ဧပြီ ၆၊ ၂၀၂၁
M-Media
-၂၀၁၅ ခုနှစ် နျူသဘောတူညီချက်ကို ပြန်လည်အသက်သွင်းရေးအတွက် အီရန်နဲ့ အမေရိကန်တို့ ဩစတြီးယားနိုင်ငံ ဗီယင်နာမြို့မှာ ဒီကနေ့ စတင် ဆွေးနွေးနေပါတယ်။
ဒီဆွေးနွေးပွဲကို ဥရောပနိုင်ငံတွေက ကြားဝင် ဆောင်ရွက်ပေးတာပါ။
အီရန်နဲ့ အင်အားကြီး ၆ နိုင်ငံတို့ ၂၀၁၅ ခုနှစ်က ရရှိခဲ့တဲ့ နျူသဘောတူညီချက်အရ အီရန်ဟာ နျူစီမံကိန်းကို ကန့်သတ်လုပ်ဆောင်ရမှာ ဖြစ်ပြီး အပြန်အလှန်အားဖြင့် အနောက်နိုင်ငံတွေက စီးပွားရေး ပိတ်ဆို့မှုတွေ ဖြေလျော့ပေးရမှာ ဖြစ်ပါတယ်။
သဘောတူညီချက်ကို အီရန်က မလိုက်နာဘူးလို့ဆိုတာ သမ္မတထရမ့်လက်ထက် ၂၀၁၈ ခုနှစ်က အမေရိကန်ဟာ စာချုပ်ကနေ နှုတ်ထွက်ခဲ့ပြီး ပိတ်ဆို့မှုတွေလည်း ပြန်လည်လုပ်ဆောင်ခဲ့ပါတယ်။ နိုင်ငံတကာ နျူစွမ်းအင်အေဂျင်စီ IAEA က အီရန်ဟာ စာချုပ်ပါအတိုင်း လိုက်နာဆောင်ရွက်နေဆဲဖြစ်တယ်လို့ အဲဒီတုန်းက ထုတ်ပြန်ပါတယ်။
နောက်ပိုင်းမှာ အီရန်ကလည်း အမေရိကန်ရဲ့လုပ်ရပ်ကြောင့် စာချုပ်ပါ ကန့်သတ်ချက်တစ်ချို့ကို လိုက်နာတော့မှာ မဟုတ်ဘူးလို့ ပြောကြားခဲ့ပါတယ်။
အီရန်အစိုးရ ပြောရေးဆိုခွင့်ရှိသူ အလီ ရာဘီအီက လက်ရှိမှာ လမ်းကြောင်းမှန်ပေါ် ရောက်နေပြီလို့ မိမိတို့ ယုံကြည်ကြောင်း၊ အမေရိကန်အနေနဲ့ ရိုးသားမှု၊ စိတ်အားထက်သန်မှုနဲ့ စိတ်စေတနာမှန်ကန်မှုရှိတယ်ဆိုတာ သက်သေပြနိုင်ရင် စာချုပ်ရဲ့ အနာဂတ်အတွက် ကောင်းမွန်တဲ့လက္ခဏာ ဖြစ်လာမှာဖြစ်ကြောင်း ပြောကြားခဲ့ပါတယ်။
အမေရိကန်သမ္မတ ဂျိုးဘိုင်ဒန်က စာချုပ်မှာ ပြန်လည်ပါဝင်လိုတယ်လို့ ပြောကြားထားပေမယ့် ဆွေးနွေးညှိနှိုင်းမှုတွေ အရင်လုပ်မယ်လို့ ဆိုပါတယ်။ အီရန်က တိုက်ရိုက်ဆွေးနွေးမှုကို ငြင်းဆိုပြီး ဥရောပနိုင်ငံတွေကြားခံကာ ဆွေးနွေးဖို့ တောင်းဆိုခဲ့ပါတယ်။
Ref: Reuters
