Tag: UK

ဥရောပသမဂ္ဂမှ ယူကေ တရားဝင်နှုတ်ထွက်

ဖေဖော်ဝါရီ ၁၊ ၂၀၂၀
M-Media

အင်္ဂလန်နိုင်ငံ ဒိုဗာမြို့ကမ်းနဖူးတွင် မြင်ရသည့် ယူနီယံဂျက်အလံနှင့် စာသား

-၄၇ နှစ်ကြာ ဥရောပသမဂ္ဂအဖွဲ့အဝင်အဖြစ် ‌ပါဝင်လာခဲ့တဲ့ ယူကေဟာ မနေ့က အဖွဲ့ကနေ တရားဝင်နှုတ်ထွက်လိုက်ပြီး ထောက်ခံမှုတွ၊ ဆန့်ကျင်မှုတွေလည်း တစ်ပြိုင်နက်တည်း ပေါ်ပေါက်လာခဲ့ပါတယ်။

ဥရောပသမဂ္ဂကနေ နှုတ်ထွက်ရေးလှုပ်ရှားမှု Brexit အတွက် လူထုဆန္ဒခံယူအပြီး ၃ နှစ်ခွဲအကြာမှာ အခုလို တရားဝင် နှုတ်ထွက်နိုင်ခဲ့တာ ဖြစ်ပါတယ်။

ယူကေဝန်ကြီးချုပ် ဘောရစ် ဂျွန်ဆင်က ‌ဒီအချိန်ဟာ လူတော်တော်များများအတွက် မျှော်လင့်ချက်ရောင်ခြည်သန်းတဲ့ကာလ၊ ဘယ်တုန်းကမှ မထင်မှတ်ထားတဲ့ကာလ ဖြစ်တယ်လို့ ပြောကြားခဲ့ပါတယ်။

“ဆုံးရှုံးသွားတယ်လို့ ခံစားရသူတွေ၊ စိုးရိမ်သူတွေလည်း တော်တော်များများ ရှိမှာပါ။ နိုင်ငံရေး ဆွေးနွေးငြင်းခုံမှုတွေ ဘယ်တော့မှ ဆုံးသတ်မှာမဟုတ်ဘူးလို့ ထင်တဲ့ တတိယအုပ်စုက အများဆုံး ဖြစ်ပါလိမ့်မယ်။ ‌လူတွေရဲ့ခံစားချက်တွေကို ကျွန်တော်နားလည်ပြီး တိုင်းပြည်ရှေ့ဆက်လျှောက်လှမ်းဖို့ အတူတကလုပ်ဆောင်ရေးဟာ ကျွန်တော့်ရဲ့တာဝန်၊ အစိုးရဲ့အလုပ်ဆိုတာကိုလည်း ကျွန်တော် သိပါတယ်”

နှစ်ပေါင်း ၅၀ လောက် ဖြစ်တည်ခဲ့တဲ့ ဥရောပသမဂ္ဂဟာ ဗြိတိန်နဲ့ မသင့်လျော်တော့ကြောင်း၊ ဒါဟာ အဆုံးမဟုတ်ဘဲ အစသာဖြစ်ကြောင်း ဝန်ကြီးချုပ်က ထည့်သွင်း ပြောကြားခဲ့ပါတယ်။ ဘယ်လ်ဂျီယံနိုင်ငံ ဘရပ်ဆဲလ်မြို့ ဥရောပသမဂ္ဂအဆောက်အအုံက ယူနီယံဂျက်အလံကိုလည်း ဖယ်ရှားခဲ့ပါတယ်။

ဥရောပသမဂ္ဂကနေ နှုတ်ထွက်မှုအခမ်းအနား၊ ပျော်ပွဲရွှင်ပွဲတွေကို အင်္ဂလန်က ပါလီမန်ရင်ပြင် အပါအဝင်၊ ယူကေတစ်ဝှမ်းမှာ ပြည်သူတွေက ကျင်းပခဲ့ကြပြီး၊ ဆန့်ကျင်တဲ့ တန်ပြန်ဆန္ဒပြမှုတွေလည်း ရှိခဲ့ပါတယ်။

မြောက်အိုင်ယာလန်က Brexit ဆန့်ကျင်ရေးအဖွဲ့ Border Communities Against Brexit က အိုင်ယာလန် နယ်စပ်အနီးမှာ ဆန္ဒပြမှုတွေ ပြုလုပ်ခဲ့ပြီး မြောက်အိုင်ယာလန်နဲ့ အိုင်ယာလန်သမ္မတနိုင်ငံတို့ရဲ့ ဝန်ကြီးချုပ် အာလီနီ ဖော်စတာက သူတို့ဟာ အိမ်နီးချင်းတွေအဖြစ် ဆက်လက်ရှိနေမယ်လို့ ပြောကြားခဲ့ပါတယ်။

စကော့တလန်ဝန်ကြီးချုပ် နီကိုလာ စတာဂျန်က စကော့တလန်ဟာ လွတ်လပ်တဲ့နိုင်ငံတစ်ခုအဖြစ် ဥရောပသမဂ္ဂနဲ့ ပြန်လည်ပေါင်းစည်းသွာမယ်လို့ ဥရောပသမဂ္ဂအလံနဲ့အတူ Twitter စာမျက်နှာမှာ ရေးသားခဲ့ပါတယ်။ စတာဂျန်ဟာ ယူကေကနေ စကော့တလန်ခွဲထွက်ရေး လူထုဆန္ဒခံယူပွဲ အသစ်တစ်ခုပြုလုပ်ဖို့လည်း တိုက်တွန်းဆော်ဩခဲ့ပါတယ်။

Ref: BBC

February 1, 2020
တစ်ပတ်အတွင်း ကျန်းမာရေးဆိုင်ရာ သတင်းများ

ဇန်နဝါရီ ၃၀၊ ၂၀၂၀
M-Media

The ultrastructural morphology exhibited by the 2019 Novel Coronavirus (2019-nCoV), which was identified as the cause of an outbreak of respiratory illness first detected in Wuhan, China, is seen in an illustration released by the Centers for Disease Control and Prevention (CDC) in Atlanta, Georgia, U.S. January 29, 2020. Alissa Eckert, MS; Dan Higgins, MAM/CDC/Handout via REUTERS

ဝူဟန်ဗိုင်းရပ်စ် ကုသဆေး ကမ္ဘာ့ပညာရှင်များ အပြင်းအထန်ရှာဖွေနေ

တရုတ်နိုင်ငံကနေစတင်ပြီး ကမ္ဘာ့နိုင်ငံပေါင်း ၁၉ ခုလောက်မှာ ပြန့်နှံ့ဖြစ်ပွားနေတဲ့ ကိုရိုနာဗိုင်းရပ်စ်သစ်အတွက် ကာကွယ်ဆေး၊ ကုသဆေးတွေကို ကမ္ဘာ့သိပ္ပံပညာရှင်တွေက အပြင်းအထန် ရှာဖွေဖော်ထုတ်နေပါတယ်။ တရုတ်တာဝန်ရှိသူတွေဟာ ဗိုင်းရပ်စ်ပိုးရဲ့ ဗီဇကုဒ် (genetic code) ကို ထုတ်ပေးနိုင်တဲ့အတွက် ဘယ်ကနေစတင်တယ်၊ ဘယ်လိုပုံပြောင်းပြီး၊ ဘယ်လိုဖွံ့ဖြိုးလာတယ်ဆိုတာကို သိပ္ပံပညာရှင်တွေက ဖော်ထုတ်နေပြီ ဖြစ်ပါတယ်။

အမေရိကန်ပြည်ထောင်စု ဆန်ဒီယေဂိုက သိပ္ပံပညာရှင်တွေဟာ DNA အမျိုးအစားသစ်တစ်ခုကို အသုံးပြုကာ INO-4800 ဆိုတဲ့ ကာကွယ်ဆေးတစ်မျိုးကို ဖန်တီးနေပြီး လာမယ့်နှစ် နွေရာသီလောက်မှာ လူသားတွေကိုစမ်းသပ်ကာ အောင်မြင်မယ်ဆိုရင် အခုနှစ်နှောင်းပိုင်းလောက်မှာ အသုံးပြုဖို့ စီစဉ်ထားပါတယ်။ ဝူဟန်ဗိုင်းရပ်စ်ကူးစက်မှုဟာ အဲဒီအချိန်လောက်မှာ ပျောက်ကွယ်သွားနိုင်ပေမယ့် နောက်ထပ် အဲဒီလိုဗိုင်းရပ်စ်မျိုး ပြန့်နှံမှုအတွက် ကြိုတင်ကာကွယ်ဆေးမျိုး ဖြစ်လာဖို့ သိပ္ပံပညာရှင်တွေက မျှော်လင့်ထားကြပါတယ်။

စိတ်ဖိစီးမှုပျောက် စပရေးရှုဆေးကို ယူကေကျန်းမာရေးအဖွဲ့ ကန့်ကွက်

စိတ်ဖိစီးမှုကို ပျောက်စေပြီး နာရီပိုင်းအတွင်း စိတ်ဓာတ်တက်ကြွမှုကိုဖြစ်စေတဲ့ စပရေးရှုဆေးဟာ စျေးနှုန်းအရရော၊ ကျန်းမာရေးဆိုင်ရာ ရှုထောင့်အရပါ မကောင်းဘူးလို့ ယူကေ ကျန်းမာရေးစောင့်ကြည့်အဖွဲ့ NICE က ပြောကြားလိုက်ပါတယ်။ ကက်တမင်းလို ဓာတုပစ္စည်းသုံးထားတဲ့ အဲဒီရှူဆေးကို ယူကေမှာ စမ်းသပ်နေပြီး တစ်ခါအသုံးပြုဖို့အတွက် ပေါင်တစ်သောင်းလောက် ပေးရတာပါ။ စပရေးဟာ နာရီပိုင်းအတွင်း စိတ်ဖိစီးမှုကို ပြေပျောက်စေပေမယ့် ရေရှည်အကျိုးရှိမလားဆိုတာ မသေချာဘူးလို့ ကျန်းမာရေးဆိုင်ရာ ကျွမ်းကျင်သူတွေက ထောက်ပြခဲ့ကြပါတယ်။

အပြစ်ပေးခြင်းထက်၊ ချီးကျူးခြင်းက ကျောင်းသားများအတွက် ပိုမိုကောင်းမွန်

မူလတန်းကျောင်းတွေမှာ ဆရာတွေက အပြစ်ပေးတဲ့အစား၊ ချီးကျူးတဲ့စနစ်ကို ပိုမိုအသုံးပြုတာဟာ ကလေးတွေ ကျောင်းစာအပေါ် အာရုံစူးစိုက်မှုကို အထောက်အကူဖြစ်စေသလို၊ ကလေးတွေရဲ့ အပြုအမူတွေကိုလည်း ကောင်းမွန်စေတယ်လို့ အမေရိကန် Brigham Young တက္ကသိုလ်က ပြုလုပ်တဲ့ လေ့လာမှုတစ်ခုမှာ တွေ့ခဲ့ရပါတယ်။ ပညာရေးစနစ်မှာ အပြစ်ပေးတာမျိုး ရှိသင့်ပေမယ့်၊ ချီးကျူးတာနဲ့ယှဉ်ရင် ၃ ချိုး ၁ ချိုး၊ ၄ ချိုး ၁ ချိုးလောက်သာ ရှိသင့်တယ်လို့လည်း သုတေသန ပညာရှင်တွေက ပြောကြားခဲ့ပါတယ်။ လေ့လာမှုကို အမေရိကန် ပြည်နယ် ၃ ခုက မူလတန်းကျောင်း ၁၉ ခုမှ ၃ နှစ်‌ကြာ ဆောင်ရွက်ခဲ့ပြီး မူကြိုကနေ ၆ တန်းအထိတက်တဲ့ အသက် ၆ နှစ်ကနေ ၁၂ နှစ်အရွယ် ကလေးငယ်ပေါင်း ၂၅၃၆ ဦးကို ‌စောင့်ကြည့်မှတ်တမ်းတင်ခဲ့တာ ဖြစ်ပါတယ်။

Ref: CNN,BBC

mmHelthNews

January 30, 2020
ကင်ဆာအားလုံး ကုသနိုင်မည့် နည်းလမ်းတစ်ခု လူ့ကိုယ်ခံစွမ်းအားတွင် တွေ့ရှိ

ဇန်နဝါရီ ၂၁၊ ၂၀၂၀
M-Media

-လူသားတွေရဲ့ ကိုယ်ခံစွမ်းအားစနစ်ကနေ လတ်တလော ရှာဖွေတွေ့ရှိခဲ့တဲ့ အစိတ်အပိုင်းတစ်ခုဟာ ကင်ဆာရောဂါအားလုံးကို ပျောက်ကင်းစေမယ့် အလားအလာ ရှိတယ်လို့ သိပ္ပံပညာရှင်တွေက ပြောကြားလိုက်ပါတယ်။

ကိုယ်ခံစွမ်းအားစနစ် (Immune System) ဆိုတာ ခန္ဓာကိုယ်အတွင်း ကူးစက်ရောဂါတွေ ဝင်ရောက်မှုကို တားဆီးကာကွယ်တဲ့ စနစ်လို့ လူသိများပြီး ဒီစနစ်ဟာ ကင်ဆာဆဲလ်တွေကိုလည်း တိုက်ဖျက်ပေးပါတယ်။

ယူကေနိုင်ငံ ကာဒစ်ဖ်တက္ကသိုလ်က သိပ္ပံပညာရှင်အဖွဲ့တစ်ခုရဲ့ လေ့လာဆန်းစစ်မှုမှာ ကိုယ်ခံစွမ်းအားစနစ်က အစိတ်အပိုင်းသစ်တစ်ခုကို တွေ့ရှိခဲ့ရပြီး ဓာတ်ခွဲခန်းအတွင်း ဆီးကြိတ်ကင်ဆာ၊ ရင်သားကင်ဆာ၊ အဆုတ်ကင်ဆာနဲ့ အခြားကင်ဆာတွေကို ဖျက်ဆီးပေးနိုင်တာ တွေ့ခဲ့ရပါတယ်။

ပညာရှင်တွေဟာ ဒီတွေ့ရှိချက်ကို Nature Immunology ဂျာနယ်မှာ ဖော်ပြခဲ့ပါတယ်။ လက်ရှိ လူသားတွေမှာ စမ်းသပ်ရခြင်း မရှိသေးပေမယ့် အောင်မြင်နိုင်မယ့်အလားအလာကောင်းတွေ ရှိနေတယ်လို့လည်း ပညာရှင်တွေက ပြောကြားခဲ့ပါတယ်။

ဘာကိုတွေ့တာလဲ

သိပ္ပံပညာရှင်တွေဟာ သွေးထဲက T-cell လို့ခေါ်တဲ့ ဆဲလ်တစ်မျိုးကို တွေ့ရှိခဲ့တာဖြစ်ပြီး ဒီဆဲလ်ဟာ ခန္ဓာကိုယ်ထဲမှာ တိုက်ဖျက်ရမယ့် ရောဂါတွေရှိလားဆိုတာ စောင့်ကြည်စကန်ဖတ်ပေးတဲ့ ဆဲလ်ဖြစ်ပါတယ်။ ဒီဆဲလ်ရဲ့ နောက်ထပ်ထူးခြားချက်က ကင်ဆာဆဲလ်တော်တော်များများကို ဖျက်ဆီးနိုင်တာဖြစ်ပါတယ်။

သိပ္ပံပညာရှင် ပရော်ဖက်ဆာ အန်ဒရူးဆီဝဲလ်က ‌အခုတွေ့ရှိမှုဟာ ကင်ဆာရောဂါအားလုံးကို ကုသနိုင်မယ့် အခွင့်အလမ်းတစ်ခုဖြစ်တယ်လို့ ပြောကြားခဲ့ပါတယ်။

အရင်က T-cell နဲ့ကုသတဲ့ ကင်ဆာကုထုံး ရှိပေမယ့် လူကီးမီးယားလို သွေးကင်ဆာမျိုးမှာပဲ ကုသလို့ရပြီး အကြိတ်ထွက်တဲ့ ကင်ဆာရောဂါမျိုးတွေမှာတော့ အောင်မြင်မှုမရပါဘူး။

Ref: BBC

January 21, 2020
မွတ်စလင်အမျိုးသမီးများကို စော်ကားသည့် မှတ်ချက်အတွက် ဗြိတိန်ဝန်ကြီးချုပ် ပြန်တောင်းပန်

ဒီဇင်ဘာ ၅၊ ၂၀၁၉
M-Media

-မွတ်စလင်အမျိုးသမီးတွေကို စော်ကားရာရောက်တဲ့ အရင်ကမှတ်ချက်တစ်ခုအတွက် ဗြိတိန်ဝန်ကြီးချုပ် ဘောရစ်ဂျွန်ဆင်က ပြန်လည်တောင်းပန်လိုက်ပါတယ်။

ဂျွန်ဆင်ဟာ ပြီးခဲ့တဲ့နှစ်က Telegraph သတင်းစာမှာ ဆောင်းပါတစ်ပုဒ် ရေးသားခဲ့ပြီး အဲဒီဆောင်းပါးမှာ ဘုရ်ခါဝတ်ရုံဝတ်တဲ့ မွတ်စလင်အမျိုးသမီးတွေကို ‘စာတိုက်ပုံး’ ‘ဘဏ်ဓားပြ’ စသဖြင့် ရေးသားခဲ့တာပါ။

မနေ့က ITV ရဲ့ This Morning အစီအစဉ်မှာ အစီအစဉ်တင်ဆက်သူတွေက ဒီမှတ်ချက်ဟာ မွတ်စလင်တွေကို စော်ကားသလိုဖြစ်ပြီး ထိခိုက်နာကျင်စေခဲ့ရတယ်လို့ ပြောကြားရာမှာတော့ ဘောရစ်ဂျွန်ဆင်က ပြန်လည်တောင်းပန်ခဲ့ပါတယ်။

“ဆောင်းပါးအမျိုးမျိုးကနေ လူတွေက လိုချင်တာ ဆွဲထုတ်ပြောကြတယ်။ ကျွန်တော်ရေးတာဟာ စော်ကားသလိုဖြစ်သွားရင်တောင်းပန်တယ်လို့ အရင်က ကျွန်တော်ပြောခဲ့ပြီး အခုလည်း ထပ်ပြောပါတယ်”

သူ့ရဲ့ ကွန်ဆာဗေးတစ်ပါတီဟာ နိုင်ငံခြားသားကြောက်ရောဂါ၊ သမရိုးကျ ထင်မြင်ယူဆ စွပ်စွဲမှုတွေအားလုံးကို စုံစမ်းကိုင်တွယ်နေတယ်လို့လည်း ဘောရစ်ဂျွန်ဆင်က ထည့်သွင်းပြောကြားခဲ့ပါတယ်။

Telegraph က ဆောင်းပါးမှာ လူတွေက စာတိုက်ပုံးလိုအဖြစ်ခံပြီး ဘုရ်ခါဝတ်ဆင်တာမျိုးဟာ ရူးနှမ်းပေမယ့် ဘုရ်ခါဝတ်ဆင်မှုကို မပိတ်ပင်သင့်ဘူးလို့ ရေးသားခဲ့တာပါ။ ဒီလိုရေးသားမှုအတွက် အဲဒီတုန်းက ဝန်ကြီးချုပ် ထရီဇာမေအပါအဝင် ကွန်ဆာဗေးတစ်ပါတီ အကြီးအကဲတွေက တောင်းပန်ဖို့ ပြောခဲ့ပေမယ့် ဂျွန်ဆင်ကတော့ မလိုက်နာခဲ့ပါဘူး။

ဂျွန်ဆင်ဟာ Single mother နဲ့ သူတို့ရဲ့ကလေးတွေအကြောင်း ဝေဖန်ရေးသားတာမျိုး ရှိခဲ့ပြီး အဲဒီအတွက် ITV အစီအစဉ်တင်ဆက်သူတွေရဲ့ မေးမြန်းမှုမှာ တောင်းပန်ဖို့ ငြင်းဆိုခဲ့ပါတယ်။

Ref: The Guardian

December 5, 2019
အမုန်းရာဇဝတ်မှုများကို တိုင်ကြားရန် ဗြိတိန်ရဲတပ်ဖွဲ့က မွတ်စလင်အမျိုးသမီးများကို တိုက်တွန်း

အောက်တိုဘာ ၁၄၊ ၂၀၁၉
M-Media

-လူမျိုးဘာသာ ခွဲခြားမှုတွေ၊ အမုန်းဆောင်စော်ကားမှုတွေနဲ့ ကြုံတွေ့လာတဲ့အခါမှာ သက်ဆိုင်ရာကို တိုင်ကြားဖို့အတွက် ဗြိတိန်ဒေသန္တရ ရဲတပ်ဖွဲ့တစ်ခုက အစ္စလာမ်ဘာသာဝင် အမျိုးသမီးတွေကို တိုက်တွန်းဆော်ဩလိုက်ပါတယ်။

ဗြိတိန်မှာ တစ်ချို့ မွတ်စလင်အမျိုးသမီးတွေဟာ လူမျိုးရေး ခွဲခြားစော်ကားမှုကို နေ့စဉ်လိုလို ခံစားနေရတာပါ။ အင်္ဂလန်အနောက်ပိုင်း အေဗွန်ခရိုင် ရဲတပ်ဖွဲ့က တာဝန်ရှိသူ ‌အန်ဒီ ဘန်းနက်က ပြီးခဲ့တဲ့ ၂ နှစ်အတွင်း ခရိုင်မှာ ဖြစ်ပွားခဲ့တဲ့ အမုန်းဆောင် ရာဇဝတ်မှုတွေရဲ့ ၄ ပုံ ၃ ပုံဟာ အမျိုးသမီးတွေအပေါ် ပစ်မှတ်ထားတာ ဖြစ်တယ်လို့ ပြောကြားခဲ့ပါတယ်။

လူမျိုးရေး ခွဲခြားစော်ကားမှုတွေကို လူဖြူ လူငယ်အမျိုးသားတွေက အများစု ကျူးလွန်ကြတာဖြစ်ပြီး ဒါတွေဟာ ပုံမှန်ဖြစ်နေကြလို့ ကျူးလွန်ခံရသူအချို့က မှတ်ယူနေကြကြောင်း ဘန်းနက်က ထည့်သွင်း ပြောဆိုခဲ့ပါတယ်။

အမုန်းရာဇဝတ်မှု ပပျောက်ရေး လှုပ်ရှားနေတဲ့ We Rise အဖွဲ့က အမျိုးသမီးတွေအနေနဲ့ အမုန်းဆောင် ရာဇဝတ်မှုတွေကို တိုင်ကြားရာမှာ အခက်အခဲ အတားအဆီးတွေ ကြုံတွေ့နေရတယ်လို့ ပြောကြားခဲ့ပါတယ်။

တိုင်ကြားမှုအားနည်း

ရဲအရာရှိ ဘန်းနက်က မွတ်စလင်အမျိုးသမီးတွေဟာ ဆဲဆိုတာ၊ ခြိမ်းခြောက်တာ၊ အရှက်ခွဲတာလို လူမျိုးရေး ခွဲခြားစော်ကားမှုတွေကို နေ့စဉ်လိုလို ခံစားနေရပြီး ဒါတွေပပျောက်အောင် လုပ်ဆောင်သွားချင်တယ်လို့ ပြောကြားခဲ့ပါတယ်။

“နေ့စဉ်လိုလို ကြုံတွေ့နေရတာကြောင့် မထူးတော့ပါဘူးလို့ သူတို့က ထင်နေကြတယ်။ ဒီလို အပြုအမူတွေကို လက်ခံလိုက်တာမျိုးကို ရဲတပ်ဖွဲ့က မလိုလားဘူးဆိုတာ ကျွန်တော် ပြောချင်ပါတယ်”

We Rise အဖွဲကို တည်ထောင်သူ အလီယာ ဟူစိန်က အမုန်းဆောင်ရာဇဝတ်မှုတွေကို မွတ်စလင်အမျိုးသမီးတွေက သွားရောက်တိုင်ကြားတဲ့အခါမှာ အခြားသောအမျိုးသမီးတွေလို အရေးတယူ ဆောင်ရွက်ပေးတာမျိုး မရှိကြဘူးလို့ ထောက်ပြခဲ့ပါတယ်။

“အာဏာပိုင်တော်တော်များများက မွတ်စလင်အမျိုးသမီးတွေဟာ အမျိုးသားတွေရဲ့ ထိန်းချုပ်မှုအောက်မှာ နေကြရတဲ့အတွက် ရာဇဝတ်မှုတွေကို တိုင်ကြားခွင့်မရကြဘူးလို့ အာဏာပိုင်တော်တော်များများက ထင်နေကြတယ်။ လိင်ပိုင်းဆိုင်ရာ အစော်ကားခံရမှု၊ အဓမ္မကျင့်ခံရမှု၊ အိမ်တွင်းအကြမ်းဖက်မှုတွေလို ကျား၊ မ အခြေပြုတဲ့ အကြမ်းဖက်မှု ကိန်းဂဏန်းတွေကို ကြည့်လိုက်ရင် တိုင်ကြားမှုပမာဏဟာ တော်တော်လေးနည်းနေတာကို တွေ့ရပါလိမ့်မယ်”

ဘန်းနက်ကလည်း ဗြိတိန်ရာဇဝတ်မှု စစ်တမ်းကောက်ယူမှု British Crime Survey အရ အမှန်တကယ် ဖြစ်ပွားမှုနဲ့ လာရောက်တိုင်ကြားမှုကြားမှာ အရေအတွက် သိသိသာသာ ကွာဟမှု ရှိနေပြီး ၅၀ ရာခိုင်နှုန်းလောက်အထိ ရှိလိမ့်မယ်လို့ ပြောကြားခဲ့ပါတယ်။

မွတ်စလင်အမျိုးသမီးတွေဟာ အမျိုးသားတွေလို နေ့စဉ် ဗလီတက်တာမျိုး မရှိတဲ့အတွက် မွတ်စလင်အမျိုးသမီးတွေထံကနေ အချက်အလက်တွေ ရရှိရေး ရဲတပ်ဖွဲ့က ပိုမိုကြိုးစားအားထုတ်ရတယ်လို့လည်း ဘန်းနက်က ဆိုပါတယ်။

ပြီးခဲ့တဲ့နှစ်အနည်းငယ်အတွင်း ဗြိတိန်မှာ အစ္စလာမ်ဘာသာဝင်တွေအပေါ် ပစ်မှတ်ထားတဲ့ အမုန်းဆောင်ရာဇဝတ်မှု အရေအတွက်ဟာ မြင့်တက်လာခဲ့ပါတယ်။ ၂၀၁၇ ခုနှစက်ကနေ ၂၀၁၉ ခုနှစ် ဩဂုတ်လအထိ အေဗွန်ခရိုင် ဘရစ္စတိုမြို့မှာ မွတ်စလင်အမျိုးသမီးတွေအပေါ် ပစ်မှတ်ထားတဲ့ လူမျိုးရေး ခွဲခြားစော်ကားမှုပေါင်း ၁၉၁ မှု ရှိခဲ့ပါတယ်။

Ref: BBC

October 14, 2019