မေ ၁၄၊ ၂၀၂၄
M-Media
– GPS လွတ် AI ဖိုက်တာဂျက်တွေ ဖန်တီးထုတ်လုပ်ရာမှာ တရုတ်လို ပြိုင်ဘက်နိုင်ငံတွေထက် ရှေ့ကိုရောက်နေအောင် အမေရိကန်က ကြိုးပမ်းဆောင်ရွက်နေပါတယ်။
အမေရိကန် လေတပ်ဟာ AI အခြေပြု F-16 တိုက်လေယာဥ်နဲ့ လူမောင်း F-16 တိုက်လေယာဥ်တို့ စီးချင်းထိုးမှုကို မေလ ၄ ရက်နေ့မှာ ပြုလုပ်ခဲ့ပါတယ်။
ဒါဟာ အမေရိကန်လေတပ်ရဲ့ ဉာဏ်ရည်တုနည်းပညာအသုံးပြုမှုမှာ သမိုင်းမှတ်တိုက်သစ် စိုက်ထူလိုက်နိုင်တာပါ။
F-16 တိုက်လေယာဥ်မှာ အသုံးပြုမယ့် ဉာဏ်ရည်တုစနစ်ကို မြေပြင်မှာ အရင်ဖန်တီးတာဖြစ်ပြီး၊ ပြည့်စုံသွားမှ တိုက်လေယာဥ်ထဲ ထည့်သွင်း အသုံးပြုတာဖြစ်ပါတယ်။ အသုံးပြုပြီးတဲ့အခါမှာ ဒီစနစ်ကို လေယာဥ်ကနေ ဖယ်ရှားခဲ့ပါတယ်။
ဉာဏ်ရည်တုနည်းပညာကို တိုက်ခိုက်ရေးအပြင်၊ လမ်းပြစနစ်မှာလည်း အသုံးပြုဖို့ အမေရိကန်လေတပ်က ကြိုးပမ်းနေပါတယ်။ GPS အစားထိုး AI လမ်းပြစနစ်သစ် ဖြစ်ပါတယ်။
GPS ဟာ ဂြိုဟ်တုအခြေပြု လမ်းပြစနစ်ပါ။ ဂြိုဟ်တုတွေ တိုက်ခိုက်ခံရတာ၊ ဒါမှမဟုတ် နှောက်ယှက်ခံရတာမျိုးမှာ ဆက်သွယ်ရေး မပြတ်တောက်စေဖို့အတွက်ရည်ရွယ်ပြီး AI လမ်းပြစနစ်ကို ဖန်တီးနေတာ ဖြစ်ပါတယ်။
အမေရိကန်ဟာ ဉာဏ်ရည်တုနည်းပညာနယ်ပယ်မှာ တရုတ်နဲ့ အဓိက ယှဥ်ပြိုင်နေရတာ ဖြစ်ပါတယ်။ AI ကို စစ်ပွဲတွေမှာ အသုံးပြုလာရင် လူသားတွေ ထိခိုက်သေဆုံးမှုတွေ များပြားလာမယ်ဆိုတဲ့ စိုးရိမ်မှုတွေလည်း ရှိပါတယ်။
အမေရိကန် ကြည်း၊ ရေ၊ လေ ညှိနှိုင်းကွပ်ကဲရေးအဖွဲ့ရဲ့ ဒုတိယအကြီးအကဲ ဗိုလ်ချုပ် ခရစ္စတိုဖာ ဂရာဒီက ဉာဏ်ရည်တုနည်းပညာမှာ တရုတ်နဲ့ ယှဥ်ပြိုင်နေရတာကို အတည်ပြု ပြောဆိုပါတယ်။
“ပြိုင်ဆိုင်မှုလို့ ခေါ်ချင်ခေါ်လို့ရပါတယ်။ တကယ်လည်း ပြိုင်ဆိုင်နေရတာပါ။ အနာဂတ်စစ်မြေပြင်မှာ AI ဟာ အရေးပါတဲ့ အစိတ်အပိုင်းတစ်ခု ဖြစ်လာမယ်ဆိုတာ ကျွန်တော်တို့ နှစ်နိုင်ငံစလုံး သိထားကြပါတယ်။ ဒီအတွက် တရုတ်က အားထုတ်ကြိုးပမ်းနေသလို၊ ကျွန်တော်တို့လည်း အတူတူပါပဲ”
Ref: Interesting Engineering
