သြဂုတ် ၂၅ ၊ ၂၀၁၄
M-Media
– အလ်ဂျီးရီးယား ကလပ် JS Kabylie အသင်းမှ ကင်မရွန်းတိုက်စစ်မှူးတစ်ဦးမှာ ကျောက်တုံးဖြင့် ပစ်ပေါက်ခံရမှုကြောင့် သေဆုံးသွားခဲ့သည်ဟု သိရသည်။
USM Alger အသင်းအား ၂ ဂိုး ၁ ဂိုးဖြင့် အနိုင်ရရှိခဲ့သည့် ယမန်နေ့ပွဲတွင် တစ်ဂိုးသွင်းယူပေးခဲ့သည့် တိုက်စစ်မှူး အဲလ်ဘာတ် အီဘိုစီမှာ ပွဲအပြီးတွင် ကွင်းအတွင်းမှ ထွက်ခွာစဉ် ပစ်ပေါက်ခံခဲ့ရခြင်းဖြစ်ပြီး လူနာတင်ယာဉ်ဖြင့် ဆေးရုံသို့ခေါ်ဆောင်သွားစဉ် လမ်းတစ်ဝက်မှာပင် သေဆုံးသွားခဲ့ခြင်းဖြစ်သည်။
“စိတ်ပျက်ရပါတယ်။ ဒီလိုဖြစ်မယ်မှန်း မသိခဲ့ပါဘူး။ သူဟာ ကျွန်တော့်လက်ထဲမှာ သေဆုံးခဲ့တာပါ။ သူ့ကို(အီဘိုစီကို) ထာဝရ ဆုံးရှုံးသွားရပြီဆိုတာ ယုံတောင် မယုံနိုင်ပါဘူး။ သူဟာ တကယ်ကောင်းတဲ့သူပါ။ ငြိမ်းချမ်းတဲ့ဘုံဘ၀ ရောက်ရှိပါစေ” ဟု အီဘိုစီအား ဆေးရုံသို့ လိုက်ပါပို့ဆောင်ခဲ့သည့် အသင်းခေါင်းဆောင် အလီရီအဲလ်က ပြောကြားခဲ့သည်။
အသင်းဖော်တစ်ဦးဖြစ်သူ ဂျမီးလွဒ်ဒီန်းကလည်း အီဘိုစီသေဆုံးရမှုအတွက် အလွန်ဝမ်းနည်းမိကြောင်း၊ ယခုအဖြစ်အပျက်မှာ တစ်နိုင်ငံလုံးအတွက် အရှက်စရာဖြစ်ကြောင်း ပြောကြားခဲ့သည်။
JS Kabylie အသင်းကမူ ပြည်ထဲရေးဝန်ကြီးဌာနနှင့် ပြည်နယ်အစိုးရတို့၏ ညွှန်ကြားမှုဖြင့် အီဘိုစီသေဆုံးရခြင်းအတွက် စုံးစမ်းစစ်ဆေးမှုများကို ပြုလုပ်နေကြောင်း ကြေညာချက်ထုတ်ပြန်ခဲ့သည်။
