ဖေဖော်ဝါရီ ၂၀၊ ၂၀၁၇
M-Media
– ၅ နှစ်ကျော် ကြာမြင့်ခဲ့ပြီဖြစ်တဲ့ ဆီးရီးယားပြည်တွင်းစစ်ပွဲကြောင့် တစ်နိုင်ငံလုံး ဖွတ်ဖွတ်ကြေခဲ့ရသလို သေဆုံးသူ ဒဏ်ရာရသူတွေကလည်း သိန်းနဲ့ချီ ရှိနေပါပြီ။
စစ်ရဲ့အနိဌာရုံတွေကို ကွက်ကွက်ကွင်းကွင်း မြင်တွေ့ရတဲ့ ဓာတ်ပုံတွေ၊ ဗီဒီယိုတွေကိုလည်း အများကြီး ပေါ်ထွက်ခဲ့ပါတယ်။
၂၀၁၅ ခုနှစ် စက်တင်ဘာလအတွင်း တူရကီကနေ ဂရိကို လာရောက်ခိုလှုံဖို့ကြိုးစားရင် စက်လှေနစ်ကာ ရေနစ်သေဆုံးပြီး ကမ်းစပ်တစ်ခုပေါ်မှာ သွားတင်နေတဲ့ အသက် ၃ နှစ်အရွယ် ကလေးငယ် အလန် ကာဒီလေးရဲ့ ပုံရိပ်၊ ၂၀၁၆ ခုနှစ် သြဂုတ်လအတွင်း အဲလစ်ပိုမြို့မှာ အစိုးရတပ်က ဗုံးကြဲတိုက်ခိုက်မှုအတွင်း ဒဏ်ရာရကာ သွေးအလိမ်းလိမ်းနဲ့ ငူငူကြီးထိုင်နေတဲ့ အိုမရန် ဒက်နီးရ်ှလေးရဲ့ ပုံရိပ်တွေဟာ ကမ္ဘာကျော်ခဲ့ပြီး ကြေကွဲစရာ၊ ဂရုဏာသက်စရာ အကောင်းဆုံး ပုံရိပ်တွေ ဖြစ်ခဲ့ပါတယ်။
အခုလည်း နောက်ထပ် သွေးပျက်ဖွယ် ပုံရိပ်တစ်ခု ထွက်ပေါ်လာခဲ့ပါတယ်။
ဒါက အစ်ဒလစ်မြို့မှာ ပြီးခဲ့တဲ့ ရက်ပိုင်းအတွင်း ဆီးရီးယားအစိုးရတပ်ရဲ့ စီးနင်းတိုက်ခိုက်မှုအတွင်း ခြေထောက် ၂ ဖက်စလုံး ဆုံးရှုံးခဲ့ရတဲ့ သနားစရာ ကလေးငယ်တစ်ဦးဟာ ဖခင်ဖြစ်သူကို အကူအညီတောင်းတဲ့ ဗီဒီယိုပါ။
ကလေးငယ်ရဲ့ နာမည်ကတော့ အဘ်ဒူလ်ဘာဆစ် တန် အလ်-ဆာတွဖ်လို့ ခေါ်ပြီး တိုက်ခိုက်မှုအတွင်းမှာ အဘ်ဒူလ်ဘာဆစ်လေးရဲ့ အမေနဲ့ မောင်နှမ ၃ ဦး အသက်ဆုံးရှုံးခဲ့ရတယ်လို့ ဆီးရီးယား တက်ကြွလှုပ်ရှားသူ တစ်ဦးက ပြောကြားခဲ့ပါတယ်။
ဗီဒီယိုမှာ တိုက်ခိုက်မှုကြောင့် မီခိုးတစ်လူလူထွက်နေတဲ့ အဆောက်အဦးအနီး မြေပြင်ပေါ်မှာ ထိုင်နေရတဲ့ ဒီကလေးငယ်ဟာ ‘သားကို လာခေါ်ပါအုံး ဖေဖေ။ လာခေါ်ပါ’ လို့ အကူအညီတောင်းနေသံကို ပီပီသသ ကြားခဲ့ရပါတယ်။ ဒီကလေးငယ်ဟာ ဟာမာမြို့အနီး အလာတမ်နီဟ်က ဒုက္ခသည်တစ်ဦးဖြစ်ပြီး လက်ရှိမှာတော့ ဆေးရုံမှာ ဆေးကုသမှုခံယူကာ စိုးရိမ်ရတဲ့ အခြေအနေမျိုး ရှိတယ်လို့ ဆိုပါတယ်။
https://www.youtube.com/watch?v=IywVaNm6f6E
Ref: Alarabiya, The Sun
