Tag: US

အောက်တိုဘာ ၆၊ ၂၀၁၉
M-Media

-‘ခိုးဝင်’ (illegal alien) လို့ ခေါ်ဆိုသုံးနှုန်းမှုအပါအ၀င် လူတစ်ဦးတစ်ယောက်ကို နှိမ်ချတဲ့၊ အရှက်ရစေတဲ့ အသုံးအနှုန်းတွေ ပိတ်ပင်တဲ့ အမိန့်ညွှန်ကြားချက်တစ်ခုကို အမေရိကန်ပြည်ထောင်စု နယူးယောက်မြို့ အာဏာပိုင်တွေက ထုတ်ပြန်လိုက်ပြီး ချိုးဖောက်ရင် ဒဏ်ရိုက်ခံရမှာ ဖြစ်ပါတယ်။

အဲဒီ အမိန့်ညွှန်ကြားချက် အသစ်တွေကို ပြီးခဲ့တဲ့တစ်ပတ်က ထုတ်ပြန်ခဲ့တာဖြစ်ပြီး အင်္ဂလိပ်စကားပြော လေယူလေသိမ်းအပေါ် ခွဲခြားမှု၊ မျိုးရိုးဇာတိအပေါ် အခြေခံကာ အာဏာပိုင်များကို ခေါ်ဖမ်းခိုင်းမည်ဆိုသည့် ခြိမ်းခြောက်မှုတွေကိုလည်း တားမြစ်ထားပါတယ်။ တားမြစ်ချက်တွေကို ကျူးလွန်သူတွေဟာ ဒဏ်ငွေ ကန်ဒေါ်လာ ၂၅၀၀၀၀ အထိ အရိုက်ခံရမှာ ဖြစ်ပါတယ်။

လူ့အခွင့်အရေးဆိုင်ရာ ကော်မရှင်က ဒီအမိန့်ညွှန်ကြားချက်တွေဟာ အများပြည်သူ နေထိုင်ရာနေရာတွေ၊ လုပ်ငန်းခွင်တွေနဲ့ အိမ်ယာတွေ အားလုံးမှာ အကျုံးဝင်လိမ့်မယ်လို့ ပြောကြားခဲ့ပါတယ်။

“ဗဟိုအစိုးရက ခြောက်လုံးလှန့်လုံးတွေပြော၊ လူမျိုးရေးခွဲခြားတဲ့ ပေါ်လစီတွေ ချမှတ်ပြီး ပြောင်းရွှေ့အခြေချချ လူ့အဖွဲ့အစည်းတွေရဲ့ သာယာဝပြောမှုကို ခြိမ်းခြောက်နေတဲ့အချိန် ဒီလို အရေးပါတဲ့ ညွှန်ကြားချက်တစ်ခုကို နယူးယောက်မြို့ လူ့အခွင့်အရေး ကော်မရှင်နဲ့ ပူးပေါင်းပြီး ထုတ်ပြန်ခွင့် ရတဲ့အတွက် ကျွန်တော်တို့ ဂုဏ်ယူမိပါတယ် ” လို့ နယူးယောက် မြို့တော်ဝန်ရုံးရဲ့ တာဝန်ရှိသူ ဘီတာ မို့စ်တိုဖီက ပြောကြားခဲ့ပါတယ်။

အမေရိကန် ပြည်တွင်းလုံခြုံရေးဌာနက alien ဆိုတဲ့ စကားလုံးကို အမေရိကန်နိုင်ငံသားမဟုတ်သူ၊ အမေရိကန် ဌာနေလူမျိုး မဟုတ်သူလို့ အဓိပ္ပါယ် ဖွင့်ဆိုထားပါတယ်။

စာမျက်နှာ ၂၉ မျက်နှာပါ အခု ညွှန်ကြားချက်မှာတော့ လူမျိုးရေးခွဲခြားမှုဆိုတာ လူတစ်ဦးတစ်ယောက်ရဲ့ နိုင်ငံသားဖြစ်မှု၊ မဖြစ်မှု၊ လူမျိုးဖြစ်တည်မှုတွေကို အခြေခံကာ ပြောဆိုမှု ဖြစ်တယ်လို့ ဖော်ပြထားပါတယ်။

အထောက်အထားမရှိတဲ့ အိမ်ငှားကို လ၀ကခေါ်ကာ ဖမ်းခိုင်းမယ်လို့ ခြိမ်းခြောက်ခဲ့တဲ့ အိမ်ရှင်တစ်ဦးကို နယူးယောက်တရားရုံးက အခုလအစောပိုင်းမှာ ဒဏ်ငွေ ကန်ဒေါ်လာ ၁၇၀၀၀ ရိုက်ခဲ့ပါတယ်။ ခြိမ်းခြောက်ခံရသူအတွက် နယူးယောက် လူ့အခွင့်အရေးကော်မရှင်က ကိုယ်စားပြုတရားရင်ဆိုင်ပေးခဲ့တာ ဖြစ်ပါတယ်။

Ref: CNN