News @ M-Media

Tag: thailand

  • လေကြောင်းခရီးသွားနယ်ပယ်တွင် ကမ္ဘာ့ထိပ်တန်းဖြစ်ရန် ရည်မှန်းနေသည့် ထိုင်းနိုင်ငံ၏ ၂၀၃၀ စီမံကိန်း

    လေကြောင်းခရီးသွားနယ်ပယ်တွင် ကမ္ဘာ့ထိပ်တန်းဖြစ်ရန် ရည်မှန်းနေသည့် ထိုင်းနိုင်ငံ၏ ၂၀၃၀ စီမံကိန်း

    ဖေဖော်၀ါရီ ၂၅၊ ၂၀၂၃ 

    M-Media 


    – ထိုင်းနိုင်ငံရဲ့ စီးပွားရေးကို ပိုမိုမောင်းနှင်ပေးနိုင်မယ့် ဘက်စုံဖွဲ့ဖြိုးရေး စီမိန်းတစ်ခုကို ၀န်ကြီးချုပ် ဆရက်သာ သာဗီဆင်က ပြီးခဲ့တဲ့တစ်ပတ် လွှတ်တော်မှာ တင်ပြခဲ့ပါတယ်။ 

    Thailand Vision 2030 လို့ အမည်ပေးထားပြီး စီးပွားရေးကဏ္ဍ ၈ ခု တိုးတက်အောင် အဓိကထား ဆောင်ရွက်သွားမှာဖြစ်ပြီး။ အဲဒီစီမံကိန်းမှာ လေကြောင်းခရီးသွားနယ်ပယ်က ပထမဦးစားပေးဖြစ်ပါတယ်။ 

    သု၀ဏ္ဏဘူမိလေဆိပ်အပါအ၀င် နိုင်ငံအတွင်းက နိုင်ငံတကာ လေဆိပ် ၆ ကို အဆင့်မြှင့်တင်သွားမှာဖြစ်ပြီး ဥရောပနဲ့ အာရှ၊ အာရှနဲ့ မြောက်အမေရိက ချိတ်ဆက်မှုမှာ ထိုင်းနိုင်ငံဟာ အဓိက အချက်အခြာ နေရာတစ်ခု ဖြစ်လာရေး ဆောင်ရွက်မှာဖြစ်ပါတယ်။ 

    သု၀ဏ္ဏဘူမိ လေဆိပ်က ပြေးလမ်းအသစ် နံပါတ် ၃ ကို ပြီးခဲ့တဲ့နှစ်က ဖွင့်လှစ်နိုင်ခဲ့ပြီး၊ ချင်းမိုင်လေဆိပ်ဟာလည်း ၂၄ နာရီ ၀န်ဆောင်မှုပေးနိုင်တဲ့ လေဆိပ်တစ်ခု ဖြစ်လာပါတယ်။ 

    လာမယ့်နှစ်အနည်းငယ်အတွင်း ဘတ် ဘီလီယံ ၁၀၀ လောက် ရင်းနှီးကာ ခရီးသွား လေကြောင်းကဏ္ဍကို ထိုင်းနိုင်ငံက မြှင့်တင်မှာဖြစ်ပါတယ်။ 

    မြောက်အမေရိက၊ ဥရောပနဲ့ အာရှကို ချိတ်ဆက်မှုမှာ စင်ကာပူက ချန်ဂီလေဆိပ်ထက်စာရင် ဘန်ကောက်မှာရှိတဲ့ သု၀ဏ္ဏဘူမိလေဆိပ်ဟာ ခရီလမ်းကြောင်းပိုတိုပါတယ်။ 

    ဒီလို အားသာချက်တွေက ဆရက်သာရဲ့ စီမံကိန်း အောင်မြင်အောင် ဆောင်ရွက်ဖို့ တွန်းအား ဖြစ်လာလိမ့်လို့ ကျွမ်းကျင်သူတွေက သုံးသပ်ပါတယ်။ 

    တစ်ချိန်က နာမည်ရှိခဲ့တဲ့ THAI Airways လေကြောင်းလိုင်းကို ပြုပြင်ပြောင်းလဲမှုတွေ လုပ်ဆောင်ဖို့လည်း ပညာရှင်တွေက တိုက်တွန်းထားပါတယ်။ 

    ထိုင်းလေကြောင်းလုပ်ငန်းမှာ အဓိကပြဿနာ နောက်တစ်ခုက လက်မှတ်စျေးတွေ မတည်ငြိမ်တာပါ။ ၀ယ်လိုအားကိုလိုက်ပြီး လက်မှတ်စျေးတက်တာ ဖြစ်ပေမယ့် ထိုင်းအစိုးရက လက်မှတ်စျေးနှုန်းနဲ့ပတ်သက်ပြီး တိကျတဲ့ စည်းကမ်းသတ်မှတ်ချက်တွေ ချမှတ်ထားတာမျိုး မရှိပါဘူး။ 

    အာရှရဲ့ အချက်အချာလေဆိပ်အဖြစ် ဟောင်ကောင်ကိုကျော်ဖို့ ချန်ဂီလေဆိပ်ဟာ ဆယ်စုနှစ်ချီ ကြာခဲ့ပါတယ်။ လာမယ့် ၆ နှစ်အတွင်း ထိုင်းနိုင်ငံဟာ ဒီလိုအနေအထားမျိုး ရောက်ဖို့ မဖြစ်နိုင်ပေမယ့် စီမံကိန်းကြောင့် တိုးတက်မှု အများအပြား မြင်လာရလိမ့်မယ်လို့ ကျွမ်းကျင်သူတွေက သုံးသပ်ပါတယ်။ 

    Ref: Bangkok Post 

  • မိမိကိုယ် သတ်သေမှု စံချိန်တင်မြင့်တက်လာမှုကို တိုက်ဖျက်တော့မယ့် ထိုင်း

    မိမိကိုယ် သတ်သေမှု စံချိန်တင်မြင့်တက်လာမှုကို တိုက်ဖျက်တော့မယ့် ထိုင်း

    ဖေဖော်၀ါရီ ၂၄၊ ၂၀၂၄

    M-Media 


    -ပြီးခဲ့တဲ့နှစ်အတွင်း ထိုင်းနိုင်ငံတစ်၀ှမ်း ကိုယ့်ကိုယ်ကိုယ် သတ်သေဖို့ ကြိုးစားမှု အရေအတွက်ဟာ စံချိန်တင်ပမာဏ ရှိခဲ့ပြီး အစိုးရက ဒီအခြေအနေကို တိုက်ဖျက်ဖို့ ဖိဖိစီးစီး လုပ်ဆောင်လာပါတယ်။ 

    ထိုင်းအစိုးရ ကျန်းမာရေး၀န်ကြီးဌာန လက်အောက်မှာ ရှိတဲ့ စိတ်ကျန်းမာရေးဦးစီးဌာနဟာ မိမိကိုယ်ကိုသတ်သေမှု တားဆီးဖို့အတွက် ၂၀၂၀ လောက်ကတည်းက ဖွဲ့စည်းထားတဲ့ Hope Task Force အဖွဲ့ကို မြို့ကြီးတွေက ပြည်နယ်တွေအထိ နိုင်ငံတစ်၀ှမ်း ဖြန့်ကျက် ဆောင်ရွက်နိုင်ဖို့ စီစဥ်နေပါတယ်။ 

    ဒီအဖွဲ့ဟာ မိမိကိုယ် သတ်သေနိုင်တဲ့ အခြေအနေ ရှိတဲ့သူတွေကို ရှာဖွေဖော်ထုတ်ပြီး အကူအညီပေးတာ၊ ကုသပေးတာ၊ သက်ဆိုင််တဲ့ အသင်းအဖွဲ့တွေဆီလွှဲပြောင်းပေးတာ စတာတွေကို လုပ်ဆောင်ပေးမှာဖြစ်ပါတယ်။ 

    Hope Task Force အဖွဲ့ကို စိတ်ကျန်းမာရေးဦးစီးဌာန၊ ထိုင်းရဲတပ်ဖွဲ့၊ ရာဇ၀တ်မှု နှိမ်နှင်းရေးအဖွဲ့နဲ့ ဆိုရှယ်မီဒီယာ နာမည်ကျော်တွေ ပူးပေါင်းဖွဲ့အစည်းထားတာ ဖြစ်ပါတယ်။

    ၂၀၂၃ ခုနှစ်အတွင်း ထိုင်းနိုင်ငံမှာ မိမိကိုယ်ကို သတ်သေဖို့ ကြိုးစားခဲ့သူ ၃၁၄၀၂ ဦးရှိခဲ့ပြီး ပျမ်းမျှ လူတစ်သိန်းမှာ ၄၈ လောက်က သတ်သေဖို့ ကြိုးစားနေတာ ဖြစ်ပါတယ်။ 

    ၂၀၂၀ ခုနှစ် အောက်တိုဘာ ၉ ရက်နေ့က ၂၀၂၃ ခုနှစ် ဒီဇင်ဘာ ၃၁ ရက်နေ့အထိ Hope Task Force ဟာ လူပေါင်း ၅၉၉ ဦးကို မိမိကိုယ်ကို သတ်သေမှု အန္တရာယ်ကနေ ကာကွယ်ပေးနိုင်ခဲ့ပါတယ်။ 

    Ref: Bangkok Post

  • မြန်မာဖက်မှ တရားမ၀င် ၀င်လာသူများကို ထိုင်း၀န်ကြီးချုပ် သတိပေး

    မြန်မာဖက်မှ တရားမ၀င် ၀င်လာသူများကို ထိုင်း၀န်ကြီးချုပ် သတိပေး

    ဖေဖော်၀ါရီ ၂၀၊ ၂၀၂၄
    M-Media 

    (ဓာတ်ပုံ – ထိုင်း၀န်ကြီးချုပ် ဆီရက်သာ သာဗီဆင်)

    -ထိုင်းနိုင်ငံထဲ တရားမ၀င်၀င်လာတဲ့ မြန်မာနိုင်ငံသားတွေကို ဥပဒေအရ အရေးယူသွားမယ်လို့ ထိုင်း၀န်ကြီးချုပ် ဆီရက်သာ သာဗီဆင်က ဖေဖော်၀ါရီ ၂၀ ရက်နေ့မှာ သတိပေးလိုက်ပါတယ်။ 

    စစ်မှုထမ်းဥပဒေကို အာဏာသိမ်းစစ်ကောင်စီက အသက်သွင်းပြီးနောက် မြန်မာနိုင်ငံသားတွေ ထိုင်းနိုင်ငံကို ၀င်ရောက်ဖို့ ကြိုးစားမှု မြင့်တက်လာတဲ့အချိန် အခု သတိပေးချက် ထွက်ပေါ်လာတာပါ။ 

    “တရား၀င် ၀င်ရောက်လာတယ်ဆိုရင်တော့ ကျွန်တော်တို့ ကြိုဆိုပါတယ်။ ဒါပေမယ့် တရားမ၀င် ၀င်လာမယ်ဆိုရင် ကျွန်တော်တို့ အရေးယူရလိမ့်မယ်။ လုံခြုံရေးအေဂျင်စီတွေနဲ့ ဒီကိစ္စကို ဆွေးနွေးပြီးပါပြီ” လို့ ဆီရက်သာက ပြောပါတယ်။ 

    စစ်မှုမထမ်းမနေရ ဥပဒေကြောင့် ထိုင်းဘက်၀င်ရောက်လာမှု မြင့်တက်လာတာကို ၀န်ကြီးချုပ်က ထောက်ပြခဲ့ပြီး၊ တရားမ၀င် ၀င်ရောက်လာသူတွေကြောင့် အလုပ်အကိုင်အခွင့်အလမ်း ဆုံးရှုံးမှာကို ထိုင်းပြည်သူတွေ စိုးရိမ်နေတယ်လို့လည်း သူက ဆိုပါတယ်။ 

    ထိုင်းနိုင်ငံမှာ အလုပ်လက်မဲ့နှုန်း ၁ ရာခိုင်နှုန်းအောက်သာ ရှိပြီး ပတ်၀န်းကျင်နိုင်ငံတွေက အလုပ်သမား အများအပြား လိုအပ်နေကြောင်း၊ ဒါပေမယ့် တရား၀င်နည်းလမ်းတွေနဲ့သာ လာရောက်သင့်ကြောင်း ဆီရက်သာက ထည့်သွင်းပြောဆိုခဲ့ပါတယ်။ 

    Ref: Bangkok Post 

  • ထိုင်း၀န်ကြီးချုပ်ဟောင်း ထောင်ဒဏ်မှ လွတ်မြောက်လာ

    ထိုင်း၀န်ကြီးချုပ်ဟောင်း ထောင်ဒဏ်မှ လွတ်မြောက်လာ

    ဖေဖော်၀ါရီ ၁၈၊ ၂၀၂၄

    M-Media 


    -ထောင်ဒဏ်တစ်နှစ် ချမှတ်ခံထားရတဲ့ ထိုင်း၀န်ကြီးချုပ်ဟောင်း သက်ဆင် ရှင်နာ၀ပ်ထရာဟာ ဒီကနေ့မှာ တရား၀င် လွတ်မြောက်လာခဲ့ပါတယ်။

    ရဲဖက်ဆေးရုံကနေ ဆင်းလာတဲ့ သက်ဆင်ကို သမီးဖြစ်သူ ပေတွန်တန် ရှင်နာ၀ပ်ထရာက သွားရောက်ကြိုဆို ခေါ်ဆောင်ခဲ့တာပါ။ ပေတွန်တန်ဟာ စစ်တပ်နဲ့ ပြေလည်တဲ့ အာဏာရ Pheu Thai ပါတီ ခေါင်းဆောင်လည်းဖြစ်ပါတယ်။ 

    ၂၀၀၆ ခုနှစ် စစ်တပ်ရဲ့ အာဏာသိမ်း ဖြုတ်ချမှုကို ခံခဲ့ရပြီးနောက် သက်ဆင်ဟာ ၁၅ နှစ်လောက် ပြည်ပမှာ နေထိုင်ခဲ့ရတာဖြစ်ပါတယ်။ စစ်အစိုးရက သူ့ကို မျက်ကွယ်ထောင်ဒဏ် ၈ နှစ် ချတ်ခဲ့ပြီး မနှစ်က ပြည်တော်ပြန်ချိန်မှာ ဘုရင်ရဲ့ လွတ်ငြိမ်းချမ်းသာခွင့်နဲ့ ထောင်ဒဏ် ၁ နှစ်အထိ လျှော့ချခံခဲ့ရပါတယ်။ 

    ကျန်းမာရေးကြောင့် ရဲဆေးရုံမှာ ဆေးကုမှုခံယူနေစဥ် ၆ လအကြာ ပြီးခဲ့တဲ့တစ်ပတ် ဘုရင်ရဲ့ လွတ်ငြိမ်းချမ်းသာခွင့်စာရင်းမှာ သက်ဆင် ပါ၀င်လာခဲ့တာဖြစ်ပါတယ်။ 

    သက်ဆင် အခုလို လွတ်မြောက်လာမှုဟာ Pheu Thai ပါတီ၊ စစ်တပ်နဲ့ ဘုရင်တို့အကြား နောက်ကွယ်က ညှိနှိုင်းမှုရလဒ် ဖြစ်တယ်လို့ ကျွမ်းကျင်သူတွေက သုံးသပ်ပါတယ်။ 

    Ref: CNA

  • အာဏာသိမ်း စစ်ဗိုလ်ချုပ်တွေနဲ့ ပူးပေါင်းမယ်လို့ ဆိုလာတဲ့ Pheu Thai ပါတီ

    အာဏာသိမ်း စစ်ဗိုလ်ချုပ်တွေနဲ့ ပူးပေါင်းမယ်လို့ ဆိုလာတဲ့ Pheu Thai ပါတီ

    သြဂုတ် ၂၁၊ ၂၀၂၃

    M-Media 


    (ဓာတ်ပုံ – ပါတီခေါင်းဆောင် ပေတွန်တန်(၀ဲ)နှင့် ၀န်ကြီးချုပ်လောင်း ဆရက်သာ)

    – မေလရွေးကောက်ပွဲမှာ ဒုတိယ မဲအများဆုံးရခဲ့တဲ့ Pheu Thai ပါတီက သူတို့ဟာ အခြား နိုင်ငံရေးပါတီ ၁၄ ပါတီနဲ့ မဟာမိတ် ဖွဲ့ထားကြောင်း ဒီကနေ့မှာ ထုတ်ပြန်ပါတယ်။ 

    အဲဒီပါတီတွေထဲမှာ လက်ရှိ၀န်ကြီးချုပ်ဖြစ်တဲ့ အာဏာသိမ်းစစ်ခေါင်းဆောင် ပရာယွတ်ချန်အိုချာနဲ့ နီးစပ်တဲ့ United Thai Nation ပါတီ၊ ဒုတိယ၀န်ကြီးချုပ် စစ်ဗိုလ်ချုပ်ဟောင်း ပရာ၀စ် ၀ွန်ဆူ၀မ်ရဲ့ Palang Pracharat ပါတီတို့လည်း ပါ၀င်ပါတယ်။ 

    ရွေးကောက်ပွဲမှာ Move Forward ပါတီက မဲအများဆုံး ရခဲ့ပေမယ့် ပါတီခေါင်းဆောင် ပီတ ၀န်ကြီးချုပ်အဖြစ် အမည်စာရင်းတင်သွင်းမှုကို စစ်တပ်ထိန်းချုပ်တဲ့ အထက်လွှတ်တော်က လက်မခံတဲ့အတွက် အခုအချိန်အထိ အစိုးရ မဖွဲ့နိုင်သေးပါဘူး။ 

    မဲဒုတိယအများဆုံးရတဲ့ Pheu Thai ပါတီက မျက်နှာသစ် နိုင်ငံရေးသမား အသက် ၆၀ အရွယ် ဆရက်သာ သာဗီဆင်ကို ၀န်ကြီးချုပ်လောင်းအဖြစ် အမည်စာရင်းတင်ထားပြီး အင်္ဂါနေ့မှာ မဲခွဲမှာ ဖြစ်ပါတယ်။ 

    Pheu Thai ပါတီ ဒုတိယခေါင်းဆောင် ဖွမ်သမ် ၀ီချာယာချိုင်က ဆရက်သာကို ပါတီပေါင်း ၁၄ ပါတီက ထောက်ခံထားတယ်လို့ ပြောပါတယ်။

    ၀န်ကြီးချုပ်နေရာအတွက် အထက်လွှတ်တော်၊ အောက်လွှတ်တော် မဲပေးရွေးချယ်ရာမှာ စုစုပေါင်း ထောက်ခံမဲ ၃၇၅ မဲ လိုအပ်ပါတယ်။ ၁၄ ပါတီက ထောက်ခံတယ်လို့ ဆိုတဲ့အတွက် ဆရက်သာဟာ ၃၁၇ မဲ ရမှာဖြစ်ပြီး နောက်ထပ် ၅၈ မဲလိုအပ်နေတာ ဖြစ်ပါတယ်။ 

    ၀န်ကြီးချုပ်အဖြစ် အရွေးခံရရင် Pheu Thai ပါတီက ဦးဆောင်ပြီး အစိုးရဖွဲ့ခွင့် ရရှိမှာပါ။ 

    မဲအများဆုံးရထားတဲ့ Move Forward ပါတီက ဆရက်သာကို ထောက်ခံမှာမဟုတ်ဘဲ ဒီလုပ်ရပ်ဟာ ရွေးကောက်ပွဲရလဒ်နဲ့ ပြည်သူ့ဆန္ဒကို မျက်ကွယ်ပြုတာဖြစ်တယ်လို့ ထုတ်ပြန်ထားပါတယ်။ 

    Pheu Thai ပါတီဟာ ၀န်ကြီးချုပ်ဟောင်းတွေဖြစ်တဲ့ သက်ဆင် ရှင်နာ၀ပ်ထရာ၊ သူ့ရဲ့ညီမ ယင်လပ် ရှင်နာ၀ပ်ထရာတို့ရဲ့ ပါတီဖြစ်ပါတယ်။ လက်ရှိမှာ သက်ဆင်ရဲ့သမီး ပေတွန်တန် ရှင်နာ၀ပ်ထရာက ဦးဆောင်ပါတယ်။ 

    သက်ဆင်နဲ့ ယင်လပ်တို့ နှစ်ယောက်စလုံးကို စစ်တပ်က အာဏာသိမ်း ဖြုတ်ချခဲ့တာ ဖြစ်ပါတယ်။ 


    Ref: Reuters