Tag: US

ဇွန် ၄၊ ၂၀၂၀
M-Media

​- နိုင်ငံတစ်ဝှမ်းဖြစ်နေတဲ့ ဆန္ဒပြမှုတွေကို နှိမ်နှင်းရေး စစ်တပ်ကိုသုံးဖို့ အိမ်ဖြူတော်က စီစဉ်နေတာကို မထောက်ခံဘူးလို့ အမေရိကန် ကာကွယ်ရေးဝန်ကြီး မာ့ခ် အက်စ်ပါက မနေ့မှာ ပြောကြားလိုက်ပါတယ်။

ပြီးခဲ့တဲ့တစ်ပတ် မင်နီယာပိုလစ်မြို့မှာ အသက် ၄၉ နှစ်အရွယ် လူမည်းအမျိုးသား ဂျော့ဖလွိုက်ကို ရဲတပ်ဖွဲ့က ဖမ်းဆီးစဉ်​ သေဆုံးခဲ့မှုနောက်ဆက်တွဲ နိုင်ငံတစ်ဝှမ်း ဆန္ဒပြမှုတွေဟာ တစ်ရက်ထက်တစ်ရက် ပိုမို ဆိုးရွားလာခဲ့တာ ဖြစ်ပါတယ်။

ဒီမတည်ငြိမ်မှုကို ဖြေရှင်းရေး စစ်တပ်ကို အသုံးချမယ်လို့ သမ္မတ ဒေါ်နယ်ထရမ့်က ပြီးခဲ့တဲ့ရက်ပိုင်းမှာ လူသိရှင်ကြား ပြောကြားခဲ့ပြီး၊ ဒီအတွက် Insurrection Act ဥပေဒကို အသက်သွင်းဖို့လည်း အိမ်ဖြူတော်တာဝန်ရှိသူတွေက ဆွေးနွေးနေကြပါတယ်။ မြို့တော်ဝါရှင်တန်အပြင်ဘက်က စစ်စခန်းမှာ လေတပ်က စစ်သားအချို့ကို ချထားမှုလည်း ရှိခဲ့ပါတယ်။

မနေ့က ကာကွယ်ရေးဝန်ကြီးဌာနမှာလုပ်တဲ့ သတင်းစာရှင်းလင်းပွဲမှာ ဝန်ကြီး မာ့ခ်အက်စပါက ဆန္ဒပြမှုတွေကို တိုက်ပွဲဖြစ်နေတဲ့အသွင် ပြောဆိုတာမျိုးကို မနှစ်မြို့​ကြောင်း၊ အလွန်အရေးကြီးပြီး ဆိုးရွားလွန်းတဲ့ အခြေအနေရောက်မှသာ စစ်တပ်ကို ဥပဒေစိုးမိုးရေးအတွက် သုံးသင့်ပြီး လက်ရှိအခြေအနေဟာ ထိုအနေအထားမျိုးမဟုတ်ကြောင်း သတင်းထောက်တွေကို ပြောကြားခဲ့ပါတယ်။

ဂျော့ဖလွိုက်သေဆုံးမှုမှာ ရဲတပ်ဖွဲ့ဝင်တွေတဲ့ဆောင်ရွက်ချက်ကိုလည်း အက်စပါက ရှုတ်ချခဲ့ပြီး ‘လူသတ်မှု’ ‘ဆိုးရွားတဲ့ ရာဇဝတ်မှု’ ဖြစ်တယ်လို့ ပြောကြားခဲ့ပါတယ်။

အမေရိကန်ကာကွယ်ရေးဝန်ကြီးဌာနက အမည်မဖော်လိုသူ တစ်ဦးကလည်း ရှေ့ဆက်ပြီး စစ်တပ်ရဲ့အခြေအနေ ကောင်းမှာမဟုတ်ဘူးဆိုတဲ့ စိုးရိမ်မှုတွေ မြင့်တက်လာကာ နိုင်ငံရေးမှာ စစ်တပ်ကိုအသုံးပြုတာဟာ မှန်ကန်တဲ့ လုပ်ရပ်မျိုး မဟုတ်ဘူးလို့ Politico သတင်းဌာနကို ပြောကြားခဲ့ပါတယ်။

နယ်စပ်လုံခြုံရေး၊ တရားဥပဒေစိုးမိုးရေးတွေမှာ ထရမ့်အစိုးရက စစ်တပ်ကို အသုံးပြုဖို့ ကြိုးစားလာတာကို အမေရိကန် စစ်တပ်အသိုင်းအဝိုင်းက နှစ်မြို့မှုမရှိဘူးဆိုတဲ့ သတင်းတွေ အရင်ကလည်း ထွက်ဖူးပါတယ်။ အခုဆန္ဒပြမှုကိစ္စမှာ ဒီဝေဖန်မှုတွေဟာ ပိုမိုကျယ်လောင်လာခဲ့ပါတယ်။

သမ္မတ အိုဘားမားလက်ထက်မှာ ကြည်း၊ ရေ၊ လေ ညှိနှိုင်းကွပ်ကဲရေးအဖွဲ့ရဲ့ ဥက္ကဌအဖြစ် တာဝန်ထမ်းဆောင်ဖူးပြီး အမေရိကန်စစ်ဖက်အသိုင်းအဝိုင်းမှာ လေးစားခံရတဲ့ ရေတပ်အကြီးအကဲဟောင်း မိုက်မူလန်က ထရမ့်အစိုးရနဲ့ပတ်သက်ပြီး အရင်က ဝေဖန်ပြောကြားလိုမှု မရှိခဲ့ပေမယ့် အခုအချိန်ကတော့ မပြောမဖြစ် ပြောရမယ့်အချိန် ဖြစ်တယ်လို့ The Atlantic မဂ္ဂဇင်းက ဆောင်းပါးတစ်ပုဒ်မှာ ထည့်သွင်းရေးသားခဲ့ပါတယ်။

ကာကွယ်ရေးဝန်ကြီးဟောင်း ဂျင်မာတစ်ကလည်း သူ့ရဲ့သက်တမ်းတစ်လျှောက်မှာ အမေရိကန်ပြည်သူတွေကို စည်းလုံးအောင်မလုပ်နိုင်တဲ့ သမ္မတအဖြစ် ထရမ့်ကို ပထမဆုံးတွေ့ဖူးတာဖြစ်တယ်လို့ ပြောကြားခဲ့ပါတယ်။

Ref: Aljazeera

ဇွန် ၃၊ ၂၀၂၀
M-Media

-လူမည်းအမျိုးသား ဂျော့ဖလွိုက် ရဲလက်မှာသေဆုံးမှုဟာ လူသတ်မှုဖြစ်တယ်လို့ အစိုးရနဲ့ ပုဂ္ဂလိက အလောင်းခွဲစိပ်စစ်ဆေးသူတွေက မနေ့မှာ ပြောကြားလိုက်ပါတယ်။

ပြီးခဲ့တဲ့တစ်ပတ်မှာ ဖြစ်ပွားခဲ့တဲ့ မင်နီဆိုတာပြည်နယ် မင်နီယာပိုလစ်မြို့က ဒီအဖြစ်အပျက်ကြောင့် အမေရိကန်နိုင်ငံတစ်ဝှမ်း ဆန္ဒပြမှုတွေ အကြီးအကျယ်ဖြစ်ပေါ်နေပြီး တာဝန်ရှိတဲ့ရဲတွေကို အရေးယူပေးဖို့၊ ရဲတပ်ဖွဲ့ဝင်တွေကြားမှာ ရှိနေတဲ့ လူမျိုးရေးခွဲခြားတဲ့စိတ်ဓာတ်ကို ပပျောက်အောင် လုပ်ပေးဖို့ ပြည်သူတွေက တောင်းဆိုနေကြပါတယ်။

အသက် ၄၆ နှစ်အရွယ် ဖလွိုက်ကို လိမ်လည်မှုသံသယနဲ့ ဖမ်းဆီးခဲ့တာဖြစ်ပြီး ဖမ်းဆီးစဉ်မှာ ရဲတပ်ဝင် ၃ ဦးက ဖလွိုက်မထနိုင်အောင် အပေါ်ကနေ တက်ဖိခဲ့ကြတာပါ။ ရဲတပ်ဖွဲ့ဝင်တစ်ဦးရဲ့ ဒူးခေါင်းဟာ လည်ပင်းကို ထောက်ထားပြီး ‘အသက်ရှုလို့မရတော့ဘူး’ လို့ အော်နေတဲ့ ဖလွိုက် လုံး၀ လှုပ်ရှားမှု မရှိတော့တဲ့အချိန်အထိ ဒူးကို ကြွပေးခြင်း မရှိခဲ့ပါဘူး။

အခင်းဖြစ်ပွားရာဒေသရဲ့ အလောင်းခွဲစိပ်စစ်ဆေးသူက ရဲတပ်ဖွဲ့ဝင်က လည်ပင်းကို ဒူးနဲ့ထောက်ထားမှု၊ မကြာသေးခင်ကာလအတွင်း မူးယစ်ဆေးသုံးစွဲခဲ့မှု၊ ​သွေးတိုးရောဂါ၊ နှလုံးသွေးကြောရောဂါ စတဲ့အချက်တွေကြောင့် အသက်ရှုကြပ် သေဆုံးခဲ့တာဖြစ်တယ်လို့ တနင်္လာနေ့က ကနဦးထုတ်ပြန်ချက်မှာ ဖော်ပြခဲ့ပါတယ်။

ပုဂ္ဂလိက အလောင်းခွဲစိပ်စစ်ဆေးသူ ဆရာဝန်နှစ်ဦးကတော့ ဖလွိုက်ဟာ မသေဆုံးခင်က မူးယစ်ဆေးသုံးစွဲထားတယ်၊ နာတာရှည်ရောဂါတွေရှိတယ်ဆိုတဲ့ အချက်ကို ငြင်းဆိုခဲ့ပြီး၊ ပြင်ပကသက်ရောက်မှုကြောင့် အသက်ရှုကြပ်သေဆုံးခဲ့တာဖြစ်တယ်လို့ ထုတ်ပြန်ခဲ့ပါတယ်။

အစိုးရနဲ့ ပုဂ္ဂလိက အလောင်းခွဲစိပ်စစ်ဆေးမှု ၂ ခုစလုံးက ဂျော့ ဖလွိုက်သေဆုံးမှုဟာ လူသတ်မှုဖြစ်တယ်လို့ တစ်ညီတစ်ညွတ်တည်း အတည်ပြုခဲ့ပါတယ်။

ဖလွိုက်ရဲ့လည်ပင်ကို ဒူးနဲ့ထောက်ထားတဲ့ရဲကို တရားစွဲဆိုထားတဲ့ မှတ်တမ်းမှာတော့ ဖလွိုက်သေဆုံးမှုဟာ လည်ပင်းညှစ်ခံရတာကြောင့်မဟုတ်ဘူးလို့ ဖော်ပြထားပါတယ်။ နောက်ဆုံး ဆေးစစ်ချက်အဖြေကို လာမယ့် တနင်္လာနေ့မှာ ထုတ်ပြန်မှာ ဖြစ်ပါတယ်။

Ref: Aljazeera

ဇွန် ၁၊ ၂၀၂၀
M-Media

-မင်နီယာပိုလစ်မြို့မှာ ရဲတပ်ဖွဲ့လက်ချက်ကြောင့် လူမည်းအမျိုးသား ဂျော့ဖလွိုက် သေဆုံးမှုနောက်ဆက်တွဲ အမေရိကန်နိုင်ငံတစ်ဝှမ်း ဆန္ဒ​ပြမှုတွေဟာ ပြင်းထန်လာတာကြောင့် အခြေအနေကို ထိန်းသိမ်းဖို့အတွက် ပြည်နယ်တစ်ချို့မှာ နိုင်ငံတော်အစောင့်တပ်ဖွဲ့ကို အသင့်ပြင်ထားရပါတယ်။

ဆန္ဒပြမှုဟာ ၆ ရက်မြောက်ရှိလာခဲ့ပြီဖြစ်ပြီး အဆောက်အဦးတွေ၊ ကားတွေကို မီးရှို့ဖျက်ဆီးတာ၊ တိုက်ခိုက်လုယက်တာတွေလည်း ဖြစ်လာပါတယ်။ နိုင်ငံတစ်ဝှမ်း မြို့ပေါင်း ၄၀ လောက်မှာ ညမထွက်ရအမိန့် ထုတ်ပြန်ထားပေမယ့် ဆန္ဒပြမှုတွေက ပိုမိုများပြားလာပါတယ်။

စစ်တပ်လက်အောက်မှာရှိပြီး ပြည်တွင်းက အရေးပေါ်အခြေအနေကို ကိုင်တွယ်ဖို့ ရည်ရွယ်တဲ့ အရန်တပ်ဖွဲ့ ‘နိုင်ငံတော်အစောင့်တပ်’ က ပြည်နယ် ၁၅ ခုမှာ သူတို့ရဲ့တပ်ဖွဲ့ဝင် ၅၀၀၀ လောက်ကို တပ်လှန့်ထားလိုက်တယ်လို့ မနေ့က ပြောကြားခဲ့ပါတယ်။

အိမ်ဖြူတော်ရှေ့အပါအဝင် အနည်းဆုံး မြို့ကြီး ၇၅ မြို့ကျော်လောက်မှာ ဆန္ဒပြမှုတွေဟာ အရှိန်မြင့်တက်လာနေတာပါ။ ဒါဟာ ၁၉၆၈ ခုနှစ် မာတင်လူသာကင်း လုပ်ကြံခံရပြီးနောက်ပိုင်း လူဖြူ၊ လူမည်း ကွဲပြားမှုကို အခြေခံပြီး ဖြစ်ပေါ်တဲ့ အကြီးမားဆုံး မငြိမ်သက်မှု ဖြစ်တယ်လို့ သုံးသပ်မှုတွေလည်း ရှိနေပါတယ်။

ဆန္ဒပြမှုတွေကို လုံခြုံရေးတပ်ဖွဲ့ဝင်တွေက အင်အားသုံးနှိမ်နှင်းတာမျိုး လုပ်ဆောင်နေပြီး အနည်းဆုံး လူပေါင်း ၄၄၀၀ ကျော်လောက်ကိုလည်း ဖမ်းဆီးထားပါတယ်။

လိမ်လည်မှုစွဲချက်နဲ့ ဖမ်းဆီးရင်း လူမည်းအမျိုးသား ဂျော့ဖလွိုက်ကို သေဆုံးစေခဲ့တဲ့ ရဲတပ်ဖွဲ့ဝင် အသက် ၄၄ နှစ်အရွယ် ဒဲရစ် ချူဗင်ကို လူသတ်မှုနဲ့ တရားစွဲဆိုထားပါတယ်။

Ref: BBC

မေ ၂၉၊ ၂၀၂၀
M-Media

-ရဲတပ်ဖွဲ့ဝင်တွေကြောင့် လူမည်းအမျိုးသားတစ်ဦး သေဆုံးမှု နောက်ဆက်တွဲအဖြစ် အမေရိကန်နိုင်ငံတစ်ဝှမ်းမှာ အကြီးအကျယ် ဆန္ဒပြမှုတွေ ဖြစ်ပေါ်နေပါတယ်။

မင်နီဆိုတာပြည်နယ် မင်နီယာပိုလစ်မြို့မှာ ဂျော့ဂျ် ဖလွိုက်ဆိုသူ လူမည်းအမျိုးသားဟာ လိမ်လည်မှုသံသယနဲ့ ​တနင်္လာနေ့က ရဲတပ်ဖွဲ့ရဲ့ ဖမ်းဆီးမှုအတွင်း သေဆုံးသွားခဲ့တာပါ။ လူဖြူရဲတစ်ဦးက ဖလွိုက်ကို မြေပြင်မှာလှဲကာ ဒူးနဲ့ လည်ပင်းကိုဖိထားတဲ့ ဗီဒီယိုဟာ ဆိုရှယ်မီဒီယာတွေမှာ ပြန့်နှံ့ခဲ့ပါတယ်။

‘အသက်ရှူလို့မရတော့ဘူး’ လို့ ဖလွိုက်က အော်ခဲ့ပေမယ့် လှုပ်ရှားမှုမရှိတော့တဲ့အချိန်အထိ ရဲက ဖိထားတဲ့ဒူးကို ကြွမပေးခဲ့ပါဘူး။ ဒီအဖြစ်အပျက်မှာ ပါဝင်တဲ့ ရဲတပ်ဖွဲ့ဝင် ၄ ဦးကို မင်နီယာပိုလစ် ရဲတပ်ဖွဲ့က ထုတ်ပယ်ခဲ့ပါတယ်။

မင်နီယာပိုလစ်ပြည်သူတွေဟာ ဖလွိုက်အတွက် တရားမျှတမှုရရှိရေးအတွက် အင်္ဂါနေ့ကစတင်ကာ ဆန္ဒပြတောင်းဆိုခဲ့ကြပြီး နောက်ပိုင်းမှာတော့ ဆန္ဒပြပွဲတွေဟာ နိုင်ငံတစ်ဝှမ်း ပြန့်နှံ့သွားခဲ့ပါတယ်။ ဆန္ဒပြလူအုပ်ဟာ အဆောက်အဦးတွေ၊ ရဲစခန်းတွကို မီးရှို့ဖျက်ဆီးတာတွေ လုပ်ခဲ့ပြီး ရဲတပ်ဖွဲ့ကလည်း အင်အားသုံးနှိမ်နှင်းတာ၊ ဖမ်းဆီးတာတွေ လုပ်ဆောင်ခဲ့ပါတယ်။

အမေရိကန် ရှေ့နေချုပ်နဲ့ FBI အထူးအဖွဲ့အကြီးအကဲတို့ရဲ့ မနေ့ကထုတ်ပြန်ချက်မှာ ဒီကိစ္စကို အထူးဦးစားပေးအဖြစ်သတ်မှတ်ကာ စုံစမ်းစစ်ဆေးနေတယ်လို့ ဖော်ပြထားပါတယ်။

သမ္မတဒေါ်နယ်ထရမ့်က ဖလွိုက်သေဆုံးသွားတဲ့ ဗီဒီယိုဟာ အလွန်စက်ဆုပ်ဖွယ်ကောင်းတဲ့မြင်ကွင်းဖြစ်ပြီး မိမိတို့အစိုးရဟာ ဒီကိစ္စကို ထဲထဲဝင်ဝင် ပါဝင်ကိုင်တွယ်နေတယ်လို့ ပြေကြားခဲ့ပါတယ်။

အမေရိကန်ရဲတပ်ဖွဲ့က လူဖြူတပ်ဖွဲ့ဝင်တွေရဲ့ လက်ချက်ကြောင့် လူမည်းအရပ်သားတွေ သေဆုံးမှုဟာ အရင်ကတည်းက ရှိခဲ့ပါတယ်။ ရဲတပ်ဖွဲ့ဝင်တွေမှာ လူမျိုးရေးခွဲခြားမှုရှိတယ်ဆိုတဲ့ ပြောကြားမှုတွေ၊ ဒီအတွက် အကြီးအကျယ် ဆန္ဒပြမှုတွေလည်း ဖြစ်ပွားခဲ့ပါတယ်။

Ref: Aljazeera