ကမ္ဘာကို တိုးတက်ပြောင်းလဲစေခဲ့သည့် မွတ်စလင်တို့၏ ဆန်းသစ် တီထွင်မှုများ – ၁ (စာသင်ကျောင်းများ)

မေ ၂၂၊ ၂၀၁၄
M-Media
Credit to -အောင်သန်းလွင် (UCSY)

အတိတ်ခေတ် ကာလမှာ မွတ်စလင်တွေ ဗလီဝတ်ကျောင်းတော်တွေကို သွားခဲ့ကြရာမှာ ဝတ်ပြုမှု သက်သက်အတွက်ပဲ မဟုတ်ခဲ့ပါ။ ဗလီတွေဟာ သတင်း အချက်အလက်တွေ ဖလှယ်နိုင်တဲ့နေရာ၊ စာပေပညာ သင်ကြားရာ၊ ငြင်းခုန်မှုတွေ ချေဖျက်တဲ့နေရာ (တရားစီရင်ရာနေရာ) တွေ အဖြစ်သာမက စုပေါင်း ဝတ်ပြုရာနေရာတွေ အဖြစ် ရှိခဲ့ပါတယ်။ လွန်ခဲ့တဲ့ နှစ်ပေါင်း (၁ဝဝဝ) ကျော်က ဗလီတွေဟာ များစွာသော မွတ်စလင်နိုင်ငံတွေမှာ စာသင်ကျောင်းတွေ အဖြစ်ရှိ ခဲ့တာဖြစ်ပါတယ်။ အစ္စလာမ်မှာ ဘာသာရေးနဲ့ အသိပညာ ရှာဖွေရေးတို့ဟာ လွန်မင်းစွာ ဆက်စပ်နေတာကြောင့် ပညာရေးနဲ့ ဝတ်ပြုမှုတို့အတွက် တူညီတဲ့ နေရာကို အသုံးပြုတာဟာ အဓိပ္ပာယ်ရှိပါတယ်။

တမန်တော်မိုဟမ္မဒ်(ဆွ)က ဗလီဝတ်ကျောင်းတစ်ခုဆောက်လုပ်ပြီးတိုင်းမှာ သင်ကြားရေးနဲ့ ဆက်စပ်တဲ့ အခြေခံပစ္စည်း အားလုံးကို ဖြည့်တင်းပေးပြီး ဗလီကို ပညာသင်ကြားရာ အခြေခံ အဆောက်အအုံဖြစ်စေပါတယ်။ ပညာ သင်ကြားရေးက နေရာတိုင်းကို ပြန့်နှံ့ခဲ့ပြီး (၉) ရာစုမှာ ဗလီတိုင်း အမျိုးသမီးကော၊ အမျိုးသားပါ သင်ကြားနိုင်တဲ့ စာသင်ကျောင်းတွေ ရှိနေခဲ့ပြီးဖြစ်ပါတယ်။

ကုရ်အာန်ကျမ်းစာကို ဗလီတွေမှာ သင်ကြားပေးပြီး မုက္ခပတ်တော် အပိုဒ်တွေကို တမန်တော်က ရှင်းပြခဲ့ပါတယ်။ သာဝကတွေဟာ ဗလီဝတ် ကျောင်းတော်တွေထဲမှာပဲ တမန်တော်ရဲ့ ပြောစကားတွေကို နှုတ်တိုက် မှတ်သားခဲ့ကြပါတယ်။ ၆ နှစ်အရွယ် ကလေးငယ်တွေဟာ ကုရ်အာန်ကို သင်ကြားနေကြပြီး သူတို့ အနည်းငယ်ကြီးလာတဲ့ အခါမှာ သင်္ချာ ဘာသာရပ်ကို သင်ရိုး အဖြစ် ထည့်သွင်းခဲ့ပါတယ်။ အစပိုင်းမှာ စည်းစနစ်အရ ကျကျနန မရှိသေးပေမယ့် နောက်ပိုင်းမှာ စနစ်တကျ ပုံစံအဖြစ် စုစည်းလာခဲ့ပါတယ်။

( ၈ ) ရာစုနဲ့ ( ၉ ) ရာစုတွေဟာ ဗလီဝတ်ကျောင်းတော်နဲ့ အနီးတဝိုက် စာပေ သင်ကြားမှုတွေ အတွက် လျှမ်းလျှမ်းတောက် ကျော်ကြားတဲ့ ကာလတွေဖြစ်ခဲ့ပါတယ်။ အဲ့ဒီကာလကစလို့ အစ္စလာမ့် ကျောင်းတော်တွေ သီးခြား မထူထောင်မီအထိ ဗလီတွေဟာ ကာလကြာရှည်စွာ ပညာရေးအခြေခံအဆောက်အအုံတွေဖြစ်ခဲ့ပါတယ်။ သို့သော်လည်း မွတ်စလင်တွေအတွက် ဗလီတွေဟာ အရေးပါတဲ့ ပညာရေး အဆောက်အအုံတွေဖြစ်နေဆဲပါ။

ဒမတ်စကပ်စ် (Damascus )၊ ဘဂ္ဂဒက် (Baghdad) ၊ ကိုင်ရို (Cairo) နဲ့ နီရှာပူရ် (Nishapur- အီရန်ရှိ ခိုရာဆာန်ပြည်နယ်မှ မြို့) တို့က ခန်းနားထယ်ဝါတဲ့ ဗလီတွေဟာ ပညာသင်ကြားရာ အဆောက်အအုံတွေအဖြစ် ဆက်လက်တည်ရှိနေကြပါတယ်။

(1001 Inventions : Muslim Heritage in Our World)
“ကျွန်ုပ်တို့ကမ္ဘာရှိ မွတ်စလင်များကပေးခဲ့သော အမွေအနှစ်များ” စာအုပ်မှ အကျဉ်းထုတ်နှုတ်ချက်

(အစ္စလာမ့် တီထွင်ဆန်းသစ်မှုများကို ဖော်ပြရခြင်းအကြောင်း)

ယနေ့ကာလမှာ ကမ္ဘာ့လူသားထုတိုးတက်ရေးအတွက် အစ္စလာမ်ကမ္ဘာကပြုလုပ်ခဲ့တဲ့ အရေးပါအရာ ရောက်လှတဲ့ ဖြည့်စွက်ချက်တွေကို အသိ နည်းနေကြပါသေးတယ်။ နှစ်ပေါင်း ( ၅ဝဝ ) ကျော်မျှ အစ္စလာမ်က သိပ္ပံပညာရပ်တွေမှာ ကမ္ဘာကို ဦးဆောင်ခဲ့ရုံမျှမက စည်းစနစ်ကျတဲ့ အသိပညာရှာဖွေမှုတွေမှာ တက်တက်ကြွကြွ ရှိနေခဲ့ကြတဲ့ တစ်ခုတည်းသော လူသားမျိုးနွယ် အစိတ်အပိုင်းဖြစ်ခဲ့ပါတယ်။

( ၈ ) ရာစုအလယ်က စလို့ သိပ္ပံနဲ့ ပညာရေးဟာ ဘဂ္ဂဒက်မြို့တော်ကိုအခြေပြုတဲ့ တန်ခိုးကြီး အစ္စလာမ့် အင်ပါယာအောက်မှာ မွတ်စလင်တွေရဲ့ လွှမ်းမိုးမှုအဖြစ်နဲ့ အကြီးအကျယ်ထွန်းကားနေခဲ့ပါတယ်။ ဒီတိုးတက်မှုအနေအထားဟာ နောင် နှစ်ပေါင်း (၅ဝဝ) ကြာပြီးတဲ့အခါ မွတ်စလင်တွေ နိုင်ငံရေးအရ ကျဆင်းလာတဲ့ အချိန်ကိုကျော်လွန်ပြီးတဲ့တိုင်အောင် ရှိနေခဲ့ပါတယ်။

အစ္စလာမ့် တီထွင်ဆန်းသစ်မှုများ အဖြစ်နဲ့ ဖော်ပြသွားမယ့် ဆောင်းပါးတွေဟာ အစ္စလာမ့် ရွှေခေတ်လို့ခေါ်တဲ့ ကာလတွေမှာ မွတ်စလင်တွေဟာ အသိပညာရှာဖွေရာမှာနဲ့ အရေးပါအရာရောက်လှတဲ့ လူ့သမိုင်းတိုးတက်ရေးတွေမှာ ဘယ်လောက်တောင် ထူးချွန်ပြောင်မြောက်စွာဖြည့်စွက်ခဲ့ကြသလဲ ဆိုတာကို ဖော်ပြသွားဖို့ရည်ရွယ်ပါတယ်။

အောင်သန်းလွင် (UCSY)