Tag: UAE

နိုဝင်ဘာ ၈၊ ၂၀၂၀
M-Media

-ပုဂ္ဂလိကလွတ်လပ်ခွင့်နဲ့ပတ်သက်ပြီး တင်းကြပ်ထားတဲ့ ဥပဒေတွေကို ပြင်ဆင်ပြောင်းလဲတော့မယ်လို့ အာရပ်စော်ဘွားများပြည်ထောင်စု (ယူအေအီး) နိုင်ငံက မနေ့မှာ ကြေငြာလိုက်ပြီး နိုင်ငံခြား လုပ်ငန်းရှင်တွေကို စွဲဆောင်ဖို့ဖြစ်တယ်လို့ ဆိုပါတယ်။

လက်မထပ်ဘဲအတူနေတာ၊ အရက်သေစာသောက်စားတာအပါအဝင် တစ်ချို့ ပုဂ္ဂလိကလွတ်လပ်ခွင့်တွေကို ရာဇဝတ်မှုအဖြစ် ယူအေအီးနိုင်ငံက သတ်မှတ်ထားတာ ဖြစ်ပါတယ်။

အသက် ၂၁ နှစ်နဲ့အထက် လူတွေဟာ အရက်သေစာသောက်စားခွင့်၊ လက်ဝယ်ထားခွင့်၊ ရောင်းချခွင့်တွေမှာ သီးသန့်လိုင်စင်လိုအပ်ပြီး မလိုက်နာရင် ဒဏ်ငွေရိုက်တာ၊ ထောင်ချတာတွေ ရှိခဲ့ပါတယ်။ အခု ပြုပြင်ပြောင်းလဲမှုမှာတော့ ဒီကန့်သတ်ချက်တွေကို ဖယ်ရှားမှာပါ။

ဒီလို ပြုပြင်ပြောင်းလဲမှုဟာ နိုင်ငံရဲ့ ဥပဒေပြဌာန်းချက်တွေနဲ့ ရင်းနှီးမြှုပ်နှံမှု နယ်ပယ်ကို ပိုမိုကောင်းမွန် တိုးတက်စေဖို့ဖြစ်တယ်လို့ ယူအေအီးအစိုးရရဲ့ ထုတ်ပြန်ချက်မှာ ဖော်ပြထားပါတယ်။

မိသားစုအရှက်ရအောင်လုပ်တဲ့ အမျိုးသမီးတွေကို အကြီးအကဲအမျိုးသားက ကိုယ်ထိလက်ရောက် ရိုက်နှက်ဆုံးမခွင့်ကို အရင်က ခွင့်ပြုထားပေမယ့် အခုတော့ ဒါကို ရာဇဝတ်မှုအဖြစ် ယူအေအီးက သတ်မှတ်မှာ ဖြစ်ပါတယ်။ ဒါ့အပြင် အမျိုးသမီးတွေကို အရှက်ရအောင်လုပ်တဲ့ အမျိုးသားတွေအတွက် ပြင်ဒဏ်ကိုလည်း ပိုမိုတိုးမြှင့်မှာပါ။

ယူအေအီးဟာ ကမ္ဘာလုံးဆိုင်ရာ ကုန်စည်ပြပွဲ World Expo ကို ၂၀၂၁ ခုနှစ် အောက်တိုဘာကနေ ၂၀၂၂ ခုနှစ်အထိ ကျင်းပဖို့ စီစဉ်ထားပြီး လာရောက်သူ ၂၅ သန်းလောက် ရှိမယ်လို့ မျှော်မှန်းထားပါတယ်။

Ref: Aljazeera

နိုဝင်ဘာ ၆၊ ၂၀၂၀
M-Media

-ကန်ဒေါ်လာ ၂.၉ ဘီလီယံ တန်ဖိုးရှိမယ့် အဆင့်မြင့် လက်နက်တပ် ဒရုန်း ၁၈ စီး အာရပ်စော်ဘွားများပြည်ထောင်စု (ယူအေအီး) ထံ ရောင်းချမယ့်အစီအစဉ်ကို အမေရိကန်အစိုးရက လွှတ်တော်ကို တင်ပြလိုက်ပါတယ်။

မဟာမိတ်နိုင်ငံတွေအပေါ် လက်နက်တွေပိုရောင်းနိုင်အောင် နိုင်ငံပေါင်း ၃၄ နိုင်ငံနဲ့ ချုပ်ဆိုထားတဲ့ စစ်အေးခတ် လက်နက်ရောင်းဝယ်ရေး သဘောတူညီချက်ကို ထရမ့်အစိုးရ လက်ထက်မှာ ပြင်ဆင်ပြီးတဲ့နောက် ပထမဆုံး လက်နက်တပ်ဒရုန်းရောင်းချမှု ဖြစ်လာမှာပါ။

အမေရိကန်ဟာ F-35 အဆင့်မြင့်တိုက်လေယာဉ် ယူအေအီးထံ ရောင်းချဖို့လည်း စီစဉ်ထားပါတယ်။ အမေရိကန်ထံကနေ ဒရုန်းလေယာဉ်တွေဝယ်ယူဖို့ ယူအေအီးက အရင်ကတည်းက စိတ်ဝင်စားခဲ့ပြီး ကန်ရဲ့ ပေါ်လစီ ပြောင်းလဲပြီးတဲ့နောက် ပထမဆုံးဝယ်ယူမယ့် နိုင်ငံတွေစာရင်းမှာလည်း ပါဝင်နေပါတယ်။

ကန်လွှန်တော်ဟာ လက်နက် အဆင်သင့်တပ်ဆင်လို့ရတဲ့ MQ-9B SeaGuardian ဒရုန်းလေစီး ထိုင်ဝမ်နိုင်ငံကိုရောင်းချဖို့ အင်္ဂါနေ့မှာ အတည်ပြုခဲ့ပါတယ်။ စုစုပေါင်းတန်ဖိုး ကန်ဒေါ်လာ သန်း ၆၀၀ ရှိမှာပါ။

ယူအေအီးကဝယ်ယူမယ့် MQ-9B ဒရုန်းဟာ ရေပြင်မှာအသုံးပြုလို့ရမယ့် ရေဒါတပ်ဆင်ထားတဲ့ ဘက်စုံသုံး ဒရုန်းအမျိုးအစား ဖြစ်ပါတယ်။ F/A-18F Super Hornet တိုက်လေယာဉ်ကို အီလက်ထရောနစ် စစ်ပွဲအတွက် ပြင်ဆင်ထားတဲ့ EA-18G Growlers လေယာဉ်တွေကိုလည်း ယူအေအီးက အမေရိကန်ထံကနေ ဝယ်ယူဖို့ ရှိနေပါတယ်။

F-35 တိုက်လေယာဉ် ဝယ်ယူဖို့ ကြိုးစားမှုမှာတော့ အစ္စရေးရဲ့ ကန့်ကွက်မှုကို ယူအေအီးက ကြုံရနိုင်ပါတယ်။ အစ္စရေးအစိုးရက အရှေ့အလယ်ပိုင်းမှာ မိမိတိုကသာ စစ်ရေးအရ အမြဲတမ်းအသာရရေးအတွက် ဒီကိစ္စကို ဆန့်ကျင်သွားမယ်လို့ တရားဝင်ပြောကြားထားပါတယ်။

Ref: Reuters

နိုဝင်ဘာ ၃၊ ၂၀၂၀
M-Media

-မွတ်စလင်တွေအနေနဲ့ ပြင်သစ်သမ္မတ အီမန်နျူယဲလ် မာခရွန်ရဲ့ ရပ်တည်ချက်ကို လက်ခံဖို့ လိုအပ်တယ်လို့ ယူအေအီး နိုင်ငံခြားရေးဝန်ကြီး အန်ဝါရ် ဂါဂက်ရှ်က တိုက်တွန်းလိုက်ပြီး မာခရွန်ဟာ လူ့အဖွဲ့အစည်းအတွင်း ပေါင်းစည်းရေး ဆောင်ရွက်နေတာ ဖြစ်တယ်လို့ ဆိုပါတယ်။

“မာခရွန်ရဲ့မိန့်ခွန်းတွေကို မွတ်စလင်တွေအနေနဲ့ ဂရုတစ်စိုက် နားထောင်ဖို့ လိုအပ်ပါတယ်။ သူက မွတ်စလင်တွေကို ဖယ်ကျဉ်ချင်တာ မဟုတ်ပါဘူး။ သူလုပ်တာက လုံး၀ မှန်ပါတယ်”

အန်ဝါရ် ဂါဂက်ရှ်ကို ဂျာမန်နေ့စဉ်သတင်းစာ Die Welt က တနင်္လာနေ့မှာ အင်တာဗျူးခဲ့တာပါ။ အနောက်နိုင်ငံတွေမှာ မွတ်စလင်တွေဟာ အခုထက်ပိုမိုကောင်းမွန်တဲ့ အနေအထားနဲ့ ပေါင်းစည်းဖို့လိုအပ်တယ်လို့လည်း အန်ဝါရ်က ဆိုပါတယ်။

“အစွန်းရောက်ဝါဒ တိုက်ဖျက်ရေးနဲ့ လူ့အဖွဲ့အစည်း ပေါင်းစည်းရေး တစ်ပြိုင်တည်းလုပ်ဆောင်ရာမှာ နည်းလမ်းရှာဖွေဖို့ ပြင်သစ်မှာ လုပ်ပိုင်ခွင့်ရှိပါတယ်”

ပြင်သစ်က အစ္စလာမ်ဘာသာဝင်လူ့အဖွဲ့အစည်းကြားမှာ ဝင်နေတဲ့ ‘အစွန်းရောက်ဝါဒ’ ကို တိုက်ဖျက်ရမယ်၊ ဘာသာရေးခေါင်းဆောင်တွေကို ရုပ်ပြောင်ရေးဆွဲမှုအပါအဝင် လွတ်လပ်စွာ ဖော်ပြခွင့်ကို ကာကွယ်သွားမယ်ဆိုတဲ့ မာခရွန်ရဲ့ ပြီးခဲ့တဲ့လက မှတ်ချက်တွေကြောင့် ကမ္ဘာတစ်ဝှမ်းက အစ္စလာမ်ဘာသာဝင်တွေဟာ မာခရွန်ကို ဝေဖန်ဆန့်ကျင်တာတွေ လုပ်ခဲ့ပါတယ်။

အာရပ်ကမ္ဘာမှာလည်း ပြင်သစ်ထုတ်ကုန်ပစ္စည်းတွေ သပိတ်မှောက်ရေးလှုပ်ရှားမှု စတင်ခဲ့ပါတယ်။ မာခရွန်က နောက်ပိုင်းမှာ လေသံပျော့သွားခဲ့ပြီး တမန်တော်မိုဟာမက်ကို ရုပ်ပြောင်ရေးဆွဲတဲ့အတွက် မွတ်စလင်တွေ ဒေါသထွက်တာကိုနားလည်ကြောင်း၊ မိမိတစ်ကိုယ်ရေသဘောထားအရ ဒီကိစ္စကို အားမပေးကြောင်း ပြီးခဲ့တဲ့တစ်ပတ် နှောင်းပိုင်းမှာ ပြန်လည် ပြောကြားခဲ့ပါတယ်။

ဒါပေမယ့် တိုင်းပြည်ရဲ့ ဒီမိုကရေစီမူဖြစ်တဲ့ လွတ်လပ်စွာ ရေးသားဖော်ပြခွင့်ကို ဆက်လက်ကာကွယ်သွားမယ်လို့ ဆိုပါတယ်။

Ref: Aljazeera