ဇူလိုင် ၅၊ ၂၀၁၆
M-Media
– ပြီးခဲ့တဲ့တစ်ပတ်က အိုဟိုင်းယိုးပြည်နယ်မှာ ယူအေအီးနိုင်ငံသား စီးပွားရေးလုပ်ငန်းရှင်တစ်ဦးကို IS အဖွဲ့ဝင်ထင်ကာ မှားယွင်းဖမ်းဆီးမိတဲ့အတွက် အမေရိကန်က အာရပ်စော်ဘွားများနိုင်ငံ (UAE) ကို တောင်းပန်လိုက်ပါတယ်။
ဇွန်လ ၂၉ ရက်နေ့မှာဖြစ်ပွားခဲ့တဲ့ အဲဒီအဖြစ်အပျက်မှာ အာရပ်အမျိုးသားဝတ်စုံဝင်ထားတဲ့ အဟ်မဒ် အလ်-မန်ဟာလီဆိုတဲ့ အမျိုးသားတစ်ဦးကို IS အဖွဲ့ဝင်အဖြစ် သံသယ၀င်တဲ့အတွက် ဟိုတယ်စာရေးအဖြစ်လုပ်ကိုင်နေသူ အမျိုးသမီးက အကြောင်းကြားခဲ့ရာကနေ ရဲတွေက ဒီအမျိုးသားကို အင်အားသုံးလှဲချကာ လက်ထိပ်ခတ် ဖမ်းဆီးခဲ့တာဖြစ်ပါတယ်။
အလ်-မန်ဟာလီဟာ ယူအေအီးမှာ လေဖြတ်ဝေဒနာခံစားရပြီးနောက် ဆေးဝါးကုသဖို့ ကလိဗ်လင်းကို ခရီးထွက်လာတာ ဖြစ်ပါတယ်။ အခုလို ဖမ်းဆီးခံရလိုက်ရတာကြောင့် နောက်ထပ်လေသင်တုန်းဝေဒနာတစ်ခု ခံစားရနိုင်တယ်လို့ သူက အမေရိကန် မီဒီယာတစ်ခုကို ပြောကြားခဲ့ပါတယ်။
ခရိုင်ရဲတပ်ဖွဲ့ဝင်တွေကတော့ သူတို့ လူမှားဖမ်းဆီးမိတာကို သိရှိပြီးတဲ့နောက်ပိုင်း အလ်-မန်ဟာလီကို ပြန်လွှတ်ပေးခဲ့ပေမယ့် လွှတ်ပေးပြီး သိပ်မကြာခင်မှာပဲ မြေပြင်ပေါ်လဲကျသွားတာကြောင့် နီးစပ်ရာဆေးရုံကို ပို့ဆောင်ပေးခဲ့ရပါတယ်။
မှားယွင်းစွပ်စွဲခဲ့တဲ့ စာရင်းကိုင်အမျိုးသမီးကိုတော့ တရားစွဲဖို့ တာဝန်ရှိသူများက ဆောင်ရွက်နေပြီး
အေဗွန်မြို့တော်ဝန်နဲ့ ရဲအုပ်တို့ကလည်း စနေနေ့မှာ အလ်-မန်ဟာလီကို တောင်းပန်ခဲ့ပါတယ်။
အဲဒီအဖြစ်အပျက်နဲ့ပတ်သက်ပြီး အမေရိကန်နိုင်ငံခြားရေးဝန်ကြီးဌာနက ထုတ်ပြန်ခဲ့တဲ့ကြေငြာချက်မှာ မိမိတို့အနေနဲ့ ရဲတပ်ဖွဲ့ တာဝန်ရှိသူတစ်ဦးကို ဆင့်ခေါ်ကာ ဖြေရှင်းချက်တောင်းကပြီး အဲဒီတာဝန်ရှိသူကလည်း တောင်းပန်ခဲ့တယ်လို့ ဆိုပါတယ်။
“အမေရိကန်ပြည်ထောင်စုဟာ နိုင်ငံတွေက အမျိုးသားဝတ်စုံတွေ ၀င်ဆင်ခွင့်ကို လေးစားခွင့်ပြုပါတယ်လို့ သူက ပြောကြားခဲ့ပြီး အခုဖြစ်သွားတဲ့ အဖြစ်အပျက်ဟာ လုံးဝ လက်မခံနိုင်တဲ့ အဖြစ်အပျက်မျိုးပဲလို့ ထပ်လောင်း ပြောကြားခဲ့ပါတယ်” လို့ ကြေငြာချက်မှာ ဖော်ပြခဲ့ပါတယ်။
Ref: Presstv
