ဇူလိုင် ၁၊ ၂၀၁၄
M-Media
သုတ
မန္တလေး ။ ။ မန္တလေးမြို့ ၂၇-လမ်းနှင့် ၈၂-လမ်းထောင့်ရှိ ဆန်းလ္ဘက်ရည်ဆိုင်ရှေ့တွင် အကြမ်းဖက်မှုဖြစ်ပွားစေရန် လှုံ့ဆော်ခဲ့သော်လည်း အချိန်မီ တားဆီး ထိန်းသိမ်းနိုင်သဖြင့် ယခုအခါ အခြေအနေ ပြန်လည် တည်ငြိမ်နေပြီဖြစ်ပါတယ်။
ယနေ့ည ၈-နာရီဝန်းကျင်ခန့်တွင် ဆန်းလ္ဘက်ရည်ဆိုင်အနီးသို့ လူတစ်စု ရောက်လာပြီး ဆန်းလ္ဘက်ရည်ဆိုင်အား ဖျက်ဆီးမည်ဟု အော်ဟစ်ခဲ့ကြသဖြင့် အနီးအနားဝန်းကျင်မှ လူများစုရုံးရောက်ရှိလာပြီး လူစုလူဝေးဖြစ်သွားခြင်းဖြစ်ပါတယ်။
လ္ဘက်ရည်ဆိုင်အား ဖျက်ဆီးမည်ဟု အော်ဟစ်သူများက အော်၍ ထွက်ပြေးသွားခဲ့ပြီး ယခုအခါ ရဲတပ်ဖွဲ့ဝင်များ ရောက်ရှိလာကာ အခြေအနေအား ထိန်းသိမ်းထားပြီပါတယ်။
ဇွန်လ ၃၀-ရက်နေ့ သစ်ထူးလွင်ဘလော့ဂ်တွင် ဆန်းလ္ဘက်ရည်ဆိုင်ပိုင်ရှင် မူဆလင်ညီအစ်ကိုနှစ်ဦးက ဗုဒ္ဓဘာသာဆိုင် အလုပ်သမ တစ်ဦးအား အဓမ္မပြုကျင့်ဟူသော သတင်းခေါင်းစဉ်ဖြင့် သတင်းတင်ခဲ့ပြီးနောက် ယခုကဲ့သို့ ဆူပူလှုံ့ဆော်မှုများ မန္တလေးတွင် ဖြစ်ပွားစေရန် တမင်ရည်ရွယ်ချက်ရှိရှိဖြင့် လုပ်ဆောင်နေခြင်းဖြစ်ကြောင်း တွေ့ရပါတယ်။
၎င်းသတင်းမှာ အမှန်တကယ် ဖြစ်ပွားခြင်းမရှိခဲ့ဘဲ ဘာသာရေးအဓိကရုဏ်းဖြစ်စေရန် ရည်ရွယ်ချက်ရှိရှိဖြင့် လုပ်ဆောင်ခဲ့ခြင်းဖြစ်သည်။ ၎င်းသတင်းထွက်ပေါ်ခဲ့ပြီး နောက်ရက်တွင် ယခုကဲ့သို့ မန္တလေး၌ ဆူပူလှုံ့ဆော်ခဲ့သော်လည်း မန္တလေးဒေသခံများမှ ဘာသာလူမျိုးမခွဲခြားခဲ့သည့် အစဉ်အလာအား ဆက်လက်ထိန်းသိမ်း၍ မန္တလေးမြို့ တည်ငြိမ်အေးချမ်းစေရန် ၀ိုင်းဝန်းလက်တွဲ ဆောင်ရွက်နေကြတယ်လို့ သိရပါတယ်။
“ဘယ်ကလူတစ်စုလည်းတော့ မသိဘူး အော်ပြီးထွက်ပြေးကြတာ။ လ္ဘက်ရည်ဆိုင်ကို ဖျက်ပစ်မယ်နဲ့ အော်တယ်။ ပြီးတော့ အဲ့ဒီအချိန်က မွတ်စလင်တွေ ညဘက် ဘုရားဝတ်ပြုဖို့သွားနေကြတာရယ်၊ ဗလီအနီးတစ်ဝိုက်ဖြစ်နေတာရယ်နဲ့ လူတွေ စုပြုံရောက်သွားကြတယ်။ ခဏနေတော့ ရဲတွေလည်း ရောက်လာတယ်။ အော်ပြေးတဲ့သူတွေက ပြေးပြီ။ အဲ့ဒီနား စုရုံးရောက်လာတဲ့လူတွေပဲ ကျန်တော့တာ။ ရဲကလည်း အဲ့ဒီနားရှိနေတဲ့သူတွေကိုပဲ ဖမ်းဖို့လုပ်နေတော့ မဆိုင်သူတွေ ပါကုန်မှာစိုးလို့ ကျွန်တော်တို့ဝိုင်းပြီး ပြောနေရတယ်။ အခုတော့ အခြေအနေ တည်ငြိမ်နေပါပြီ။ ၂၈လမ်း တလျှောက်လည်း လမ်းပိတ်လိုက်တယ်။ ရဲတွေလည်း အစောင့်ချထားတယ်”လို့ အခင်းဖြစ်ပွားရာအနီးတွင် ရောက်ရှိနေသူ မန္တလေးမြို့ခံတစ်ဦးက ဆိုပါတယ်။
Leave a Reply
You must be logged in to post a comment.