စက်တင်ဘာ ၁၂၊ ၂၀၁၃
M-Media
သုတ
မိတ္ထီလာ ။ ။ မန္တလေးတိုင်းဒေသကြီး၊ မိတ္ထီလာခရိုင်တွင် ဘာသာပေါင်းစုံပါဝင်သေ ဘာသာပေါင်းစုံ ချစ်ကြည်ရေးနှင့် ညီညွတ်ရေးအဖွဲ့ကို ယနေ့ နံနက် ၉း၃၀-နာရီ၌ မိတ္ထီလာခရိုင် အထွေထွေ အုပ်ချုပ်ရေးရုံးတွင် ဖွဲ့စည်းလိုက်ကြောင်း သတင်းရရှိသည်။
မန္တလေးတိုင်း ဘာသာပေါင်းစုံ ချစ်ကြည်ရေးနှင့် ညီညွတ်ရေး အဖွဲ့၏ ဥက္ကဌ ဦးကျော်ဝင်း၊ အတွင်းရေးမှူး ဒေါ်ခင်စောဦး၊ ဦးမြင့်အောင်၊ ဦးခင်မောင်သိန်း၊ ကိုစလင်းတို့ ရောက်ရှိလာပြီး ဘာသာပေါင်းစုံမှ ဘာသာရေးခေါင်းဆောင်များ တက်ရောက်ပါဝင်ပြီး မိတ္ထီလာခရိုင် ဘာသာပေါင်းစုံချစ်ကြည်ရေးနှင့် ညီညွတ်ရေးကို အဖွဲ့ကို ယနေ့ မနက် ၉း၃၀-နာရီ မိတ္ထီလာခရိုင် အထွေထွေအုပ်ချုပ်ရေးမှူးရုံးတွင် ဖွဲ့စည်းခဲ့ရာ ၁၁-နာရီတွင် ဖွဲ့စည်းပြီးစီးသွားခဲ့သည်။
ယင်း ဖွဲ့စည်းမှုတွင် ခရိုင် သာသနာရေးရာဦးစီးမှူးမှ အခမ်းအနားမှူးမှ ပါဝင်ဆောင်ရွက်ပေးပြီး ကြီးကြပ်ဖွဲ့စည်းပေးသည်မှာ ဘာသာပေါင်းစုံ ချစ်ကြည်ညီညွတ်ရေး အဖွဲ့မှ ဖြစ်သည်။ ယင်းသို့ ခရိုင်အထွေထွေ အုပ်ချုပ်ရေးမှူးမှ တက်ရောက် ပါဝင်နိုင်ခြင်းမရှိဟုလည်း သိရသည်။ မိတ္ထီလာခရိုင်မှာ ဘာသာတစ်ခုလျှင် ၉-ဦးစီ ပါဝင်ပြီး ဖွဲ့စည်းခဲ့သည်။ ဥက္ကဌနှင့် အတွင်းရေးမှူးတာဝန်ကို ဗုဒ္ဓဘာသာမှ တာဝန်ယူပြီး၊ တွဲဘက်အတွင်းရေးမှူး၊ ဒုတိယဥက္ကဌစသည့်တာဝန်များအား ကျန်သည့်ဘာသာဝင်များမှ အတူ ပူးတွဲ ယူခဲ့သည်။ စာရင်းစစ်နှင့် ပြန်ကြားရေးအဖွဲ့တို့တွင်လည်း ဘာသာလေးခုမှ ပုဂ္ဂိုလ် ၄-ဦးစီ ပါဝင်ခဲ့ကြသည်။ ယခုကဲ့သို့ ခရိုင်ဖွဲ့စည်းပြီးပါက မြို့နယ်နှင့် ရပ်ကွက်များလည်း ထပ်မံ ဖွဲ့စည်းသွားမည်ဖြစ်ကြောင်းသိရသည်။
၎င်းနောက် နေ့လည် ၂-နာရီ တွင် ရမည်းသင်းခရိုင် အထွေထွေ အုပ်ချုပ်ရေးရုံးတွင်ပင် ရမည်းသင်း ခရိုင် ဘာသာပေါင်းစုံ ချစ်ကြည်ရေးနှင့် ညီညွတ်ရေးအဖွဲ့ကို ဖွဲ့စည်းခဲ့သည်။ ရမည်းသင်း ခရိုင်နှင့် မြို့နယ် အထွေထွေအုပ်ချုပ်ရေးမှူးများကိုယ်တိုင် ပါဝင်တက်ရောက်ပြီး သာသနာရေးမှူးမှ အခမ်းအနားမှူးအဖြစ် ပါဝင်ဆောင်ရွက်ပေးခဲ့ကြောင်းသိရသည်။
ရမည်းသင်း ခရိုင်အုပ်ချုပ်ရေးမှူး ဦးကျော်ကျော်ထွန်းမှ “အားလုံးဟာ ညီအစ်ကိုများဖြစ်ကြောင်း၊ တမြေတည်းနေ တလှေတည်းစီး၊ နှစ်ပေါင်းများစွာကတည်းက အတူလက်တွဲနေထိုင်လာသူတွေဖြစ်တာကြောင့် လျှာနဲ့သွားလို မတော်တဆ ထိခိုက်မိပါက အချင်းချင်း အပြန်အလှန် ထိန်းကျောင်းပြီး ချစ်ကြည်ညီညွတ်ရေး ကိစ္စများ ဆောင်ရွက်ကြပါ”လို့ ညီညွတ်ရေးအားပေးစကားပြောရင်း သမ္မတကြီး ဦးသိန်းစိန်၏ မိန့်ခွန်းကို အကောင်အထည်ဖော်ရန် အပြည့်အ၀ တွန်းအားပေးခဲ့ပါတယ်။
ယခုကဲ့သို့ Hate Speech များ ပွားပြားနေသော အချိန်ကာလတွင် ဒေသအာဏာပိုင်မှ သဘောထားကြီးပြီး၊ အပြန်အလှန် ခွင့်လွှတ်ဖို့၊ ညီအစ်ကို မောင်နှမတွေလို ချစ်ချစ်ခင်ခင်ရှိဖို့၊ တိုင်းပြည်အတွက် ၀ိုင်းဝန်းလက်တွဲကြဖို့ကို လမ်းညွှန်အားပေးစကားပြောခဲ့တာကြောင့် ရမည်းသင်းမြို့ခံများက ကျေးဇူးတင် ၀မ်းသာကြောင်းလည်း ရမည်းသင်းမြို့ခံတချို့က M-Media ကို ပြောပြခဲ့ပါတယ်။
အဖွဲ့အနေနှင့် စိတ်စေတနာကောင်းထားရှိရန်နှင့် ၀ိုင်းဝန်း ဆောင်ရွက်ကြရန် တိုင်းဘာသာပေါင်းစုံချစ်ကြည်ရေးအဖွဲ့မှ လမ်းညွှန်ပေးခဲ့ကြောင်းလည်း သိရသည်။
Leave a Reply
You must be logged in to post a comment.