ဇွန် ၁၆၊ ၂၀၂၀
M-Media

-Covid-19 ဗိုင်းရပ်စ်ကို သိသိသာသာ ပျောက်ကင်းအောင် ကုသနိုင်မယ့် ဆေးတစ်မျိုးကို တွေ့ရှိခဲ့ပြီလို့ ယူကေ ကျန်းမာရေးဆိုင်ရာ ကျွမ်းကျင်သူတွေက ပြောကြားလိုက်ပါတယ်။

Aexamethasone လို့ခေါ်တဲ့ ထိုးဆေးဖြစ်ပြီး စျေးသက်သာကာ များများစားစား ရရှိနိုင်ပါတယ်။ ဒီဆေးဟာ အသက်ရှုစက်တပ်ထားရသူတွေမှာ သေဆုံးမှုနှုန်းကို ၃ ပုံ ၁ ပုံအထိ လျှော့ချပေးနိုင်ပြီး၊ အောက်ဆီဂျင်ပေးနေရသူတွေမှာတော့ သေဆုံးမှုကို ၅ ပုံ ၁ ပုံအထိ လျှော့ချနိုင်တာကို တွေ့ခဲ့ရပါတယ်။

လက်ရှိရနိုင်တဲ့ ဆေးဝါးတွေထဲမှာ ကိုရိုနာဗိုင်းရပ်စ် ကုသနိုင်ဖွယ်ရှိတဲ့ ဆေးတွေကို စမ်းသပ်အသုံးပြုမှုကနေ ဒီတွေ့ရှိချက် ပေါ်ထွက်လာတာပါ။

ကိုရိုနာဗိုင်းရပ်စ် စတင်ကူးစက်စဉ်ကတည်းက ဒီဆေးကို ရရှိခဲ့မယ်ဆိုရင် ယူကေမှာ ဗိုင်းရပ်စ်ကြောင့် သေဆုံးသူ အရေအတွက်ကို ၅ ထောင်လောက်အထိ လျှော့ချနိုင်လိမ့်မှာဖြစ်တယ်လို့ သုတေသန ပညာရှင်တွေက ပြောကြားခဲ့ပါတယ်။

ကူးစက်မှု၊ သေဆုံးမှုများပြားပြီး ရုန်းကန်နေရတဲ့ ဆင်းရဲတဲ့နိုင်ငံတွေမှာ ဒီဆေးကနေ ကြီးမားတဲ့ အကျိုးကျေးဇူးတွေ ရနိုင်လိမ့်မယ်လို့လည်း ပညာရှင်တွေက ဆိုပါတယ်။

အသက်ကယ်ဆေး

ဒီဆေးကို သုံးစွဲခဲ့တဲ့ ကိုရိုနာဗိုင်းရပ်စ်ကူးစက်သူ ၂၀ မှာ ၁၉ ဦးက ဆေးရုံမလာဘဲ ကောင်းသွားတာကို စမ်းသပ်မှုမှာတွေ့ခဲ့ရပြီး ဆေးရုံတင်ရသူ အများစုကလည်း ဒီဆေးကို သုံးစွဲပြီးတဲ့နောက် ပြန်ကောင်းသွားကြပါတယ်။ အသက်ရှုစက် တပ်ထားရတဲ့ လူနာတွေ၊ အောက်ဆီဂျင်ပေးထားရတဲ့ လူနာတွေ အတွက်လည်း Aexamethasone ဆေးက အသုံးဝင်မှာ ဖြစ်ပါတယ်။

စမ်းသပ်ကုသမှုကို အောက်စဖို့ဒ်တက္ကသိုလ်က အဖွဲ့တစ်ခုက ဦးဆောင်ခဲ့တာဖြစ်ပြီး ဆေးရုံတင်ထားရတဲ့ လူနာ ၂၀၀၀ လောက်မှာ ထိုးနှံကာ ဆေးမထိုးထားတဲ့ လူနာ ၄၀၀၀ ကျော်နဲ့ နှိုင်းယှဉ်လေ့လာခဲ့တာ ဖြစ်ပါတယ်။

အသက်ရှုစက်တပ်ထားတဲ့ လူနာတွေကို ဒီဆေး ထိုးပေးခဲ့ရာမှာ သေဆုံးမှုဟာ ၄၀ ရာခိုင်နှုန်းကနေ ၂၈ ရာခိုင်နှုန်းအထိ ​ေလျာ့ကျခဲ့ပြီး၊ အောက်ဆီဂျင်ပေးရတဲ့ လူနာတွေမှာတော့ သေဆုံးမှုဟာ ၂၅ ရာခိုင်နှုန်းကနေ ၂၀ ရာခိုင်နှုန်းအထိ လျ​ော့ကျသွားခဲ့ပါတယ်။

“အခုအချိန်အထိ စမ်းသပ်ခဲ့တဲ့ဆေးတွေထဲမှာ သေဆုံးမှုနှုန်းကို လျှော့ချနိုင်တဲ့ တစ်ခုတည်းသော ဆေးပါ။ သေဆုံးမှုဟာ သိသိသာသာ ကျဆင်းခဲ့ပြီး ကြီးကျယ်တဲ့ အောင်မြင်မှုတစ်ခုလည်း ဖြစ်ပါတယ်” လို့ စမ်းသပ်မှုကို ဦးဆောင်သူ ပရော်ဖက်ဆာ ပီတာဟော်ဘီက ပြောကြားခဲ့ပါတယ်။

သုတေသနအဖွဲ့ခေါင်းဆောင် ပရော်ဖက်ဆာ မာတင် လန်ဒရေးကလည်း ရလဒ်တွေအရ အသက်ရှုစက် တပ်ထားရသူ ၈ ဦးကို ​ထိုးပေးရင် ၁ ဦးရဲ့အသက်ကို ကယ်တင်နိုင်ပြီး အောက်ဆီဂျင် ပေးထားရသူ ၂၀ ကနေ ၂၅ ဦးကို ထိုးပေးရင် ၁ ဦးရဲ့အသက်ကို ကယ်နိုင်တယ်ဆိုတာကို တွေ့ရကြောင်း ပြောကြားခဲ့ပါတယ်။

“ရလဒ်က သိပ်ရှင်းပါတယ်။ Dexamethasone နဲ့ ကုသမှုကာလက ၁၀ ရက်လောက်သာကြာပြီး ကုန်ကျစားရိတ်က လူနာတစ်ဦးအတွက် ၅ ပေါင်သာ ရှိပါတယ်။ လူတစ်ယောက်ရဲ့အသက်ကို ကယ်ဖို့အတွက် ၃၅ ပေါင်သာ ကျမှာပါ။ ဒီဆေးကို ကမ္ဘာတစ်ဝှမ်းမှာ လွယ်လွယ်ကူကူ ရနိုင်ပါတယ်”

Covid-19 ကြောင့် သေဆုံးမှုကို လျှော့ချနိုင်မယ့် ဆေးဝါးတွေကို အရင်ကလည်း စမ်းသပ်တွေ့ရှိခဲ့ပေမယ့် စျေးကြီးတာ၊ များများစားစားမရနိုင်တာလို အခက်အခဲတွေရှိကာ သေဆုံးနှုန်းကိုလည်း သိသိသာသာ လျှော့မချနိုင်ပါဘူး။

Ref: BBC

မေ ၁၈၊ ၂၀၂၀
M-Media

-Covid-19 ကာကွယ်ဆေးရရှိရေး တစ်ကမ္ဘာလုံးက ကြိုးပမ်းအားထုတ်နေကြပေမယ့် အောင်မြင်လာမှာမဟုတ်ဘူးလို့ ယူကေဝန်ကြီးချုပ် ဘောရစ်ဂျွန်ဆင်က ပြောကြားလိုက်ပါတယ်။

ဂျွန်ဆင်ဟာ ကိုရိုနာကူးစက်မှုကြောင့် ပြီးခဲ့တဲ့လက ဆေးရုံမှာ ကုသမှုခံခဲ့ရပါတယ်။

ယူကေပြည်တွင်းသတင်းစာ The Mail မှာ မ​နေ့ကရေးသားခဲ့တဲ့ ဆောင်းပါးတစ်ပုဒ်မှာတော့ ကာကွယ်ဆေးရရှိရေးခရီးဟာ ကြာညောင်းနေအုံးမှာဖြစ်ပြီး ပွင့်ပွင့်လင်းလင်းပြောရရင် အောင်မြင်မှာ မဟုတ်ဘူးလို့ ရေးသားခဲ့ပါတယ်။

“ဗိုင်းရပ်စ်ထိန်းချုပ်ရေးအတွက် နည်းလမ်းသစ်တွေ ရှာဖွေဖို့ လိုအပ်ပါတယ်”

ယူကေအစိုးရဟာ ကာကွယ်ဆေး ဖန်တီးထုတ်လုပ်ရေးစင်တာသစ်တစ်ခု ဖွင့်လှစ်ဖို့အတွက် ပေါင် ၉၃ သန်း ထောက်ပံ့ပေးထားပြီး ကူးစက်သူတွေ အလျင်အမြန်သက်သာနိုင်ရေး ကုသရေးနည်းလမ်းတွေ သုတေသနပြု ဖော်ထုတ်ဖို့အတွက်လည်း ထောက်ပံ့ပေးနေတယ်လို့ ဆောင်းပါးမှာ ထည့်သွင်း ရေးသားခဲ့ပါတယ်။

အောက်စဖိုဒ့်တက္ကသိုလ်နဲ့ လန်ဒန် အင်ပီရီယဲလ်ကောလိပ်တို့လို ကိုရိုနာကာကွယ်ဆေး ထုတ်လုပ်ရေး သုတေသနမှာ ရှေ့တန်းရောက်နေတဲ့ အဖွဲ့အစည်း ၂ ခု ယူကေမှာ ရှိ​နေပေမယ့် ဆေးထုတ်လုပ်နိုင်မလားဆိုတာ မသေချာဘူးလို့ ယူကေ စီးပွားရေးဝန်ကြီး ​အလော့က် ရှရ်မာက ပြောကြားခဲ့ပါတယ်။

“အောင်မြင်တဲ့ ကိုရိုနာဗိုင်းရပ်စ်ကာကွယ်ရေး မတွေ့တာမျိုးလည်း ဖြစ်နိုင်ပါတယ်”

Ref: Aljazeera

ဧပြီ ၂၄၊ ၂၀၂၀
M-Media

-ကိုရိုနာဗိုင်းရ်စ် ကာကွယ်ဆေး လူသားမှာ ပထမဆုံး စမ်းသပ်မှုကို အင်္ဂလန်နိုင်ငံ အောက်စဖို့ဒ်တက္ကသိုလ်မှာ မနေ့က စတင်ပြုလုပ်ခဲ့ပါတယ်။

လူဦးရေ ၈၀၀ ကျော်ပါဝင်မယ့် အဲဒီစမ်းသပ်မှုက ပထမဆုံး ၂ ဦးကို မနေ့မှာ ကာကွယ်ဆေး ထိုးပေးခဲ့တာပါ။ စမ်းသပ်မယ့် သူတွေထဲက တစ်ဝက်ကို Covid-19 ကာကွယ်ဆေးထိုးပေးမှာဖြစ်ပြီး ကျန်တဲ့တစ်ဝက်ကို ဦးနှောက်အမြှေးယောင် ကာကွယ်ဆေး ထိုးပေးမှာဖြစ်ပါတယ်။

အထိုးခံရသူတွေဟာ သူတို့ကို ဘာဆေးထိုးပေးထားလဲဆိုတာ သိမှာ မဟုတ်ဘဲ ဆရာဝန်တွေက ဆေးရဲ့ တုန်ပြန်မှုကို စောင့်ကြည့်မှာ ဖြစ်ပါတယ်။

“ကျွန်မက သိပ္ပံပညာရှင်တစ်ယောက်ပါ။ သိပ္ပံစမ်းသပ်မှုတွေကို တတ်နိုင်သမျှ ပံ့ပိုးကူညီပေးသွားချင်ပါတယ်” လို့ ပထမဆုံး ဆေးထိုးခံခဲ့ရသူ အီလီဆာ ဂရာနာတိုက ပြောကြားခဲ့ပါတယ်။

ကာကွယ်ဆေးကို အောက်စဖို့ဒ်တက္ကသိုလ်က ၃ လအတွင်း ဖန်တီးခဲ့တာပါ။​​ ဆေးဘက်အကြို သုတေသန​ကို ဦးဆောင်ပြုလုပ်တဲ့ Jenner Institute အဖွဲ့ရဲ့ ကာကွယ်ဆေးဆိုင်ရာ ပရော်ဖက်ဆာ ဆာရာ ဂီလ်ဘာ့တ်က ဒီကာကွယ်ဆေးအပေါ်မှာ ယုံကြည်မှု အတိုင်းအတာတစ်ခုအထိ ရှိတယ်လို့ ပြောကြားခဲ့ပါတယ်။

“ပုဂ္ဂိုလ်ရေးအမြင်အရဆိုရင် ဒီကာကွယ်ဆေးအပေါ်မှာ ကျွန်မ ယုံကြည်မှု တစ်စုံတစ်ရာ ရှိပါတယ်။ လူသားတွေကို ကျွန်မတို့ စမ်းသပ်ပြီး အချက်အလက်တွေကို မှတ်တမ်းတင်ရမယ်။ ကာကွယ်ဆေးကို ကျယ်ကျယ်ပြန့်ပြန့် အသုံးမပြုနိုင်ခင်မှာ လူတွေ အများအပြား မကူးစက်အောင် တားဆီးရပါမယ်”

ကာကွယ်ဆေးကို ချင်ပန်ဇီမျောက်တွေမှာ တွေ့ရတဲ့ အဖျားဗိုင်းရပ်စ်ပိုးအပျော့စားနဲ့ ဖန်တီးထားတာဖြစ်ပြီး လူသားတွေမှာ အသုံးပြုလို့ရအောင် သိပ္ပံပညာရှင်တွေက ပြန်လည် ပြုပြင်ထားပါတယ်။

Ref: BBC

ဧပြီ ၂၂၊ ၂၀၂၀
M-Media

-ကိုရိုနာဗိုင်းရပ်စ် ကာကွယ်ဆေးကို ကြာသာပတေးနေ့ကစတင်ပြီး လူသားတွေမှာ စတင်စမ်းသပ်တော့မယ်လို့ ဗြိတိန်ကျန်းမာရေးဝန်ကြီး မတ်ဟန်းကော့က ပြောကြားလိုက်ပါတယ်။

ယူကေမှာ Covid-19 ကူးစက်သူ အရေအတွက်ဟာ ၁၃၀၀၀၀ နီးပါး ရှိနေကာ၊ သေဆုံးသူ အရေအတွက်ကလည်း ၁၇၃၃၇ ဦး ရှိနေပါတယ်။ ဆေးဘက်ဆိုင်ရာပစ္စည်းတွေ လုံလုံလောက် မစီစဉ်ပေးနိုင်မှုအတွက်လည်း ယူကေအစိုးရဟာ ဝေဖန်ခံနေရပါတယ်။

မနေ့က သတင်းစာရှင်းလင်းပွဲမှာ ကျန်းမာရေးဝန်ကြီး ဟန်းကော့က အစိုးရဟာ ကာကွယ်ဆေးရဖို့အတွက် အခြားနိုင်ငံတွေထက် ငွေကြေးပိုမိုသုံးစွဲကာ အစွမ်းကုန် လုပ်ဆောင်နေတယ်လို့ ပြောကြားခဲ့ပါတယ်။

ဒါ့အပြင် ကာကွယ်ဆေးကို ကြာသာပတေးနေ့ကစတင်ပြီး လူသားတွေမှာ စမ်းသပ်တော့မယ်လို့လည်း သူက ဆိုပါတယ်။

ယူကေက ထိပ်တန်း ကာကွယ်ဆေးထုတ်လုပ်တဲ့ အဖွဲ့အစည်း ၂ ခုဖြစ်တဲ့ လန်ဒန် Imperial ကောလိပ်နဲ့ အောက်စဖို့ဒ်တက္ကသိုလ်တို့ကို ကာကွယ်ဆေးစမ်းသပ်ဖို့အတွက် အစိုးရက ပေါင် ၄၂.၅ သန်း ထောက်ပံ့သွားမှာပါ။

“ဒီတက္ကသိုလ် ၂ ခုစလုံးက စီမံကိန်းတွေဟာ မြန်မြန်ဆန်ဆန် တိုးတက်မှုတွေ ရရှိနေပြီး၊ ဒီအတွက် အင်အားကို အပြည့်အ၀ အသုံးချသွားမယ်လို့လည်း သိပ္ပံပညာရှင်တွေကို ကျွန်တော်တို့ ပြောထားပါတယ်။ ကာကွယ်ဆေးဖော်နိုင်တဲ့ ပထမဆုံးတိုင်းပြည်ဖြစ်လာဖို့ပါ” လို့ ဝန်ကြီးဟန်းကော့က ပြောကြားခဲ့ပါတယ်။

ကိုရိုနာဗိုင်းရပ်စ် တိုက်ဖျက်ရေး ရှေ့တန်းကနေ လုပ်ဆောင်နေရတဲ့ ကျန်းမာရေးဝန်ထမ်းတွေမှာ ကာကွယ်ရေးဝတ်စုံ PPE မလုံလောက်မှုကိုလည်း အစိုးရက ဖြေရှင်းပေးနေတယ်လို့ သူက ထည့်သွင်းပြောဆိုခဲ့ပါတယ်။

Ref: BBC