မြန်မာအာဏာသိမ်းစစ်ခေါင်းဆောင်ကို ဖယ်ရှားရေး ဦးသိန်းစိန်ကို အကြံပေးခဲ့တဲ့ တရုတ်

ဇူလိုင် ၁၀၊ ၂၀၂၄
M-Media

-ဇွန်လအတွင်း သမ္မတဟောင်း ဦးသိန်းစိန်ရဲ့ တရုတ်ပြည်ခရီးစဥ်အတွင်း အာဏာသိမ်းစစ်ခေါင်းဆောင် ရာထူးကဆင်းရေး စည်းရုံးပြောဆိုပေးဖို့ တရုတ်က ပြောကြားခဲ့တယ်လို့ စင်ကာပူအခြေစိုက် CNA သတင်းဌာနက ဖော်ပြပါတယ်။

အချက် ၅ ချက်ပါ ငြိမ်းချမ်းစွာ အတူယှဥ်တွဲနေထိုင်ရေးမူ၀ါဒ နှစ် ၇၀ ပြည့်အထိမ်းအမှတ်အဖြစ် ပြုလုပ်တဲ့ အခမ်းအနားကို တက်ရောက်ဖို့အတွက် တရုတ်နိုင်ငံဟာ သမ္မတဟောင်း ဦးသိန်းစိန်ကို ဖိတ်ကြားခဲ့တာ ဖြစ်ပါတယ်။

မြန်မာနိုင်ငံမှာ လက်နက်ကိုင်တော်လှန်ရေး အားကောင်းလာပြီး နှစ်ပေါင်းများစွာ အာဏာဆုပ်ကိုင်ထားတဲ့ စစ်တပ် အားနည်းလာချိန် စစ်ခေါင်းဆောင်ဟောင်းတစ်ဦးကို တရုတ်က ပွဲထုတ်လာမှုအတွက် နိုင်ငံရေး လေ့လာသူတွေက သတိထားစောင့်ကြည့်ခဲ့ကြပါတယ်။

နှစ် ၇၀ ပြည့်အခမ်းအနားပြင်ပ တရုတ်နိုင်ငံခြားရေး၀န်ကြီး ၀မ်ယီနဲ့ တွေ့ဆုံချိန်မှာ ၀မ်ယီက ကြားဖြတ်အစိုးရတစ်ခုဖွဲ့ပြီး အာဏာလွှဲပေးကာ ရွေးကောက်ပွဲ ပြုလုပ်နိုင်ရေးအတွက် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို စည်းရုံးပေးဖို့ ဦးသိန်းစိန်ကို ပြောကြားခဲ့ကြောင်း တရုတ်အစိုးရနဲ့ နီးစပ်တဲ့ သတင်းရင်းမြစ်တွေကို ကိုးကားပြီး CNA သတင်းဌာနရဲ့ ဆောင်းပါမှာ ဖော်ပြထားပါတယ်။

တရုတ်အစိုးရဟာ ၂၀၂၁ ခုနှစ် မြန်မာစစ်တပ်ရဲ့ အာဏာသိမ်းမှုကို ထောက်ခံပေမယ့် နောက်ပိုင်း စစ်ခေါင်းဆောင်ရဲ့ လုပ်ဆောင်ချက်တွေကို မနှစ်မြို့ကြောင်း သဘေထားကို လူသိရှင်ကြား ထုတ်ပြထားပါတယ်။

တရုတ်ဟာ စစ်ခေါင်းဆောင်နဲ့ သဘောထားချင်း မတိုက်ဆိုင်ဘူးလို့ သတင်းထွက်နေတဲ့ ဒုတိယစစ်ခေါင်းဆောင် ဗိုလ်ချုပ်ကြီး စိုး၀င်းကိုလည်း ရှန်ဟိုင်း ပူးပေါင်းဆောင်ရွက်ရေးအဖွဲ့က ဇူလိုင်လ အစပိုင်းမှာ လုပ်ခဲ့တဲ့ ဖိုရမ်တစ်ခုကို တက်ရောက်ဖို့ ဖိတ်ကြားခဲ့ပါတယ်။

ဒါပေမယ့် အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို တရုတ်အစိုးရက လူသိရှင်ကြား ဖိတ်ကြားတာမျိုး မရှိသေးပါဘူး။

လက်ရှိအာဏာသိမ်းစစ်ခေါင်းဆောင်ကို မနှစ်မြို့ပေမယ့် စစ်ခေါင်းဆောင်ဟောင်း ဦးသိန်းစိန်နဲ့ ဗိုလ်ချုပ်ကြီးစိုး၀င်းတို့ကို ဖိတ်ကြားမှုကိုကြည့်ရင် မြန်မာ့အရေးမှာ တရုတ်ဟာ ဗဟိုချုပ်ကိုင်တဲ့ အစိုးရမျိုးကိုသာ အလိုရှိတယ်ဆိုတာ ထင်ရှားနေကြောင်း နိုင်ငံရေးကျွမ်းကျင်သူတွေက သုံးသပ်ပါတယ်။

Ref : CNA