News @ M-Media

Tag: Ukarine

  • ရုရှားလက်ထဲမှ နယ်မြေများကို ယူကရိန်းက ပြန်သိမ်းလာနိုင်ပြီ

    ရုရှားလက်ထဲမှ နယ်မြေများကို ယူကရိန်းက ပြန်သိမ်းလာနိုင်ပြီ

    စက်တင်ဘာ ၁၁၊ ၂၀၂၂
    M-Media

    -ရုရှားရဲ့ ကျူးကျော်မှုကို တန်ပြန်ထိုးစစ်ဖွင့်လာတဲ့ ယူကရိန်းဟာ နိုင်ငံအရှေ့ပိုင်းက ရုရှားလက်ထဲရောက်နေတဲ့ အဓိကနယ်မြေတစ်ချို့ကို ပြန်လည်သိမ်းပိုက်လာနိုင်ခဲ့ပါတယ်။

    ရုရှားက ပစ်မှတ်ထား သိမ်းပိုက်တဲ့ နိုင်ငံအရှေ့ပိုင်း Kharkiv ပြည်နယ်မှာရှိပြီး ရထားပို့ဆောင်ရေး အချက်အခြာဖြစ်ကာ ရုရှားတပ်ရဲ့ ထောက်ပို့လမ်းကြောင်းမှာ အဓိကကျတဲ့ Kupiansk မြို့၊ အဲဒီအနားက Izyum မြို့၊ နောက်ထပ် အဓိမြို့ဖြစ်တဲ့ Balaklyia တို့ အပါအ၀င် နယ်မြေတော်တော်များများကို အခုတစ်ပတ်အတွင်း ယူကရိန်းတပ်တွေက ပြန်သိမ်းနိုင်ခဲ့ပါတယ်။

    ရုရှားကာကွယ်ရေး၀န်ကြီးဌာနကလည်း ဒီမြို့တွေက တပ်ပြန်ဆုပ်ရကြောင်း အတည်ပြုပါတယ်။

    မနေ့ညက တိုင်းပြည်ကိုပြောတဲ့ ဗီဒီယိုမိန့်ခွန်းမှာ သမ္မတ ဇဲလင်စကီးက အခုလအစောပိုင်းက စတင်ခဲ့တဲ့ တန်ပြန်ထိုးစစ်မှာ စကွဲယားမိုင် ၇၇၀ လောက်ရှိတဲ့ နယ်မြေတွေကို ရုရှားရဲ့သိမ်းပိုက်မှုကနေ လွတ်မြောက်စေခဲ့တယ်လို့ ဆိုပါတယ်။

    အဲဒီပမာဏရဲ့ ထက်၀က်လောက်ကို ၄၈ နာရီအတွင်းမှာ ယူကရိန်းတပ်တွေက ပြန်သိမ်းနိုင်ခဲ့တာပါ။

    ယူကရိန်းနိုင်ငံခြားရေး၀န်ကြီး ဒီမီထရို ကူလီဘာက အနောက်နိုင်ငံတွေရဲ့ လက်နက်အကူအညီနဲ့မိမိတို့တပ်တွေဟာ ရုရှားကို မျှော်လင့်ထားတာထက် ပိုစောပြီး တိုက်ထုတ်နိုင်လိမ့်မယ်ဆိုတာ အခုအောင်မြင်မှုက သက်သေပြနေတယ်လို့ ပြောကြားခဲ့ပါတယ်။

    Ref: BBC

  • ယူကရိန်းအစိုးရထိပ်ပိုင်းတွင် ရုရှားကို ကူညီသူများရှိနေ

    ယူကရိန်းအစိုးရထိပ်ပိုင်းတွင် ရုရှားကို ကူညီသူများရှိနေ

    ဇူလိုင် ၁၈၊ ၂၀၂၂
    M-Media

    -ရုရှားနဲ့ ပူးပေါင်းဆောင်ရွက်မှု လုပ်နေတယ်ဆိုတဲ့ စွဲချက်နဲ့ ရှေ့ချုပ်၊ ထောက်လှမ်းရေးအကြီးအကဲတို့ကို ယူကရိန်းသမ္မတက ရာထူးကနေ ထုတ်ပယ်လိုက်ပါတယ်။

    ယူကရိန်းရဲ့ အင်အားတောင့်တင်းတဲ့ ထောက်လှမ်းရေးအဖွဲ့ SBU အကြီးအကဲ အိုင်ဗန် ဗာကာနော့ဗ်ဟာ သမ္မတ ဇယ်လင်စကီးရဲ့ ငယ်သူငယ်ချင်းအရင်းပါ။

    ရှေ့နေချုပ် အီရ်ယာနာ ဗီနီဒစ်တိုဗာကတော့ ရုရှားရဲ့ကျူးကျော်မှုက စစ်ရာဇ၀တ်မှုတွေကို ကိုင်တွယ်နေသူ ဖြစ်ပါတယ်။

    သမ္မတ ဇယ်လင်စကီးရဲ့ တယ်လီဂရမ်ပို့စ်မှာ ထောက်လှမ်းရေးအကြီးအကဲနဲ့ ရှေ့နေချုပ်တို့ဟာ ရုရှားနဲ့ ပူးပေါင်းဆောင်ရွက်တယ်ဆိုတဲ့ အထောက်အထားတွေ အများအပြားတွေ့ရတယ်လို့ ရေးသားထားပါတယ်။

    နိုင်ငံတော်သစ္စာဖောက်မှု၊ ရုရှားနဲ့ ပူးပေါင်းဆောင်ရွက်မှုတွေအတွက် ရဲနဲ့ တရားရေး၀န်ထမ်းတွေကို စုံစမ်းစစ်ဆေးနေတဲ့ အမှုပေါင်း ၆၅၁ ခုရှိပြီး ဘာကာနော့ဗ်နဲ့ ဗီနီဒစ်တိုဗာလက်အောက်က ၀န်ထမ်း ၆၀ ကျော်ဟာ ယူကရိန်းကိုဆန့်ကျင်ကာ ရုရှားနဲ့ ပူးပေါင်းဆောင်ရွက်နေကြတယ်လို့လည်း ဇယ်လင်စကီးက ဆိုပါတယ်။

    “နိုင်ငံတော်လုံခြုံရေးအခြေခံကို ဆန့်ကျင်ဖောက်ဖျက်တဲ့ ရာဇ၀တ်မှုတွေ အဲလောက်အများကြီး ရှိနေပြီး သက်ဆိုင်ရာ ခေါင်းဆောင်တွေကို သေသေချာချာ မေးခွန်းထုတ်ရပါလိမ့်မယ်။ မေးခွန်းတစ်ခုချင်းဆီအတွက် သင့်တော်တဲ့အဖြေမျိုး ထွက်လာမှာပါ”

    Ref: Reuters

  • မြွေကျွန်းကို ရုရှားလက်ထဲကနေ ယူကရိန်းက ဘယ်လိုပြန်သိမ်းခဲ့သလဲ

    မြွေကျွန်းကို ရုရှားလက်ထဲကနေ ယူကရိန်းက ဘယ်လိုပြန်သိမ်းခဲ့သလဲ

    ဇူလိုင် ၁၊ ၂၀၂၂
    M-Media

    -ရုရှားကျူးကျော်မှု စတင်ကတည်းက ဆုံးရှုံးသွားတဲ့ မဟာဗျူဟာမြောက်ကျွန်းတစ်ကျွန်းကို ယူကရိန်းက ကြာသာပတေးနေ့မှာ ပြန်သိမ်းနိုင်ခဲ့ပါတယ်။

    ပင်လယ်နက် အနောက်မြောက်ဖက်က ‘မြွေကျွန်း’ (Snake Island) ဖြစ်ပါတယ်။

    ကျူးကျော်မှုစတဲ့ ဖေဖော်၀ါရီ ၂၄ ရက်နေ့မှာကတည်းက ရုရှားတပ်တွေဟာ မြွေကျွန်းကို သိမ်းပိုက်ခဲ့တာကြောင့် အဓိကဆိပ်ကမ်း အိုဒက်ဆာလည်း ပိတ်မိသွားပြီး ယူကရိန်းရဲ့ ဂျုံတင်ပို့မှု လုံး၀ ရပ်ဆိုင်းသွားပါတယ်။

    ယူကရိန်းဖက်ကလည်း ဒီကျွန်းကို ပြန်သိမ်းနိုင်ဖို့ ၄ လလုံးလုံး တောက်လျှောက် တိုက်ခိုက်ခဲ့ပါတယ်။ ဇွန်လ ၃၀ ရက်နေ့မှာတော့ ရုရှားတပ်တွေဟာ မော်တော်ဘုတ် ၂ စီးနဲ့ ကျွန်းကို စွန့်ခွာသွားခဲ့ပါတယ်။

    ရုရှားက ယူကရိန်းရဲ့ ဂျုံတင်ပို့မှုကို မနှောက်ယှက်ချင်တဲ့အတွက် ကျွန်းကို လက်လွှတ်လိုက်တာလို့ ပြောပါတယ်။ တပ်တွေဟာ သူတို့လုပ်ဆောင်ရမယ့်တာ၀န် ပြီးဆုံးသွားတဲ့အတွက် ကျွန်းက ခွာလာတာလို့ ရုရှားဖက်က ထုတ်ပြန်ချက်မှာ ဖော်ပြထားပါတယ်။

    မြွေကျွန်းဟာ ယူကရိန်းကုန်းမကြီးကနေ လက်နက်ကြီးပေါင်းစုံ၊ ကြည်းရေလေ လမ်းကြောင်းပေါင်စုံနဲ့ တိုက်ခိုက်နိုင်တဲ့ အကွာအ၀ေးမှာ ရှိနေပြီး ရုရှားတပ်တွေ ဒီကျွန်းမှာ အထိုင်ချမှုကို ရုရှားဗိုလ်ချုပ်တွေကိုယ်တိုင်က ၀ေဖန်ပြောဆိုတာမျိုး ရှိခဲ့ပါတယ်။

    ယူကရိန်းကလည်း ဒုံးကျည်တွေ၊ အမြောက်တွေ၊ ဒရုန်းတွေ၊ စစ်သင်္ဘောတွေနဲ့ တောက်လျှောက် ပစ်ခတ်တိုက်ခိုက်ခဲ့တာပါ။

    ရုရှားရဲ့ ပင်လယ်နက်ရေတပ်က ထိပ်တန်း တိုက်သင်္ဘော Moskva ဟာ မြွေကျွန်းမှာ ရပ်နားရင်း ယူကရိန်းရဲ့ နှစ်မြှုပ်မှုကို ခံခဲ့ရပါတယ်။

    မြွေကျွန်းကို ပြန်သိမ်းနိုင်ခဲ့ပေမယ့် အဲဒီမှာ စစ်တပ်တွေ အထိုင်ချမှာ မဟုတ်ဘူးလို့ ယူကရိန်းက ပြောပါတယ်။ ဒါပေမယ့် ကျွန်းနားကပ်လာရင် တိုက်ခိုက်ဖို့ ယူကရိန်းက အဆင်သင့်ပြင်ထားပါတယ်။

    ဒီကျွန်းကို ပြန်ရလိုက်တဲ့အတွက် ပင်လယ်နက်မှာ အရေးပါတဲ့ ယူကရိန်းရဲ့ အိုဒက်ဆာဆိပ်ကမ်း ပိုမိုလုံခြုံသွားပါတယ်။ ဒါဟာ မဟာဗျူဟာအရရော၊ ဂုဏ်သိက္ခာအရပါ ယူကရိန်းရဲ့ အဓိကအောင်ပွဲ ဖြစ်ပါတယ်။

    ယူကရိန်းကို ရုရှားက ကျူးကျော်တိုက်ခိုက်မှုဟာ ၄ လကျော်လာခဲ့ပြီး အဓိကအားဖြင့် ယူကရိန်းအရှေ့ခြမ်းက ရုရှားစကားပြောသူတွေ နေထိုင်ရာနေရာကို သိမ်းပိုက်ဖို့ ကြိုးစားနေပါတယ်။

    Ref: BBC

  • နာမည်ကျော် ပြည်တွင်းဖြစ် ဒရုန်း ၃ စင်းကို တူရကီက ယူကရိန်းထံ လက်ဆောက်ပေး

    နာမည်ကျော် ပြည်တွင်းဖြစ် ဒရုန်း ၃ စင်းကို တူရကီက ယူကရိန်းထံ လက်ဆောက်ပေး

    ဇူလိုင် ၁၊ ၂၀၂၂
    M-Media

    -တူရကီ ဒရုန်းထုတ်လုပ်ရေးကုမ္ပဏီဖြစ်တဲ့ Baykar Defense က သူတို့ရဲ့ နာမည်ကျော် Bayraktar TB2 ဒရုန်း ၃ စင်းကို ယူကရိန်းထံ လက်ဆောင်ပေးသွားမယ်လို့ ထုတ်ပြန်ပါတယ်။

    Baykar Defense ဟာ တူရကီအစိုးရထံကနေ ကန်ထရိုက်ယူကာ ဒရုန်းနဲ့ စစ်လက်နက်ပစ္စည်းတွေ ထုတ်လုပ်နေတာပါ။ သူတို့ထုတ်တဲ့ Bayraktar TB2 ကတော့ လက်နက်တပ်ဆင်ထားတဲ့ တန်ဖိုးနည်း အဆင့်မြင့်ဒရုန်းတွေထဲမှာ နာမည်ကျော်ပါတယ်။

    ရုရှားရဲ့ ကျူးကျော်စစ်ကို ကာကွယ်ရေး ယူကရိန်းကို ကမ္ဘာတစ်၀ှမ်းက စစ်လက်နက်ပစ္စည်းတွေ ထောက်ပံ့ပေးတဲ့နေရာမှာ တူရကီလည်း ပါ၀င်ပါတယ်။

    ဥရောပနိုင်ငံငယ်လေးတစ်ခုဖြစ်တဲ့ လစ်သူယေးနီးယားက ပြည်သူတွေဟာ Bayraktar TB2 တစ်စီး ၀ယ်ယူကာ ယူကရိန်းကို လက်ဆောင်ပေးဖို့အတွက် ပြီးခဲ့တဲ့လမှာ ရန်ပုံငွေ ကောက်ခံခဲ့ပြီး ၃ ရက်အတွင်း လိုအပ်တဲ့ငွေကို ရရှိခဲ့တာပါ။

    အဲဒီနောက်ပိုင်း ယူကရိန်းကို Bayraktar TB2 ဒရုန်းထောက်ပံ့နိုင်ရေး ကမ္ဘာတစ်၀ှမ်းက ပြည်သူတွေ ရန်ပုံငွေကောက်ခံတဲ့လှုပ်ရှားမှုတွေ အများအပြား ပေါ်ပေါက်လာပါတယ်။

    Baykar Defense ဟာ လစ်သူယေးနီးယား ပြည်သူတွေရဲ့ ငွေပးချေမှုကို လက်မခံဘဲ TB2 ဒရုန်းလေယာဥ်တစ်စီး လက်ဆောင်ပးခဲ့သလို၊ နောက်ထပ် ၃ စီး ယူကရိန်းကို လက်ဆောင်ပေးသွားမယ်လို့ ပြီးခဲ့တဲ့ရက်ပိုင်းမှာ ထုတ်ပြန်ခဲ့ပါတယ်။

    ယူကရိန်းဟာ အရင်က TB2 ဒရုန်းတွေကို တူရကီထံကနေ ၀ယ်ယူဖူးပြီး နိုင်ငံအတွင်း ဖက်စပ်ထုတ်လုပ်ဖို့အတွက်လည်း သဘောတူထားတာဖြစ်ပါတယ်။

    ရုရှားရဲ့ ကျူးကျော်စစ်မှာ TB2 က လက်စွမ်းပြနေပြီး တင့်ကားတွေ၊ ဒုံးခွင်းစနစ်တွေနဲ့ ရေတပ်သင်္ဘောတွေကိုပါ ဖျက်ဆီးထားနိုင်ပါတယ်။

    ဖေဖော်၀ါရီ ၂၄ ရက်နေ့ ရုရှားရဲ့ ကျူးကျော်မှုနောက်ပိုင်း Baykar Defense ကုမ္ပဏီကနေ TB2 ဒရုန်း အစင်း ၅၀ လောက် ရရှိထားတယ်လို့ ယူကရိန်းက ပြီးခဲ့တဲ့တစ်ပတ်မှာ ထုတ်ပြန်ခဲ့ပါတယ်။

    Ref: Nikkei Asia

  • ယူကရိန်းကို ဒရုန်းထောက်ပံ့နိုင်ရန် လစ်သူယေးနီးယားပြည်သူများ ရန်ပုံငွေကောက်ပေး

    ယူကရိန်းကို ဒရုန်းထောက်ပံ့နိုင်ရန် လစ်သူယေးနီးယားပြည်သူများ ရန်ပုံငွေကောက်ပေး

    မေ ၃၀၊ ၂၀၂၂
    M-Media

    -တူရကီထုတ် Bayraktar TB2 ကို၀ယ်ယူပြီး ယူကရိန်းကို ပေးနိုင်ဖို့အတွက် ဥရောပနိုင်ငံငယ် လစ်သူယေးနီးယား ပြည်သူတွေက စုပေါင်းပြီး ရန်ပုံငွေ ကောက်ခံပေးခဲ့ပါတယ်။

    ပြည်သူတစ်ဦးချင်းက ငွေကြေးအနည်းငယ်စီ ထည့်၀င်ခဲ့ကြတာဖြစ်ပြီး ၃ ရက်ခွဲ အတွင်းမှာပဲ ဒရုန်းတစ်စီး၀ယ်ဖို့ လိုအပ်တဲ့ ကန်ဒေါ်လာ ၅.၄ သန်းကို ရရှိခဲ့ပါတယ်။

    ဒီရန်ပုံငွေကောက်ခံမှုကို လစ်သူယေးနီးယား အင်တာနက် သတင်းဌာန တစ်ခုဖြစ်တဲ့ Laisves TV က ဦးဆောင်ပြုလုပ်ခဲ့တာပါ။

    “ဒီစစ်ပွဲမဖြစ်ခင်က ဒီလိုစုပြီး လက်နက်တွေ ၀ယ်ပေးရမယ်လို့ ကျွန်မတို့ မတွေးမိခဲ့ပါဘူး။ ကမ္ဘာကြီးပိုကောင်းလာဖို့ တစ်ခုခုတော့ လုပ်ပေးရမှာပေါ့လေ” လို့ အလှူငွေ ယူရို ၁၀၀ ထည့်၀င်ခဲ့သူ အသက် ၃၂ နှစ်အရွယ် အဂ်နီ ဘီလစ်ကိုက်က ပြောပါတယ်။

    တူရကီရဲ့ Bayraktar TB2 ဒရုန်းတွေဟာ ပြီးခဲ့တဲ့ နှစ်အနည်းငယ်အတွင်မှာ နာမည်ကျော်လာတာပါ။ ဆီးရီးယားနဲ့ လစ်ဗျားတို့မှာ အသုံးပြုနေသလို အဇာဘိုင်ဂျန်က နိုင်သွားတဲ့ ၂၀၂၀ ခုနှစ် အာမေးနီးယားနဲ့ ၂ လကြာစစ်ပွဲမှာ ဒီဒရုန်းတွေက အဓိကကျတဲ့ အခန်းကဏ္ဍကနေ ပါ၀င်ခဲ့ပါတယ်။

    ယူကရိန်းဟာ အရင်က Bayraktar TB2 ဒရုန်း အစီး ၂၀ တူရကီထံကနေ ၀ယ်ထားပြီး ဇန်န၀ါရီလကလည်း နောက်ထပ် ၁၆ စင်း ထပ်မှာခဲ့ပါတယ်။

    ရုရှားရဲ့ ကျူးကျော်စစ်ကို ခုခံဖို့အတွက် အမေရိကန်နဲ့ ဥရောပနိုင်ငံတွေက ရုရှားကို စစ်လက်နက်တွေ ထောက်ပံ့ပေးနေပြီး၊ သာမန်ပြည်သူတွေက ပိုက်ဆံစုကာ ဒရုန်း၀ယ်ပေးတဲ့ဖြစ်စဥ်ဟာ ဒါပထမဆုံး ဖြစ်ပါတယ်။

    ဒရုန်းကို လစ်သူယေးနီးယား ကာကွယ်ရေး၀န်ကြီးဌာနက ၀ယ်ယူပေးပို့မှာ ဖြစ်ပါတယ်။

    Ref: Reuters