ဒီဇင်ဘာ ၂၄၊ ၂၀၁၃
M-Media
သီရိ
ရန်ကုန် ။ ။ ရန်ကုန်။ ။ ၂၇ ကြိမ်မြောက် အရှေ့တောင်အာရှ အားကစားပြိုင်ပွဲ ဖွင့်ပွဲအထိမ်းအမှတ် မီးရှူးတိုင်သယ်ဆောင်သည့် အခမ်အနားတွင် နိုင်ငံအတွက် အာရှနှင့် အရှေ့တောင် အာရှ အားကစားပြိုင်ပွဲများတွင် ဆုတံဆိပ်များ ဆွတ်ခူးပေးခဲ့သော မြန်မာမွတ်စလင် အားကစားသမားများ ဖြစ်ကြသည့် ဒေါ်ဘေဘီ(ဘော်လီဘော)၊ ဦးအေးလွင်(ဘောလီဘော)၊ ဦးဝင်းမောင်(လက်ဝှေ့)၊ ဦးမောင်လှ(ပြေးခုန်ပစ်)၊ ဦးသိန်းလွင်(လက်ဝှေ့) တို့ ပါဝင်သယ်ဆောင်ခွင့်ရခဲ့ရရှိခဲ့ပါသည်။ အဆိုပါ (၅) ဦး အနက်မှာ နိုင်ငံတကာ ပြိုင်ပွဲများ တွင် ဘောလီဘော နည်းပြ တာဝန်ဖြင့် တိုင်းပြည်အတွက် ဆုတံဆိပ်များ ရရှိအောင် စွမ်းဆောင်ပေးခဲ့သူ ဘောလီဘော လက်ရွေးစင်ဟောင်း ဒေါ်ဘေဘီကို M-Media မှ တွေ့ဆုံမေးမြန်းခွင့်ရရှိခဲ့ပါသည်။
M-Media – အန်တီရဲ့မွေးသက္ကရာဇ်နဲ့ မိသားစုအကြောင်းလေးကို ပြောပြပေးပါ။
ဖြေ – ဇွန်လ-၁၄ ရက် ၁၉၄၈-ခုနှစ်မှာ အဖ ဦးစု အမိ ဒေါ်မွန်တို့မှာ ရှမ်းပြည်မြောက်ပိုင်း နမ့်ခမ်းမှာ မွေးခဲ့တယ်၊ ဦးစိုးသိန်းနဲ့အိမ်ထောင်ကျပြီး သမီးနှစ်ယောက်ထွန်းကားခဲ့တယ်။
M-Media – အန်တီငယ်စဉ်တုန်းက ဘယ်ကျောင်းမှာ ပညာသင်ကြားခဲ့ပါသလဲ။
ဖြေ – သူငယ်တန်းကနေ စပြီး ၇-တန်းထိ မြစ်ကြီးနားမှာတက်ခဲ့တယ်၊ ၈-တန်းရောက်တော့ ရန်ကုန်ပြောင်းလာခဲ့တယ်။
M-Media – အန်တီအားကစားကိုဘယ်အချိန်မှာ စပြိုင်ခဲ့တာပါလဲ။ ဘယ်လိုပြိုင်ပွဲတွေ ပြိုင်ဖြစ်ခဲ့ပါသလဲ။
ဖြေ – အန်တီငယ်ငယ်လေးကတည်းက အားကစားဆို အကုန် စိတ်ဝင်စားတယ်။ ကျောင်းကပြိုင်ပွဲတွေမှာ ဆိုရင်အကုန်ဝင်ပြိုင်တယ်၊ အားသန်တဲ့ ကစားနည်းဆိုပြီးမရှိခဲ့ဘူးပေါ့။ နောက်မှအားသန်ရာဖြစ်လာတာ။ ငယ်ငယ်ကအကုန်ဆော့တယ် စာကိုလဲစိတ်မ၀င်စားတော့ဘူး အားကစား ကိုပဲ စိတ်နှစ်ထားတယ်။ ၁၉၆၅ မြန်မာတစ်နိုင်ငံလုံးကျောင်းသား အားကစားပွဲတော်မှာ အန်တီ ကြက်တောင်ရိုက် ပြိုင်ပွဲမှာ ငွေတံဆိပ်ရခဲ့တယ်။ ၇-တန်းပေါ့ ၁၉၆၆ မှာ ဘော်လီဘော တိုင်းနဲ့ပြည်နယ်မှာ အရွေးခံရတယ်၊ အဲဒီပွဲမှာ အကောင်းဆုံးဆုကိုရခဲ့တယ်၊ ၅-ကြိမ်မြောက် ASIAN GAME မှာ အန်တီ လက်ရွေးစင်အနေနဲ့ သွားပြိုင်ခဲ့ရတယ်၊ အဲဒီမှာတော့ နံပါတ် ၆ ပဲရခဲ့တယ်၊ ၁၉၆၇ ခုနှစ်မှာ ၄ ကြိမ်မြောက် SEAP GAME ပွဲမှာ ငွေတံဆိပ်ဆုရခဲ့တယ်၊ အဲဒီနောက်အန်တီ ကချင်ပြည်နယ်မှာ နည်းပြဆရာကို ၁၀ နှစ်လောက်လုပ်ခဲ့တယ်၊ နည်းပြလဲလုပ် ပြိုင်ပွဲတွေရှိရင်လဲ ၀င်ပြိုင်ပေါ့ နှစ်ခုလုံးလုပ်တယ် တံခွန်စိုက်ပွဲတွေကိုလဲ အမြဲဝင်ပြိုင်တယ်၊ ၁၉၆၉ မှာ မြန်မာအိမ်ရှင်ဖြစ်တဲ့ အရှေ့တောင်အာရှကျွန်းဆွယ် Seap Game မှာ ရွှေတံဆိပ်ဆုရခဲ့တယ်။ ၁၉၇၃ မှာ ဘောလီဘောအဖွဲ့ချုပ် က ပေးတဲ့ မြန်မာပြည်မှာ ပထမဆုံးနဲ့ နောက်ဆုံးပေးတာဖြစ်တဲ့ အမျိုးသမီး အကောင်းဆုံး နည်းပြဆရာဆုကိုရခဲ့တယ်၊ ၁၉၇၃ ထိ အန်တီ လက်ရွေးစင် ဖြစ်ခဲ့တယ်။ နောက်တော့ အန်တီနားလိုက်တယ်။
M-Media – အခု ၂၇-ကြိမ်မြောက် SEA GAME ပွဲမှာရောအန်တီ ဘယ်လိုမျိုးတွေ လုပ်ဆောင်ခဲ့ရပါသလဲ။
ဖြေ – ရန်ကုန်မှာ အန်တီ မီးရှုးတိုင်ကိုင်ရတယ်၊ နောက် နေပြည်တော်ကိုလိုက်သွားပြီးတော့ ဘော်လီဘော်ပြိုင်ပွဲ တစ်လျှောက်လုံး လူကြီးတစ်ယောက် အနေနဲ့ ဘေးကနေကြည့်ပေးဖို့ အန်တီတို့ အရင်က ကစားသမားဟောင်းတွေကိုခေါ်တော့ အန်တီသွားရောက် ဆောင်ရွက်ပေးခဲ့တယ်။
M-Media – အန်တီအနေနဲ့ SEA GAME ပွဲမှာရော ဘယ်လိုပီတိတွေရခဲ့ပါသလဲ။
ဖြေ – အရမ်းပျော်မိတာပေါ့ ဟိုးအရင်ကကွဲကွာနေတဲ့ သူငယ်ချင်းဟောင်းကစားသမားဟောင်းတွေကိုလဲ တစ်နေရာတည်းမှာတွေ့ရတယ်။ မြန်မာ ပြည်မှာတစ်ခါမှ မမြင်ဖူးတဲ့ ကြီးကျယ်ခမ်းနားတဲ့ပွဲကြီးကိုလည်း တွေ့မြင်ရတော့ နိုင်ငံသားတစ်ယောက်အနေနဲ့ ပီတိဖြစ်မိတယ်။ နောက်ဆုံးပိတ်ပွဲနေ့ က ဆိုရင်နောက်ဆုံးအပိတ်သီချင်းမှာ သူငယ်ချင်းတွေနဲ့အတူ အရမ်းပျော်ခဲ့တယ်။ ခွဲခွာကြရတော့မယ် ပြီးတော့မယ်ဆိုတော့လည်း တစ်မျိုးကြီးပဲ ခံစားရတာပေါ့ စိတ်မကောင်းဘူး။
M-Media – SEA GAME ပွဲမှာရော ဘော်လီဘောအနေနဲ့ ဘယ်လိုဆုတွေရယူခဲ့ပါသလဲ။
ဖြေ – ဘော်လီဘော ပွဲကတော့ အဆင့် (၄) နေရာပဲချိတ်တယ်။
M-Media – အန်တီအနေနဲ့ ကစားသမားတွေကိုဘယ်လိုသုံးသပ်မိပါသလဲ။
ဖြေ – ဆုမရတော့ အရမ်းကိုစိတ်မကောင်းဖြစ်မိတယ်၊ သေချာကြိုးစားမှ ပြိုင်ပွဲဆိုတာဆုရမှာလေ။ အဲဒီတော့အများကြီးလိုသေးတယ်။ကစားသမားတွေရော၊ သင်တဲ့လူတွေရော သေချာလုပ်ဖို့လိုအပ်ပါတယ်။
M-Media – အန်တီ နောက်အနာဂတ်သားကောင်းလေးတွေကို ဘာများပြောကြားချင်ပါသလဲ။
ဖြေ – ဆုမရလို့စိတ်ဓာတ်မကျပါနဲ့ နောက်လာမဲ့ပြိုင်ပွဲတွေမှာ သေချာကြိုးစားရင် ရွှေတံဆိပ်ဆုကိုဆွတ်ခူးနိုင်မှာ ဖြစ်ပါတယ်။
M-Media – အခုလို ဖြေကြားပေးတဲ့ အန်တီ့ကို ကျေးဇူးအများကြီးတင်ပါတယ်။
ဖြေ – အန်တီကလည်း ကျေးဇူးတင်ပါတယ်။
—————————————-
** M-Media ၏ မူပိုင် သတင်း/ဆောင်းပါးများ၊ ဘာသာပြန် များကို အွန်လိုင်းမီဒီယာများတွင် မည်သူမဆို လွတ်လပ်စွာကူးယူဖော်ပြနိုင်ပါသည်။ ကူးယူဖော်ပြသူများအနေဖြင့် M-Media မူရင်းလင့်ခ်ကို ထည့်ပေးဖို့ မေတ္တာရပ်ခံအပ်ပါသည်။
M-Media ၏ ခွင့်ပြုချက်မရှိဘဲ စီးပွားဖြစ် ထုတ်ဝေသော Print Media များတွင် ထည့်သွင်းဖော်ပြခြင်းများ လုံးဝ ခွင့်မပြုပါ။
ဆက်သွယ်ရန် [email protected]
