ဒီဇင်ဘာ ၂၃၊ ၂၀၂၁
M-Media
-အနည်းဆုံး လွန်ခဲ့တဲ့နှစ်ပေါင်း ၆၆ သန်းလောက်ကလို့ ယုံကြည်ရတဲ့ ဒိုင်နိုဆောသားလောင်း ကျောက်ဖြစ်ရုပ်ကြွင်းကို တရုတ်နိုင်ငံမှာ ပကတိအနေအထားအတိုင်း တူးဖော်တွေ့ရှိခဲ့ပြီး ငှက်တွေနဲ့ ဒိုင်နိုဆောတွေအကြား ဆက်စပ်မှုကို ပိုမိုနားလည်နိုင်လိမ့်မယ်လို့ သိပ္ပံပညာရှင်တွေက ယူဆနေကြပါတယ်။
နိုင်ငံတောင်ပိုင်း ကွမ်ကျိုးမှာ တူးဖော်ရရှိခဲ့တဲ့ ဒီ ဒိုင်နိုဆော သန္ဓေသားလောင်းကို Baby Yingliang လို့ အမည်ပေးထားပါတယ်။ နောက်ခြေထောက်ကြီးပြီး ရှေ့ခြေထောက်ငယ်ကာ သွားမရှိတဲ့ ဒိုင်နိုဆောမျိုးစိတ် (Oviraptorosaur) က ဖြစ်ပါတယ်။
ကျောက်ဖြစ်ရုပ်ကြွင်းမှာ ဒိုင်နိုင်ဆော သန္ဓေသားလောင်းရဲ့ ခန္ဓာကိုယ်ဟာ ကွေးနေပြီး ခေါင်းက ခန္ဓာကိုယ်ကြားထဲဝင်ကာ ခြေနှစ်ဖက်က ဘေးနှစ်ဖက်မှာ ထောင်နေတဲ့ အနေအထားမျိုးပါ။ ဒါဟာ ဥကနေ အကောင်ပေါက်လာတော့မယ့်ပုံစံဖြစ်ပြီး အရင်ဒိုင်နိုဆောနဲ့ပတ်သက်တဲ့ တွေ့ရှိမှုတွေမှာ လုံး၀မမြင်ရတဲ့ အနေအထားမျိုးဖြစ်ပါတယ်။ ယနေ့ခေတ် ငှက်တွေ အကောင်ပေါက်လာတဲ့အနေအထားမျိုးနဲ့လည်း ဆင်တူပါတယ်။
“သမိုင်းတစ်လျှောက် တွေ့ခဲ့သမျှ ဒိုင်နိုဆော သန္ဓေသားလောင်းတွေထဲမှာ အကောင်းဆုံးဖြစ်ပါတယ်” လို့ ဘာမင်ဂမ်တက္ကသိုလ်က သုတေသနပညာရှင် ဖီအွန် ဝေစံမာက ပြောပါတယ်။
ယနေ့ခေတ် ငှက်တွေ အကောင်အပေါက်တဲ့ပုံစံဟာ အရင်ခေတ်က ဒိုင်နိုဆောတွေရဲ့ သဘာ၀ကို အမွေခံထားတယ်ဆိုတာ ဖော်ပြနေတယ်လို့လည်း သူမက ထည့်သွင်းပြောဆိုခဲ့ပါတယ်။
ရုပ်ကြွင်းဟာ လွန်ခဲ့တဲ့ နှစ်သန်းပေါင်း ၇၂ သန်းကနေ ၆၆ သန်းကြားက ရုပ်ကြွင်းမျိုးဖြစ်ပြီး ဥပေါက်မယ့်အချိန် မြေပြိုမှုကြောင့် အခုလို ရုပ်ကြွင်းဖြစ်လာတယ်လို့ သိပ္ပံပညာရှင်တွေက သုံးသပ်ပါတယ်။ တကယ်လို့သာ အကောင်ပေါက်ခဲ့ရင် ဒိုင်နိုဆောဟာ ၆ ပေခွဲကနေ ၁၀ ပေလောက်အထိ ကြီးထွားလာနိုင်တယ်လို့လည်း ဆိုပါတယ်။
Oviraptorosaur ဒိုင်နိုဆောတွေဟာ အမွှေးပါတဲ့ ဒိုင်နိုဆောမျိုးစိတ်ဖြစ်ပြီး Late Cretaceous ခေတ်ကာလအတွင်း ယနေ့ခေတ် အာရှနဲ့ မြောက်အမေရိက ဒေသတွေမှာ နေထိုင်ကျက်စားခဲ့တယ်လို့ သိပ္ပံပညာတွေက ယူဆထားပါတယ်။
Ref: Reuters
