Blog

M-Media

အစ္စရေးစစ်သား ၁၅ ဦးကို ဟားမက်စ် သုတ်သင်
——-
ဂါဇာမြောက်ပိုင်းကို ကျူးကျော်လာတဲ့ အစ္စရေးစစ်သားသား ၁၅ ဦးကို ပြီးခဲ့တဲ့ရက်ပိုင်းမှာ သုတ်သင်နိုင်ခဲ့တယ်လို့ ပါလက်စတိုင်းလွတ်မြောက်ရေးအဖွဲ့ ဟားမက်စ်က ထုတ်ပြန်ပါတယ်။ တင့်ဖျက်ဒုံး၊ လက်ပစ်ဗုံး၊ လက်နက်ငယ်တွေနဲ့ အနီးကပ်တိုက်ခိုက်ခဲ့တာလို့ ဆိုပါတယ်။ ၂၀၂၃ ခုနှစ် အောက်တိုဘာက စတင်ပြီး ဂါဇာမှာ ဟားမက်စ်အဖွဲ့က သုတ်သင်နိုင်ခဲ့တဲ့ အစ္စရေးစစ်သား အနည်းဆုံး ၃၇၀ ရှိပြီဖြစ်ပါတယ်။

လူ နေအိမ်ယာ ၃ ခုကို အစ္စရေးက တိုက်ခိုက်
——
ဂါဇာက ဂျာဘာလီယာ ဒုက္ခသည်စခန်း၊ လက်ဘနွန်က ဘေရွတ်မြို့နဲ့ ဆီရီးယား ဒမတ်စကတ်မြို့တွေက လူနေအိမ်ယာတွေကို အစ္စရေးက တနင်္ဂနွေမှာ အကြမ်းဖက်တိုက်ခိုက်ခဲ့ပြီး ကလေးငယ် ၂၂ ဦးအပါအ၀င် လူ ၇၀ ထက်မနည်း သေဆုံးခဲ့ပါတယ်။ အစ္စရေးဟာ ဂါဇာနဲ့ လက်ဘနွန်မှာ တိုက်ခိုက်သတ်ဖြတ်မှုတွေကို တိုးမြှင့် လုပ်ဆောင်နေပါတယ်။

လူ့အခွင့်အရေး စောင့်ကြည့်သူ မိသားစုတစ်ခုလုံး အသတ်ခံရ
——-
ပါလက်စတိုင်း လူ့အခွင့်အရေးစောင့်ကြည့်အဖွဲ့ (PCHR) က သုတေသနပညာရှင် မိုဟာမက် အလ်လုရှ်ရဲ့ မိသားစု၀င် ၂၄ ဦးကို အစ္စရေးက ဂါဇာကမ်းမြှောင်မှာ သတ်ဖြတ်ခဲ့ပါတယ်။ သတ်ဖြတ်ခံရသူအားလုံးဟာ စစ်ရှောင်တွေဖြစ်ပြီး ကလေးငယ် ၁၄ ဦးနဲ့ အမျိုးသမီး ၆ ဦး ပါ၀င်ပါတယ်။ အဲဒီထဲက တစ်ချို့ဟာ အစ္စရေးရဲ့ အရင်က တိုက်ခိုက်မှုတွေကြောင့် ကိုယ်လက်အင်္ဂါဆုံးရှုံးခဲ့ကြသူတွေ ဖြစ်ပါတယ်။

Ref: Aljazeera

နို၀င်ဘာ ၁၁၊ ၂၀၂၄
M-Media

-အစ္စရေးဘောလုံးအသင်း Maccabi Tel Aviv ရဲ့ ပရိတ်သတ်တွေ အမ်စတာဒမ်မြို့မှာ ပြီးခဲ့တဲ့တစ်ပတ်က တိုက်ခိုက်ခံခဲ့ရပြီးနောက် နယ်သာလန်အစိုးရဟာ ပါလက်စတိုင်းထောက်ခံမှု ဆန္ဒပြပွဲတွေကို ပိတ်ပင်လိုက်ပါတယ်။

အေဂျက်အသင်းနဲ့ ယူရိုပါလိဂ်ပွဲအတွက် အားပေးဖို့ လာရောက်ကြတဲ့ အစ္စရေးပရိတ်သတ်တွေဟာ ပွဲမတိုင်ခင်တစ်ရက် ဗုဒ္ဓဟူးနေ့က မြို့လယ်ကောင် Dam ရင်ပြင်မှာ စု၀ေးပြီး ပါလက်စတိုင်းဆန့်ကျင်ရေး၊ အာရပ်ဆန့်ကျင်ရေး လုပ်ဆောင်ခဲ့ကြပါတယ်။

လူရာချီပါ၀င်တဲ့ စု၀ေးပွဲမှာ ပါလက်စတိုင်းအလံကို မီးရှို့ခဲ့ပြီး ‘အစ္စရေးစစ်တပ်အောင်မြင်ပါစေ၊ မ-ေ -ိုး အာရပ်တွေ’ ‘မ-ေ -ိုး ပါလက်စတိုင်းတွေ’ ‘ဂါဇာမှာ ကလေးတစ်ယောက်တောင် အရှင်မထားနဲ့’ စသဖြင့် ဟစ်အော်ခဲ့ကြပါတယ်။

အမ်စတာဒမ်က ပါလက်စတိုင်းအလံလွှင့်ထားတဲ့ နေအိမ်တိုက်ခန်းတွေကိုလည်း အစ္စရေးပရိတ်သတ်တွေက တိုက်ခိုက်ခဲ့ကြတယ်လို့ မြို့တော်ကောင်စီအဖွဲ့၀င် Jazie Veldhuyzen က ပြောပါတယ်။

ကြာသာပတေးနေ့ပွဲကို သွားကြည့်တဲ့အခါမှာလည်း ဂျူးလူအုပ်ဟာ အာရပ်ဆန့်ကျင်ရေး ကျွေးကြော်သံတွေကို ဟစ်အော်ခဲ့ကြပါတယ်။ အေဂျက်က ၅ ဂိုးပြတ်နဲ့ နိုင်တဲ့ပွဲအပြီး Dam ရင်ပြင်ကို ဆန္ဒပြဖို့ ထပ်အသွားမှာ ပါလက်စတိုင်းထောက်ခံသူတွေနဲ့တွေ့ပြီး တိုက်ခိုက်ခံခဲ့ရတာ ဖြစ်ပါတယ်။

ဒီအဖြစ်အပျက်အတွင်း Maccabi Tel Aviv ပရိတ်သတ် ၃၀ နီးပါး အသေးစားဒဏ်ရာတွေ ရခဲ့ပြီး၊ အနည်းဆုံး ၆ ဦးကို ဆေးရုံတင်ခဲ့ရပါတယ်။

တိုက်ခိုက်မှုကို ဂျူးဆန့်ကျင်ရေးလုပ်ရပ်အဖြစ် နယ်သာလန်အစိုးရက သတ်မှတ်ခဲ့ပြီး ပါ၀င်ပတ်သတ်သူ ၁၀၀ နီးပါးကို ဖမ်းဆီးထားတယ်လို့ ထုတ်ပြန်ခဲ့ပါတယ်။

Ref: Aljazeera