Kubra Gumusay : မွတ်စလင် လူနည်းစု တိုင်းပြည်များတွင် ဖောက်ထွက် အောင်မြင် ခဲ့သူများ အပိုင်း(၁)

အောက်တိုဘာ ၉ ၊ ၂၀၁၄
M-Media

မွတ်စ်လင်မ်လူနည်းစုရှိရာ တိုင်းပြည်များရှိ ပုံသေ မူဟန်များမှ ခွဲထွက်ပြီး ထူးခြား ထိရောက်စွာ ဖောက်ထွက် အောင်မြင်ခဲ့သည့် မွတ်စ်လင်မ်များ အကြောင်း လေ့လာနိုင်အောင် တင်ဆက်ပါမည်။

နယ်သာလန်နိုင်ငံသား မွတ်စ်လင်မ်တစ်ဦးအနေနှင့် ကျွန်ုပ်သည် ရွှေ့ပြောင်းဝင်ရောက် အခြေချလာသည့်မွတ်စ်လင်မ် (တူရကီနှင့် မော်ရိုကိုနွယ်ဖွား အများစု) တို့မှာ ဒတ်ခ်ျ ယဉ်ကျေးမှုအတွင်း ရောယှက် လက်ခံသင့်ကြောင်း မကြာခဏ ဆိုသလို မီဒီယာများမှ တဆင့် ဖတ်ရှုရပါသည်။

ထိုဒတ်ခ်ျယဉ်ကျေးမှုအား လူသားဝါဒ၊ လောကီဝါဒ၊ ကက်သလစ်ဝါဒနှင့် ပရိုတက်စတင့်ဝါဒတို့ကို သဟဇာတဖြစ်စွာ ယာယီပေါင်းစည်ချက် တစ်ရပ်အဖြစ် ကျယ်ကျယ်ပြန့်ပြန့် ဖော်ပြကြသည်။ ယဉ်ကျေးမှု အားနည်းခြင်းကြောင့် လည်းကောင်း၊ ဖိအားပေးခံရခြင်းကြောင့်လည်းကောင်း အခြေချသူ လူသစ်တို့မှာ ကြီးစိုးလွှမ်းမိုးနေသည့် ယဉ်ကျေးမှုဖက် ပိုမိုအားသာသည်ကို တွေ့ရ၏။

ကံမကောင်းအကြောင်းမလှစွာဖြင့် ၉/၁၁ အရေးပြီးသည့်နောက် မွတ်စ်လင်မ်တို့မှာ အယူသည်းဝါဒီ အုပ်စုဝင်များ၊ ခေတ်နောက်ပြန်ဆွဲ ဖိုဝါဒီ အစွန်းရောက်သမားများ အဖြစ် တံဆိပ်တပ်ခံရသည်။ ဒုတိယကမ္ဘာစစ်နောက်ပိုင်း ဥရောပနှင့် မြောက်အမေရိကတိုက်တွင် ယဉ်ကျေးမှုနှင့် လူမျိုး ရောယှက်မှု ကိစ္စများ အတော်အတန် မြင့်မားလာခဲ့သည်။ လွတ်လပ်စ ကိုလိုနီနယ်များမှ အလုံးအရင်းပြောင်းရွှေ့ ၀င်ရောက်လာကြခြင်း၊ ၁၉၇၀-၈၀နှစ်များအတွင်း တမဟုတ်ချင်း စီးပွားဖွံ့ဖြိုးမှုကို ကျားကန်ပေးမည့် လုပ်သားများ ခေါ်ယူခြင်း၊ ပဋိပက္ခဒေသများရှိ ဒုက္ခသည်များကို လက်ခံခြင်းတို့ကြောင့်ဖြစ်၏။ ယခုသော် ပြောင်းရွှေ့အခြေချခြင်းနှင့် ၎င်း၏ပြဿနာများက လူမျိုးစုံ၊ ဘာသာစုံ၊ ယဉ်ကျေးမှုစုံအကြား ရှုပ်ထွေးယှက်နွယ်မှု ကြီးမားစွာ ဖြစ်ပေါ်လာတော့သည်။ မွတ်စ်လင်မ်လူနည်းစုရှိရာ တိုင်းနိုင်ငံများစွာ၌ မွတ်စ်လင်မ်တို့သည် ဓားစာခံများ ဖြစ်နေကြရသည်။ ထို့ပြင် ဗြောင်ကျကျတစ်မျိုး ကောက်ကျစ်စွာတစ်ဖုံ အစ္စလာမ်ဆန့်ကျင်ရေးသမားတို့၏ တိုက်ခိုက်မှုများကို ရင်ဆိုင်နေရသည်။

ကံကောင်းသည့်အချက်ကား ကမ္ဘာအနှံ့ ယင်းနိုင်ငံများတွင် အောင်မြင်ပေါက်မြောက်သော မွတ်စ်လင်မ် အမြောက်အများ ပေါ်ထွန်း လာခြင်းပင် ဖြစ်သည်။ မှိုင်းသွင်းခံရမှုများအပေါ် အလုပ်ဖြင့် ရင်ဆိုင်ခဲ့ကြသည့် အမျိုးသမီး သုံးဦးနှင့် အမျိုးသားနှစ်ဦးအကြောင်းကို ကျွန်ုပ်တို့မှ တစေ့တစောင်း လေ့လာကြည့်ကြပါစို့။

၁။  စာရေးဆရာမ နှင့် ဘလော့ဂါ ကုဗ်ရာ ဂုမုဆေး (ဂျာမဏီ) Kubra Gumusay, Author and Blogger (Germany)
———————————————————

ကုဗ်ရာ ဂုမုဆေး (၂၅ နှစ်)သည် ယဉ်ကျေးမှု သုံးရပ်မှ ပေါင်းဆုံ ထွက်ပေါ်လာသူဖြစ်သည်။ သူမ၏ မိဘများသည် တူရကီမှ ဂျာမဏီသို့ ပြောင်းရွှေ့လာပြီး သူမသည် ဂျာမဏီတွင် မွေးဖွားကြီးပြင်းသည်။ လက်ရှိတွင် သူမ၏ခင်ပွန်းနှင့်အတူ ယူကေရှိ အောက်စ်ဖို့ဒ်တွင် နေထိုင် လျက်ရှိသည်။ သူမသည် စာနယ်ဇင်းသမား၊ ဘလော့ဂါနှင့် စာရေးသူ အဖြစ် ဘ၀ဖြတ်သန်းချိန်တွင် “ပထမဆုံး ဟိဂျာ့ဗ်ဝတ် ပင်တိုင်ဆောင်းပါးရှင်” ဟု လူသိများကျော်ကြားသည်။ လက်ရှိ၌လည်း ဂျာမန်နေ့စဉ်သတင်းစာ Die Tageszeitung တွင် Das Tuch (အ၀တ်တစ်စ) အမည်ရှိ အခန်းဆက်ဆောင်းပါးများ ရေးသားနေသည်။

ဂျာမဏီတွင် သူမဖြတ်သန်းရသည့် ဟိဂျာ့ဗ်ဝတ် မွတ်စ်လင်မ် အမျိုးသမီး တစ်ဦးအကြောင်း ရေးသားခဲ့တဲ့  သူမ၏ဘလော့ဂ် Ein Fremdwörterbuch ဟာ ၂၀၁၁ ခုနှစ် Grimme Online Award ဆုစာရင်းအတွက် အမည်တင်သွင်းခံခဲ့ရသည်။ သူမရဲ့ ဘလော့သို့ လစဉ် ၀င်ရောက်ဖတ်ရှုပေါင်း တစ်သောင်းသုံးထောင်အထိ ရှိနေသည်။ လက်ရှိ၌ သူမသည် လူငယ်များအတွက် စာတစ်အုပ်ကို ပြုစုရေးသား လျက်ရှိသည်။

ဂျာမန်မွတ်စ်လင်မ် လူငယ်များကို စွမ်းဆောင်ရည်မြှင့်ပေးရန်နှင့် မှိုင်းသွင်းခံရမှုများကို တိုက်ဖျက်ရန် ဂျာမဏီတွင် တက်ကြွသူ မွတ်စ်လင်မ်များ ပေါင်းစုပါဝင်သော Zahnräder (ပဲ့ထိန်းများ) ကွန်ရက်အား တည်ထောင်သူများ အနက်လည်း သူမက အပါအ၀င် တွဲဖက်ဆောင်ရွက်နေ၏။ မကြာသေးမီက သူမ၏တွစ်တာအကောင့် Twitter @kuebra ၌လည်း  ဂျာမဏီတွင် နေ့စဉ်နှင့်အမျှ ကြီးထွားလာနေသည့် လူမျိုးကြီးဝါဒကို စတင်ပြီး ဝေဖန်ရေးသားသည်။

ကုဗ်ရာသည် ဟိဂျာ့ဗ်ဝတ်ဆင်ခြင်းကို အလုပ်ပိုအဖြစ် မည်သည့်အခါမျှ မမြင်။ ၂၀၁၂ ခုနှစ် Christoph Brammertz နှင့် အင်တာဗျူးတွင် ဤအချက်ကို ပေါ်လွင်အောင် ပြောကြားခဲ့သည်။

“ ဟိဂျာ့ဗ်ဝတ်ဆင်တဲ့ အမျိုးသမီးတစ်ဦးကို သူမက မတောင်းဆိုပဲနဲ့ ရုပ်မြင်သံကြားပေါ် မြင်ရဖို့ ကျွန်မတို့ လူ့အဖွဲ့အစည်းအပေါ် ပြင်ဆင်ပေးထား ပါသလား ? ဟိဂျာ့ဗ်ကို မြင်တာနဲ့ လူတွေက ဒါနဲ့ပတ်သက်ပြီး ပြောစရာ တစ်ခုလို့ မြင်နေကြတယ်။ ကျွန်မ ဟိဂျာ့ဗ် ၀တ်ဆင်ပါရစေလို့ မတောင်းဆိုပဲ တစ်ချိန်ချိန်မှာ ရုပ်မြင်သံကြားပေါ် (ဥပမာ – အင်တာနက်အကြောင်းဖြစ်ဖြစ်ပေါ့) စကားပြောဆိုနိုင်ရမယ်လို့ ကျွန်မ မျှော်လင့်ပါတယ်”။

( Christoph Brammertz, ‘Blogger Kübra Gümüsay: “I Would Like to Break Down Stereotypes”’, Goethe Institut, Feb 2012 )

ကုဗ်ရာ ဂုမုဆေး ၏ ဘလောဂ် စာမျက်နှာ လိပ်စာ http://ein-fremdwoerterbuch.com/

– ဆက်လက်ဖော်ပြပါမည်။

xxxxxxxxxxxxxxxxxxxx

Sya Taha ရေးသားသော 5 amazing Muslim achievers in minority-Muslim nations ကို မင်းထွဋ်ခေါင် မှ ဆီလျော်အောင် ပြန်ဆိုသည်။