ဒီဇင်ဘာ ၂၀၊ ၂၀၁၆
M-Media
– တူရကီနိုင်ငံဆိုင်ရာ ရုရှားသံအမတ်ကို လုပ်ကြံခဲ့သည့် သေနတ်သမားမှာ ပစ်ခတ်မှုအပြီးတွင် ဆီးရီးယားနိုင်ငံ အဲလစ်ပိုတွင် ဆီးရီးယားအစိုးရနှင့် ရုရှားတို့ ပူးပေါင်းကာ သူပုန်များအား တိုက်ခိုက်နေမှုကို ရည်ညွှန်းပြောဆိုသွားခဲ့သည်ဟု သိရသည်။
အသက် ၆၂ နှစ်အရွယ်ရှိ ရုရှားသံအမတ် အန်ဒရေး ကာရ်လော့ဗ်မှာ ယမန်နေ့က အန်ကာရာ၌ ရုရှားသံရုံးမှ ဦးစီးပြုလုပ်သော ဓာတ်ပုံပြပွဲတွင် မိန့်ခွန်းပြောကြားနေစဉ် အနောက်ဖက်မှ အနီးကပ်ပစ်သတ်ခံလိုက်ရခြင်းဖြစ်သည်။
လုပ်ကြံသူမှာ အသက် ၂၂ နှစ်အရွယ် အန်ကာရာအခြေစိုက် ရဲတပ်ဖွဲ့ဝင်တစ်ဦးဖြစ်ပြီး တာဝန်ချိန်ပြင်ပ၌ ယခုကဲ့သို့ ကျူးလွန်ခြင်းဖြစ်သည်။ တူရကီ ရဲတပ်ဖွဲ့မူ အဆိုပါလုပ်ကြံသူကို နောက်ပိုင်းတွင် အသေဖမ်းဆီးခဲ့သည်။
“အဲလစ်ပိုကို မမေ့ပါနဲ့၊ ဆီးရီးယားကို မမေ့ပါနဲ့။ ဒီလိုရက်စက်ကြမ်းကြုတ်မှုမှာ ပါဝင်သူတွေဟာ ပြန်ပေးဆပ်ကြရလိမ့်မယ်။ ဒီနေရာကနေ ကျုပ်ကို အရှင်ဖမ်းလို့ရမှာ မဟုတ်ဘူး” ဟု အဆိုပါ သေနတ်သမားက ဟစ်အော်ပြောကြားခဲ့သည်။
ကာရ်လော့ဗ်မှာ သံတမန် အသိုင်းအ၀ိုင်းထဲသို့ ၁၉၇၆ ခုနှစ်တွင် ၀င်ရောက်လာခြင်းဖြစ်ပြီး ၂၀၀၁ ခုနှစ်မှ ၂၀၀၆ ခုနှစ်အထိ မြောက်ကိုရီးယား သံအမတ်အဖြစ် ထမ်းဆောင်ခဲ့ဖူးသည်။ တူရကီသံအမတ်အဖြစ် ၂၀၁၃ ခုနှစ်တွင် စတင် တာဝန်ထမ်းဆောင်ခဲ့ခြင်းဖြစ်သည်။
ပြီးခဲ့သည့် သီတင်းပတ်များအတွင်း ရုရှားနှင့် အီရန်တို့ ကျောထောက်နောက်ခံပြုထားသည့် ဆီးရီးယားအစိုးရတပ်များမှာ သူပုန်များထိန်းချုပ်ထားရာ အဲလစ်ပိုမြို့အား တိုက်ခိုက်မှုများကို တရစပ် ပြုလုပ်ခဲ့ပြီး ပြည်သူအများအပြား သေဆုံးခဲ့ရသည်။
Ref: Aljazeera