူတွေလည်းရှိပြီး ဒုတိယကမ္ဘာစစ်နောက်ပိုင်း အကြီးမားဆုံး ဒုက္ခသည်ပြဿနာလည်း ဖြစ်ပါတယ်။

Ref: Middle East Monitor