မေ – ၂ ၊ ၂၀၁၄
M-Media
– အချင်းချင်း စကားများရာမှ အတူနေ တစ်နိုင်ငံတည်းသား၏ နားရွက်ကို ကိုက်ဖြတ်ခဲ့သော မြန်မာနိုင်ငံမှာ လာရောက်အလုပ်လုပ်သူ ဆောက်လုပ်ရေး အလုပ်သမားတစ်ဦးအား စင်ကာပူ တရားရုံးက ထောင်ဒဏ် ၁၅ လ ချမှတ်ခဲ့သည်ဟု သိရသည်။
ပြီးခဲ့သည့်နှစ် ဒီဇင်ဘာ ၁၄ ရက်နေ့က အသက် ၂၈ နှစ်အရွယ် မင်းမင်းထိုက်ဆိုသူမှာ သူငယ်ချင်းတစ်ဦးနှင့် အရက်သောက်ကာ အပြင်မှပြန်လာစဉ် အခန်းတွင်း ရှိနေသည့် တစ်နိုင်ငံတည်းသား နိုင်ဝင်းအား အော်ဟစ် ကန်ကျောက်ကာ နားရွက်ကို ကိုက်ဖြတ်ခဲ့ခြင်းဖြစ်သည်။ ထိုကဲ့သို့ ကိုက်ခဲ့မှုကြောင့် နိုင်ဝင်း၏ နားရွက်မှာ အလျား ၄ စင်တီမီတာနှင့် အနံ ၁ စင်တီမီတာအရွယ်ခန့် ပြတ်တောက်သွားခဲ့သည်။
တရားရုံးတွင် မင်းမင်းထိုက် က အခန်းဖော်အား နာကျင်စေခဲ့မှု အတွက် မိမိတွင် အပြစ်ရှိကြောင်း ၀န်ခံထွက်ဆိုခဲ့သည်။ မည်သည့် အကြောင်းကြောင့် မိမိ၏ အခန်းဖော်ဖြစ်သူအား ကိုက်ခဲ့သနည်းဟု မေးမြန်းရာ မင်းမင်းက ထိုအဖြစ်အပျက် အတွက် တောင်းပန်ကြောင်း ထိုအချိန်တွင် မိမိမှာ မူးနေကြောင်း စကားပြန်မှ တစ်ဆင့် ပြန်လည်ဖြေကြားခဲ့သည်။
သို့သော်လည်း တရားသူကြီး စတီဖင်ခိုက မင်းမင်းမှာ အခင်းဖြစ်ပွားချိန်တွင် အလွန်အကျွံမူးနေခြင်းမရှိဘဲ မည်သည့်အရာပြုလုပ်နေသည်ကို သိရှိကြောင်း ပြောကြား ခဲ့သည်။ ထို့ပြင် လက်လွတ်စပယ် အရက်သေစာသောက်သုံးမှုက ဆိုးရွားသော ရာဇ၀တ်မှုဆီသို့ ဦးတည်သွားနိုင်ကြောင်း သူမက ထပ်လောင်းပြောကြားခဲ့သည်။
Ref: straitstimes
*photo for illustration purposes only
Leave a Reply
You must be logged in to post a comment.