မတ် ၁၅၊ ၂၀၁၄
M-Media

– ၂၀၂၂ ကမ္ဘာ့ဖလားပြိုင်ပွဲ ကျင်းပပြုလုပ်မည့် ကာတာနိုင်ငံ၏ အလုပ်သမားပြဿနာများအတွက် မိမိတို့မှာ တာဝန်ရှိသော အဖွဲ့အစည်းမဟုတ်ဟု ဖီဖာအကြီးတန်း အရာရှိ တစ်ဦးက ပြောကြားလိုက်သည်။
၂၀၂၂ ကမ္ဘာဖလားပြိုင်ပွဲ ကျင်းပရေး တည်ဆောက်ရေး လုပ်ငန်းခွင်မှ ဆောက်လုပ်ရေး လုပ်ငန်းများ၏ အလုပ်သမားများအား ကာတာနိုင်ငံမှ ဆက်ဆံမှုများနှင့် ပတ်သက်၍ ဝေဖန်မှုများ ထွက်ပေါ်လာနေခြင်းကြောင့် ဖီဖာမှ ယခုကဲ့သို့ ပြောကြားလိုက်ခြင်းဖြစ်သည်။ အလ်ဂျာဇီးရားသတင်းဌာနနှင့် အင်တာဗျူးတွင် ဖီဖာ၏ အထွေထွေအတွင်းရေးမှူး ဂျီရိုမီ ဗဲလ်က်က ထိုကိစ္စအတွက် ကာတာနှင့် အချို့အဖွဲ့အစည်းများအကြား ဆွေးနွေးမှုများကို ဖီဖာမှ ထောက်ပံ့ပေးနေသည်ဟု ပြောကြားခဲ့သည်။ သို့သော် မိမိတို့အဖွဲ့၏ လုပ်ငန်းများ မဟုတ်သည့်အတွက် တာဝန်ယူမည်မဟုတ်ဟုဆိုသည်။
“ဖီဖာဟာ ကုလသမဂ္ဂ မဟုတ်ပါဘူး။ ဖီဖာဆိုတာ အားကစားအဖွဲ့တစ်ခုပါ။ နိုင်ငံတစ်နိုင်ငံရဲ့နိုင်ငံခြားရေးပေါ်လစီက ဘာဖြစ်သင့်တယ်ဆိုတာကို ကျွန်တော်တို့ ပြောလို့ မရပါဘူး။ အဲဒါဟာ ကျွန်တော်တို့ရဲ့ အခန်းကဏ္ဍ မဟုတ်ပါဘူး” ဟု ဗဲလ်က်က ဆိုသည်။
ထို့ပြင် ထိုကိစ္စနှင့်ပတ်သက်၍ တစ်ကမ္ဘာလုံးမှ ဖီဖာအား ဖိအားပေးခြင်းမှာ မျှတမှုမရှိကြောင်း၊ ဖီဖာ၏ ကျင့်ဝတ်၊ စည်းကမ်းချက်များကို ချိုးဖောက်သည်ဟုသာ မိမိတို့ ပြောနိုင်ပြီး၊ မိမိတို့အား တာဝန်ရှိသူများအဖြစ် တာဝန်ရှိသူများအဖြစ် ရှုမြင်၍ မရကြောင်း ၎င်းက ထပ်လောင်းပြောကြားခဲ့သည်။
ပြိုင်ပွဲကျင်းပရန်အတွက် ပြုလုပ်နေသည့် ဆောက်လုပ်ရေးလုပ်ငန်းများတွင် အလုပ်သမားများ၏ အန္တရာယ်ကင်းရှင်းမှု၊ လုပ်ငန်းခွင်ခြေအနေများနှင့် ပတ်သက်၍ ကာတာနိုင်ငံမှာ လူ့အခွင့်အရေးအဖွဲ့များ၏ ဝေဖန်မှုများကို ခံနေရသည်။ အဆိုပါဆောက်လုပ်ရေး လုပ်ငန်းများတွင် လုပ်ကိုင်နေကြသူများမှာ နိုင်ငံခြားသား အလုပ်သမားများဖြစ်ပြီး၊ ထိုပြဿနာများအား ပြီးခဲ့သည့်နှစ်ကတည်း မီဒီယာများတွင် ဖော်ပြခဲ့ကြသည်။
ဆောက်လုပ်ရေးလုပ်ငန်းများတိုးတက်မှုနှင့် ပတ်သက်၍ မေးမြန်းခဲ့ရာ တိုးတက်မှုများ ရရှိအောင် လုပ်ဆောင်နေကြောင်း၊ အချိန်ယူရမည်ဖြစ်ကြောင်း ဗဲလ်က်က ပြန်လည်ဖြေကြားခဲ့သည်။
Al Jazeera
Photo-[Reuters]
Leave a Reply
You must be logged in to post a comment.