ဘုရင်၊ စစ်တပ်တို့နှင့်ညှိပြီး ထောင်ဒဏ်မှ လွတ်မြောက်တော့မည့် ထိုင်း၀န်ကြီးချုပ်ဟောင်း

ဖေဖော်၀ါရီ ၁၃၊ ၂၀၂၄

M-Media 

-ပြည်တော်ပြန်ပြီး ထောင်ဒဏ်ကျခံနေရတဲ့ ထိုင်း၀န်ကြီးချုပ်ဟောင်း သက်ဆင်ရှင်နာ၀ပ်ထရာဟာ ခံ၀န်နဲ့ လွတ်မြောက်မယ့်စာရင်းမှာ ပါ၀င်လာပါတယ်။

၂၀၀၆ ခုနှစ် စစ်အာဏာသိမ်းခံရမှုအပြီး နိုင်ငံခြားမှာ ခိုလှုံနေရတဲ့ သက်ဆင်ဟာ ပြီးခဲ့တဲ့နှစ်ကမှ ထိုင်းနိုင်ငံကို ပြန်ရောက်လာခဲ့တာပါ။ 

အာဏာသိမ်းအစိုးရက စွဲချက်ပေါင်းများစွာနဲ့ သက်ဆင်ကို ထောင်ဒဏ် ၈ နှစ် ချမှတ်ထားပြီး ဘုရင်ရဲ့ လွတ်ငြိမ်းချမ်းသာခွင့်နဲ့ ပြည်တော်ပြန်ချိန်မှာ ထောင်ဒဏ်တစ်နှစ်သာ ကျခံရပါတယ်။

အသက် ၇၄ နှစ်အရွယ် သက်ဆင်ဟာ ထောင်ထဲမှာ မနေခဲ့ရပါဘူး။ ကျန်းမာရေးမကောင်းဘူးဆိုတဲ့ အကြောင်းပြချက်နဲ့ ဆေးရုံမှာ အစောင့်အရှောက်နဲ့ နေရတာဖြစ်ပါတယ်။ 

သက်ကြီးရွယ်အိုတွေနဲ့ ကျန်းမာရေးမကောင်းသူတွေကို ခံ၀န်နဲ့ လွှတ်ပေးဖို့ ဖေဖော်၀ါရီ ၁၃ ရက်နေ့မှာ ထုတ်ပြန်တဲ့ အကျဥ်းသား ၉၃၀ စာရင်းမှာ သက်ဆင် ပါ၀င်လာခဲ့ပါတယ်။ ထိုင်းအကျဥ်းထောင် လုပ်ထုံးလုပ်နည်းတွေအရ သက်ဆင်ဟာ ဖေဖော်၀ါရီ ၁၈ ရက်နေ့ နောက်ပိုင်း လွတ်မြောက်လာမှာပါ။ 

ဒါပေမယ့် ၂၀၁၅ ခုနှစ်က အင်တာဗျူးတစ်ခုမှာ ဘုရင်ကို စော်ကားပြောဆိုတယ်ဆိုတဲ့ အမှုနဲ့ ဖမ်းဆီးတရားစွဲဆိုခံရနိုင်တယ်လို့ သတင်းတွေ ထွက်နေပါတယ်။ 

သက်ဆင်မိသားစုရဲ့ Pheu Thai ပါတီဟာ ထိုင်းနိုင်ငံရေးမှာ ဆယ်စုနှစ်ပေါင်းများစွာ လွှမ်းမိုးလာခဲ့တာပါ။

ပြီးခဲ့တဲ့နှစ် ရွေးကောက်ပွဲမှာ သက်ဆင်ရဲ့ သမီးဖြစ်သူ ပေတွန်တန် ရှင်နာ၀ပ်ထရာ ဦးဆောင်တဲ့ Pheu Thai က ဒုတိယမဲအများဆုံး ရခဲ့ပြီး စစ်တပ်ကြီးစိုးတဲ့ အထက်လွှတ်တော်ရဲ့ ထောက်ခံမှုနဲ့ အစိုးရသစ်ကို ဦးဆောင် ဖွဲ့စည်းနိုင်ခဲ့ပါတယ်။ 

သက်ဆင်ပြည်တော်ပြန်ရေးနဲ့ ပြစ်ဒဏ်လျှော့ပေါ့တာတွေဟာ Pheu Thai ပါတီခေါင်းဆောင်တွေနဲ့ စစ်တပ်၊ ဘုရင်တို့အကြား ကန့်လန့်ကာနောက်ကွယ်က ဆွေးနွေးမှုရလဒ် ဖြစ်တယ်လို့ ကျွမ်းကျင်သူတွေက သုံးသပ်ပါတယ်။ 

Ref: CNA