လဝကရုံးကို ပြည်သူတွေက ရွံကြောက်ဖြစ်နေပြီလို့ လွှတ်တော်အမတ် ဝေဖန်

နေပြည်တော်(စက်တင်ဘာ ၂၁ရက်၊ ၂၀၁၆ခုနှစ်)။ ။ လူဝင်မှုကြီးကြပ်ရေးရုံးတွင် နိုင်ငံသားစိစစ်ရေးကတ်ပြား လျှောက်ထားရာတွင် အချိန်ကြန့်ကြာမှုများရှိနေခြင်းနှင့် ဝန်ထမ်းအချို့၏ လာဘ်စားမှုများရှိနေခြင်းအပေါ် ပြည်သူ့လွှတ်တော်အမတ်ဖြစ်သူ ဒဂုံမြို့သစ်မြောက်ပိုင်းမြို့နယ်မှ ဒေါက်တာခင်မောင်မောင်က ဝေဖန်လိုက်သည်။
.
“ပြည်သူတွေက လဝကရုံးကို ကြောက်နေပြီ။ ရွံကြောက်တွေ ဖြစ်နေပြီ။ မသွားရင်လည်း မဖြစ်ဘူး။ သွားရင်လည်း ပိုက်ဆံပေးရတယ်” ဟု ဒေါက်တာခင်မောင်မောင်က စက်တင်ဘာ ၂၁ရက်တွင်ပြုလုပ်သည့် ပြည်သူ့လွှတ်တော်အစည်းအဝေးတွင် ဝေဖန်ပြောဆိုသည်။
.
မှတ်ပုံတင်ရှိထားပြီးသား နိုင်ငံသားမိဘနှစ်ဦးက မွေးဖွားလာသည့် သား၊ သမီးများသည် ဥပဒေအရ အလိုအလျောက် နိုင်ငံသားဖြစ် ရမည် ဖြစ်သော်လည်း မှတ်ပုံတင်သွားလျှောက်သည့်အခါ လဝကရုံးက သွေးနှောပြန်လည်စိစစ်သည်ဆိုသည့် အကြေင်းပြချက်ဖြင့် ကြန့်ကြာနေခြင်းကြောင့် ဝန်ကြီးဌာနက သွေးနှောပြန်လည်စိစစ်ရန် ညွှန်ကြားထားခြင်းရှိ၊ မရှိ လွှတ်တော်တွင် ဒေါက်တာ ခင်မောင်မောင်က မေးမြန်းခဲ့သည်။
.
၁၄/ဝခမ(နိုင်) ကိုင်ဆောင်ထားသည့် မိဘနှစ်ဦး၏ သမီးသုံးဦးအနက် အငယ်ဆုံးသမီးဖြစ်သူက မှတ်ပုံတင်လျှောက်ထားရာတွင် လဝကရုံးက သွေးနှောပြန်လည်စိစစ်ရမည်ဟူသည့် အကြောင်းပြချက်ဖြင့် အချိန်ခြောက်လကြာချိန်အထိ မှတ်ပုံတင်ထုတ်မပေးကြောင်း၊ သမီးအလတ်ဖြစ်သူမှာမူ မှတ်ပုံတင်တွင် လက်မှတ်ထိုးပေးသည့် ဦးစီးမှူးကို ငွေတစ်သိန်းပေးပြီး မှတ်ပုံတင်လုပ်ခဲ့ရကြောင်း ဒေါက်တာခင်မောင်မောင်က ၎င်း၏ မဲဆန္ဒနယ်အတွင်းရှိ မိသားစုတစ်ခု၏ အခြေအနေကိုဥပမာပေးပြီး လွှတ်တော်တွင် ပြောသည်။
.
ဒေါက်တာခင်မောင်မောင်၏ မေးမြန်းချက်အပေါ် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနဝန်ကြီး ဦးသိန်းဆွေက လာရောက်ဖြေကြားခဲ့ပြီး မှတ်ပုံတင်ပြုလုပ်ရာတွင် သွေးနှောဖြစ်သဖြင့် ပြန်လည်စိစစ်ရန် ညွှန်ကြားထားကြောင်း ဖြေကြားခဲ့သည်။
.
“မိဘနှစ်ပါးအား ထုတ်ပေးထားတဲ့နိုင်ငံသားကတ်ပြားများဟာ ဥပဒေနဲ့အညီ ထုတ်ပေးထားခြင်းရှိ၊ မရှိ အထောက်အထားများနဲ့ စိစစ်ပြီးမှသာ ထုတ်ပေးနိုင်မှာ ဖြစ်ပါတယ်” ဟု ဦးသိန်းဆွေက ပြောသည်။
.
ဝန်ကြီးဦးသိန်းဆွေ၏ ဖြေကြားမှုအပြီးတွင် ဒေါက်တာခင်မောင်မောင်က “ရှေ့ကလူတွေလည်း ထုတ်ပေးပြီးပြီ။ အငယ်ကျမှ အခုလိုထပ်လုပ်တယ်။ ဒါဟာ ပုဂ္ဂိုလ်တစ်ယောက်ထဲကို ကျွန်တော်ဦးတည်ပြီးပြောတာ မဟုတ်ပါဘူး။ ဒီလိုကိစ္စမျိုးတွေ ကျွန်တော်တို့ကိုတိုင်တာ တိုင်စာ(၃၀)လောက်ရှိတယ်” ဟု ထပ်ဆင့်မေးမြန်းစဉ် ပြောဆိုသည်။
.
မှတ်ပုံတင်ရှိပြီးသား မိဘနှစ်ဦး၏ သား၊ သမီးများကို သွေးနှောစိစစ်ရန် ညွှန်ကြားထားခြင်းသည် လဝကဝန်ထမ်းများအတွက် အဂတိလိုက်စားရန် အခွင့်အလမ်းကဲ့သို့ ဖြစ်နေသည်ဟု ပြည်သူ့လွှတ်တော်ဥက္ကဌ ဦးဝင်းမြင့်က မှတ်ချက်ပြုသည်။
.
“အောက်ခြေမှာ စိတ်နေ၊ စိတ်ထား မပြောင်းချင်တဲ့သူအချို့က အဲ့ဒါကို အခွင့်အရေးတစ်ရပ်လိုယူပြီး အသုံးချတော့ ပြည်သူလူထုက ဒုက္ခရောက်တယ်။ ပြဿနာဖြစ်တယ်။ ဒါကြောင့် သေသေချာချာ ပြန်လည်စိစစ်ပေးပါ။ ညွှန်ကြားချက်ကို အသုံးချပြီး လုပ်နေတာတွေရှိတယ်လို့ ဝန်ကြီးဌာနကို အသိပေးပါတယ်” ဟု ဦးဝင်းမြင့်က ပြောသည်။

မဇ္ဈိမ မှ ကူးယူဖော်ပြသည်။
http://www.mizzimaburmese.com/article/18309