Blog

M-Media

နှစ်သစ်ကူးနေ့တွင် လူ ၃၀ နီးပါး အသတ်ခံရ
—-
ဇန်န၀ါရီ ၁ ရက်နေ့ ဂါဇာကမ်းမြှောင်တစ်၀ှမ်း စစ်ရှောင်စခန်းတွေကို အစ္စရေးရဲ့ တိုက်ခိုက်မှုကြောင့် အနည်းဆုံး ၂၈ ဦး သေဆုံးခဲ့ပြီး အများစုက အမျိုးသမီးတွေနဲ့ ကလေးငယ်တွေ ဖြစ်ပါတယ်။ ၂၀၂၃ အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲအတွင်း အသတ်ခံရသူ အရေအတွက်ဟာ ၄၆၀၀၀ နီးပါး ရှိလာခဲ့ပြီး ပျောက်ဆုံးနေသူအရေအတွက်ဟာ ၁၁၀၀၀ ကျော် ရှိနေပါတယ်။

အေးခဲမှုကြောင့် ရင်ခွင်ပိုက် ကလေးငယ်သေဆုံးမှု ၇ ဦး ရှိပြီ
———
ပြီးခဲ့တဲ့ ရက်အနည်းငယ်အတွင်း ဂါဇာကမ်းမြှောင်မှာ ရာသီဥတု အေးခဲမှုကြောင့် သေဆုံးတဲ့ ရင်ခွင်ပိုက် ကလေးငယ် အရေအတွက်ဟာ ၇ ဦးအထိ ရှိလာပြီဖြစ်ပါတယ်။ အစ္စရေးရဲ့ အကြမ်းဖက် တိုက်ခိုက် သတ်ဖြတ်မှုတွေ၊ နိုင်ငံတကာ အကူအညီတွေကို ဟန့်တားမှု၊ ဆေးရုံ ဆေးခန်းတွေကို အကြမ်းဖက်မှုတွေကြောင့် ပါလက်စတိုင်းပြည်သူတွေဟာ နောက်ဆက်တွဲ ဆိုးကျိုးတွေကို ခါးစည်း ခံနေကြရတာ ဖြစ်ပါတယ်။

အလ်အက်ဆာဗလီ ကျူးကျော်ခံရမှု မြင့်တက်လာ
———
ပါလက်စတိုင်းနိုင်ငံ ဂျေရုစလင်မြို့က အလ်အက်ဆာဗလီ၀င်းအတွင်း ဂျူးအစွန်းရောက်တွေ ၀င်ရောက် ကျူးကျော်မှု အရေအတွက်ဟာ ဒီဇင်ဘာလအတွင်း သိသိသာသာ မြင့်တက်လာပါတယ်။ ဗလီ၀င်းအတွင်း ဂျူးတွေ၀င်ရောက်ကာ ပူဇော်ပသမှုတွေ မလုပ်ဆောင်ဖို့ ပါလက်စတိုင်းနဲ့ အစ္စရေးတို့ အရင်ကတည်းက သဘောတူညီထားကြတာ ဖြစ်ပါတယ်။ ဒါပေမယ့် အစ္စရေးလုံခြုံရေးတပ်ဖွဲ့တွေရဲ့ အကူအညီနဲ့ အစ္စရေးအစိုးရအဖွဲ့၀င်တွေ၊ ဂျူးအစွန်းရောက်တွေ ပုံမှန်လိုလို ၀င်ရောက်ကျူးကျော်နေကြတာ ဖြစ်ပါတယ်။

M-Media

Kamal Adwan ဆေးရုံကို အစ္စရေးက မီးရှို့
————–
ဂါဇာမြောက်ပိုင်းက Kamal Adwan ဆေးရုံကို လနဲ့ချီ ဗုံးကြဲတိုက်ခိုက်ပြီးတဲ့နောက် သောကြာနေ့မှာ အစ္စရေးစစ်သားတွေ ၀င်ရောက်စီးနင်းခဲ့ပါတယ်။ ဆေး၀န်ထမ်းတွေနဲ့ လူနာတွေအားလုံးကို မောင်းထုတ်ခဲ့ပြီး၊ ဆေးရုံဒါရိုက်တာအပါအ၀င် လူအများအပြားကို ဖမ်းဆီးသွားခဲ့ကာ ဆေးရုံကိုလည်း မီးရှို့ခဲ့ပါတယ်။ ဆေးရုံကို အစ္စရေးရဲ့ တရစပ်တိုက်ခိုက်မှုအတွင်း ၀န်ထမ်းတွေ၊ လူနာတွေနဲ့ ဆေးရုံ၀န်းထဲက စစ်ရှောင်အများအပြား သေဆုံးခဲ့ပါတယ်။

ရာမာလာမှ ပါလက်စတိုင်းလယ်သမားများ တိုက်ခိုက်ခံရ
——–
ပါလက်စတိုင်းပိုင်နက်နောက်တစ်ခုဖြစ်တဲ့ အနောက်ဖက်ကမ်းက ရာမာလာမြို့မှာ ပါလက်စတိုင်း လယ်သမားတွေကို တရားမ၀င် ဂျူးအခြေချ နေထိုင်သူတွေက ဒီကနေ့မနက်ပိုင်းမှာ တိုက်ခိုက်ခဲ့ပြီး ၃ ဦး ဒဏ်ရာရကာ တစ်ဦး ဓားစားခံအဖြစ် ဖမ်းဆီးခေါ်ဆောင်ခြင်း ခံခဲ့ရပါတယ်။ ဂျူးအခြေချနေထိုင်သူတွေဟာ ဌာနေပါလက်စတိုင်းတွေကို မကြာခန အကြမ်းဖက် တိုက်ခိုက် သတ်ဖြတ်လေ့ ရှိပါတယ်။

ဂါဇာအလယ်ပိုင်းမှ တိုက်ခိုက်မှု
———
ဂါဇာကမ်းမြှောင်အလယ်ပိုင်းက မဂ်ဟာဇီ ဒုက္ခသည်စခန်းကို အစ္စရေးက ဒီကနေ့ ထပ်မံတိုက်ခိုက်ခဲ့ရာမှာ အသက် ၁၂ နှစ်အရွယ် မိန်းကလေးငယ်တစ်ဦး အပါအ၀င် ၉ ဦး သေဆုံးခဲ့ပါတယ်။ ပြီးခဲ့တဲ့နှစ် အောက်တိုဘာက စတင်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲအတွင်း အသတ်ခံရသူ အရေအတွက်ဟာ ၄၆၀၀၀ နီးပါး ရှိလာပြီ ဖြစ်ပါတယ်။

Ref: Aljazeera

ဒီဇင်ဘာ ၂၂၊ ၂၀၂၄
M-Media

-ပါလက်စတိုင်းနိုင်ငံ ဂါဇာကမ်းမြှောင်မှာ အစ္စရေးက ပါလက်စတိုင်းပြည်သူတွေအပေါ် အကြမ်းဖက်သတ်ဖြတ်မှုကို ပုပ်ရဟန်းမင်းကြီး ဖရန်စစ်က ပြင်းပြင်းထန်ထန် ရှုတ်ချလိုက်ပါတယ်။

“မနေ့က ကလေးတွေ ဗုံးကြဲသတ်ဖြတ်ခံရတယ်။ ဒါဟာ စစ်ပွဲမဟုတ်ပါဘူး။ ရက်စက်ယုတ်မာမှုပါ။ စိတ်နှလုံး ထိခိုက်နာကျင်လွန်းလို့ ဒီလို ထုတ်ပြောရတာပါ” လို့ ဒီဇင်ဘာ ၂၁ ရက်နေ့ ဗာတီကန်အုပ်ချုပ်ရေးအဖွဲ့ အစည်းအ၀ေးမှာ ပြောကြားခဲ့ပါတယ်။

ဂျေရုစလင်ရဲ့ ခရစ်ယာန်ကက်သလစ်အသင်းတော် ခေါင်းဆောင် ရဟန်းမင်း ပီဇာဘဲလာကို အစ္စရေးက ၀င်ရောက်ခွင့်မပေးတာကိုလည်း ဖရန်စစ်က ၀ေဖန်ခဲ့ပါတယ်။

ကမ္ဘာ့ ခရစ်ယာန်ကက်သလစ်အသင်းတော် ခေါင်းဆောင်တစ်ဦးဖြစ်တဲ့ ပုပ်ရဟန်းမင်းကြီး ဖရန်စစ်ဟာ ပုံမှန်အားဖြင့် ကမ္ဘာပဋိပက္ခတွေမှာ တစ်ဖက်တည်းက ရပ်တည်လေ့မရှိပါဘူး။ ဒါပေမယ့် ပါလက်စတိုင်းက အစ္စရေးရဲ့ အကြမ်းဖက်မှုနဲ့ ပတ်သက်ပြီး အကြိမ်ပေါင်းများစွာ ၀ေဖန်ရှုတ်ချခဲ့ပြီး၊ နိုင်ငံတကာအသိုင်းအ၀ိုင်းက တားဆီးဖို့ ပျက်ကွက်မှုကိုလည်း ထောက်ပြခဲ့ပါတယ်။

ပြီးခဲ့တဲ့နှစ် အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ အသတ်ခံရသူ အရေအတွက်ဟာ ၄၅၀၀၀ ကျော်လာပြီး၊ အများစုဟာ ကလေးတွေနဲ့ အမျိုးသမီးတွေ ဖြစ်ပါတယ်။

Ref: Reuters