လူသားတွေ မကြာခင် ပင်လယ်ရေကို သောက်လို့ရတော့မည်

မေ ၂၉၊ ၂၀၂၄

M-Media 

-ပင်လယ်ရေကနေ ဆားဓာတ်ဖယ်ရှားကာ သောက်သုံးရေအဖြစ် ပြောင်းလဲပေးနိုင်မယ့် နည်းလမ်းသစ်တစ်ခုကို နယူးယောက်မြို့ အင်ဂျင်နီယာကျောင်း NYU Tandon School of Engineering က ထုတ်ဖော် ပြသလိုက်ပါတယ်။ 

ဒေါက်တာ အန်ဒရေ တေလာ ဦးဆောင်တဲ့ သုတေသနအဖွဲ့ ဖန်တီးထားတဲ့ နည်းလမ်းသစ်ဟာ ဘက်တ္ထရီငုတ်တွေကနေ ဓာတုဗေဒ ဓာတ်ပေါင်းတွေ အရည်ထဲပျော်၀င်စေကာ ဆားဓာတ်ဖယ်ရှားတဲ့ နည်းလမ်းဟောင်း RFD ကို ဆန်းသစ်ထားတာဖြစ်ပါတယ်။ 

နည်းလမ်းဟောင်းထက် ၂၀ ရာခိုင်နှုန်းပိုပြီး ဆားဓာတ်ဖယ်ရှားပေးနိုင်မယ့် အခုနည်းလမ်းသစ်ဟာ စွမ်းအင်သုံးစွဲမှုကို သိသိသာသာ လျှော့ချပေးနိုင်ပါတယ်။ 

“ကျွန်တော်တို့ရဲ့ ရည်ရွယ်ချက်က လွယ်လွယ်ကူကူနဲ့ ရေရှည်အသုံးပြုလို့ရမယ့် နည်းလမ်းမျိုး ဖော်ဆောင်ဖို့ပါ။ ဒီနည်းလမ်းဟာ ရေချိုလိုအပ်ချက်ပမာဏ မြင့်မားနေမှုကို ဖြေရှင်းနိုင်ရုံသာမကဘဲ၊ သဘာ၀ပတ်၀န်းကျင် ထိန်းသိမ်းရေးနဲ့ ပြည့်ဖြိုးမြဲစွမ်းအင် ပေါင်းစပ်အသုံးပြုနိုင်ရေးတွေမှာလည်း ရှေ့တန်းကနေ အထောက်အကူပြုနိုင်ရပါမယ်”လို့ ဒေါက်တာ တေလာက ပြောပါတယ်။ 

ဒေါက်တာတေလာနဲ့အဖွဲ့ရဲ့ အခုနည်းလမ်းသစ်ဟာ ပုံမှန် ဓာတ်အားလိုင်းကနေ ဓာတ်အား ဆွဲယူသုံးစွဲဆရာမလိုဘဲ လေစွမ်းအင်၊ နေစွမ်းအင်လို ပြည့်ဖြိုးမြဲစွမ်းအင်ရင်းမြစ်တွေကို အသုံးပြုနိုင်မှာပါ။

နည်းပညာသစ်ကို ကျယ်ကျယ်ပြန့်ပြန့် အသုံးပြုနိုင်ရေးအတွက် နောက်ထပ် လေ့လာစမ်းသပ်မှုတွေ ထပ်မံလိုအပ်မှာ ဖြစ်ပါတယ်။ 

Ref: Interesting Engineering