သြဂုတ် ၂၉၊ ၂၀၁၇
M-Media
– လာမည့်လတွင် ပြုလုပ်မည့် စင်ကာပူသမ္မတ ရွေးကောက်ပွဲတွင် ၀င်ရောက်ယှဉ်ပြိုင်မည့် လွှတ်တော် ဥက္ကဌဟောင်း အမျိုးသမီး ဟာလီမာ ယာကွဘ်မှာ ရွေးကောက်ပွဲ ကြွေးကြော်သံနှင့် မဲဆွယ်ရေးအဖွဲ့ကို ယနေ့တွင် ကြေငြာလိုက်သည်။
ဟာလီမာမှာ သမ္မတရွေးကောက်ပွဲကို ယှဉ်ပြိုင်ရန်အတွက် ယခုလအစောပိုင်းတွင် လွှတ်တော်ဥက္ကဌ ရာထူးမှ နှုတ်ထွက်ခဲ့သည်။
သမ္မတအဖြစ် ၀င်ရောက်ယှဉ်ပြိုင်ရေးအတွက် NTUC စင်တာတွင် ပြုလုပ်သည့် သတင်းစာရှင်းလင်ပွဲ၌ ဟာလီမာမှာ ‘စုပေါင်းညီညာ အောင်ကြောင်းဖြာ’ ဆိုသည့် ရွေးကောက်ပွဲ ဆောင်ပုဒ်ကို ထုတ်ပြန်ခဲ့သည်။
“လူတစ်ဦးချင်းစီဟာ စည်းစည်းလုံးလုံးနဲ့ လူ့အဖွဲ့အစည်းအတွက်၊ တိုင်းပြည်အတွက် ကောင်းမွန်တဲ့အရာကို ဆောင်ရွက်ဖို့ ရည်ရွယ်ပါတယ်။ ဒါဟာ အရေးကြီးဆုံး အစိတ်အပိုင်းလို့ ကျွန်မ ထင်ပါတယ်” ဟု ဟာလီမာက သူမ၏ ဆောင်ပုဒ်အကြောင်း ပြောကြားခဲ့သည်။
“လူမျိုး၊ ဘာသာစကား၊ ဘာသာတရားမရွေး စုပေါင်းညီညာအောင်ကြောင်းဖျာပြီး ကျွန်မတို့အားလုံး ဂုဏ်ယူလောက်တဲ့ စင်ကာပူနိုင်ငံဖြစ်အောင် ဆောင်ရွက်ရပါမယ်”
ဟာလီမာမှုာ ၎င်း၏ မဲဆွယ်ရေးအဖွဲ့ကိုလည်း ပြည်သူနှင့် မိတ်ဆက်ပေးခဲ့ပြီး စေတနာ့ဝန်ထမ်း ဆောင်ရွက်ပေးကြမည့် ၎င်းတို့မှာ မိမိ၏ မိတ်ဆွေကောင်းများဖြစ်သည်ဟု ပြောကြားခဲ့သည်။
ထိုအဖွဲ့တွင် Sheng Siong ကုမ္ပဏီမှ အမှုဆောင်အကြီးအကဲ Lim Hock Chee၊ လွှတ်တော်အမတ် Chia Yong Yong၊ လွှတ်တော်အမတ်ဟောင်း Mary Liew နှင့် စင်ကာပူနိုင်ငံတကာရေးရာ အင်စတီကျုမှ Simon Tay တို့ ပါဝင်သည်။
မိမိအနေဖြင့် သမ္မတဖြစ်လာပါက တိုင်းပြည်စည်းလုံးညီညွတ်ရေး လုပ်ဆောင်သွားမည်ဟု ဟာလီမာက ပြောကြားခဲ့သည်။
“သမ္မတဆိုတာ တိုင်းပြည်ကို စည်းလုံးညီညွတ်အောင် လုပ်ဆောင်ရမှာဖြစ်ပြီး၊ ကျွန်မတို့အားလုံး မျှဝေခံစားနေကြတဲ့ တန်ဖိုးတွေကို တိုင်းပြည် ကောင်းစားရေးအတွက် အသုံးချဖို့ ဦးဆောင်ရွက်ဦးရွက်ပြုရမှာ ဖြစ်ပါတယ်။ ပြီးတော့ စင်ကာပူနိုင်ငံနဲ့ စင်ကာပူပြည်သူတွေအတွက် စိတ်ရောကိုယ်ပါ အလုပ်အကျွေးပြုရမှာ ဖြစ်ပါတယ်”
ယခုတစ်ကြိမ် စင်ကာပူသမ္မတအဖြစ် တာဝန်ထမ်းဆောင်ရန် အလှည့်ကျသည့် လူ့အဖွဲ့အစည်းမှာ မလေးလူ့အဖွဲ့အစည်းဖြစ်သည်။
သမ္မတရွေးကောက်ပွဲကို စက်တင်ဘာ နှောင်ပိုင်းတွင် ကျင်းပပြုလုပ်ရန် ရှိနေပြီး ဟာလီမာယာကွဘ်မှာ မစ္စတာ ဖာရစ်ခန်း၊ မစ္စတာ မိုဟာမက် ဆာလေဟ် မာရီကန်တို့နှင့် ယှဉ်ပြိုင်ရဖွယ် ရှိနေသည်။
Ref: CNA
