News @ M-Media

ငြိမ်းချမ်းပါစေ မန္တလာမြေ …. သစ်ထူးလွင်က စတဲ့မီး…

ဇူလိုင် ၁ ၊ ၂၀၁၄
M-Media
ရေးသူ- ဆွေမွန်
10433077_1502307876647982_859176492853298206_n
တကယ်ဆို ပြသနာ တကယ်မဖြစ်စေချင်ရင် ရန်ကုန် ၄၈ လမ်း ဗလီကိစ္စတုန်းက ရန်ကုန်မြို့တော်ခန်းမထဲမှာ တစ်နေ့တည်း သတင်းစာ ရှင်းလင်းပွဲ နှစ်ကြိမ်လုပ်ပြီး ပြသနာကို ပိတ်ပစ်သလို ခုလည်း မန္တလေးအာဏာပိုင်တွေက သတင်းစာရှင်းလင်းပွဲ လုပ်ပြီး ဘာမှ ဆက်မဖြစ်အောင် လုပ်ပစ်လို့ ရနိုင်တယ်။

၁။ မနေ့က သစ်ထူးလွင်က စဖွတယ်။ ဒီညီအကို နှစ်ယောက် မုဒိမ်းကျင့်ရင် ဒီညီအကိုနှစ်ယောက်ကို ဖမ်းပေါ့။ ရဲက အရေးယူတာ မတွေ့ရဘူး။ ဒီညီအကို မန္တလေးဗလီမှာ ၀တ်ပြုနေတာကို တွေ့တဲ့လူ အများကြီးပဲလို့ သိနေရပြန်တယ်။ ရာဇ၀တ်မှုဖြစ်တဲ့အတွက် ရဲက ဖမ်းဆီးအရေးမယူသေး ဆိုကတည်းက လွဲနေပြီ။

၂။ အာဏာပိုင်တွေ ကိုယ်တိုင်က ဟုတ်ရင် ဟုတ်တယ်။ မဟုတ်ရင် မဟုတ်ဘူး ရှင်းသင့်တယ်။ ခုတော့ တမင် ပြသနာကို မကြီးထွား ကြီးထွားအောင် စောင့်နေစေချင်တဲ့ သဘောကို တွေ့နေရတယ်။

၃။ တစ်ရက် ရှိနေပြီ။ မဖမ်းဘူး၊ လွှတ်ထားတယ်။ မဟုတ်ဘူးဆိုလည်း ရှင်းပေးလိုက်။ ဒီလိုလည်း မဟုတ်သလို၊ ဟိုလိုလည်း မဟုတ်ပြန်ဘူး။ အနီးကပ်နေကြတဲ့ မန္တလေးသားတွေဆီက သိရတာက သစ်ထူးလွင်က တမင် ဖွတာတဲ့….။ ဒါဆို ဘာကြောင့် ဖွရသလဲ။ နောက်ကွယ်က ရည်ရွယ်ချက်ကို မြင်အောင် ကြည့်တတ်သင့်တယ်။ သစ်ထူးလွင်သတင်း နောက်က ကော်ပီလုပ်ပြီး ဆက်ဖွတဲ့ လူတွေကလည်း မဟုတ်မှန်း သိရင် ပို့စ်ကို ဖျက်ပစ်သင့်တယ်။ ပါးစပ်က ပန်းစကားအော်နေပြီး လက်တွေ့ ပြသနာကို ဖိတ်ခေါ်ဆွဲသွင်းသလို လုပ်နေရင် မီးစတစ်ဖက် ရေမှုတ်တစ်ဖက် လုပ်နေတာပဲ။ တကယ်ဆို ကိုယ်ပိုင် အသိတရား နည်းနည်းလောက် ရှိရင် ဒီလို ပို့စ်မျိုးကို ကော်ပီလုပ်ပြီး လုံးဝ မဖြန့်သင့်ဘူး။ အင်မတန် ထိလွယ် ရှလွယ်တဲ့ကိစ္စတစ်ခုကို ချိန်သားကိုက် ဓာတ်ဆီလောင်းပေးနေတာနဲ့ တူနေတဲ့အတွက်ပဲ။ ၂၀၁၂ ရခိုင်သီတာထွေးကိစ္စ နောက်ဆက်တွဲ တောင်ကုတ် လူသတ်ပွဲမှာ တောင်တွင်းကြီးသားမွတ်ဆလင်တွေကို အိန္ဒိယတောင်ပိုင်းသား မွတ်ဆလင်ကုလားတွေလို့ အစိုးရသတင်းးစာတွေ ကိုယ်တိုင် ချိန်သားကိုက်ဓာတ်ဆီလောင်းပေးခဲ့တာ မြင်ဖူးကြပါလိမ့်မယ်။ ဒီသတင်းတစ်ပုဒ်က စလိုက်တဲ့ ဇာတ်လမ်းကြောင့် အသက်တွေ အိုးအိမ်တွေ ဘယ်လောက်တောင် ပျက်စီးဆုံးရှုံးခဲ့ရသလဲ သိလိုက် မြင်လိုက်ကြမှာပါ။ ဒါတွေကို သိပါလျှက် ဒီလို ထိခိုက်တတ်မှန်း သိပါလျှက် ထပ်ပြီး ကော်ပီလုပ် ဖြန့်ဝေတဲ့ လူတွေဟာ အတော်ကြီး မိုက်မဲ အသိဥာဏ်နည်းပါးလွန်းတယ်လို့ပဲ မြင်မိတယ်။ ဒီလို ဖြစ်လာရင် ဘယ်သူတွေ ဆုံးရှုံးမလဲ။ ၂၀၁၅ မတိုင်မီ ဖြစ်စရာ အကုန်ဖြစ်လေလေ ခင်ဗျားတို့ နှစ် ၂၀ လောက် ကြိုးစားထားတဲ့ အရာတစ်ခုဟာ တစ်ရက် နှစ်ရက်နဲ့ အကုန်ပျောက်သွားတော့မှာပါ။ ဒီလို ပြသနာ မဖြစ်ဖြစ်အောင် မီးထွန်းရှာဖို့ ကလည်း ဘယ်သူတွေ လုပ်နေသလဲ မမြင်တတ်ရင် သေကြရုံပါပဲ။

၎။ မနေ့က ရှင်းသင့်တဲ့ ပြသနာကို မနေ့က မရှင်းတဲ့အတွက် ဒီနေ့ ပွဲဆက်လာတယ်။ မလိုလားအပ်တဲ့ လူစုလူဝေးတွေ ဖြစ်လာရတယ်။ လူစုခွဲနေရပြီ။ ရဲက ရဲအလုပ် လုပ်ခဲ့ရင် ဒီနေ့ ဒီပြသနာ ပေါ်စရာ မရှိဘူး။ ရာဇ၀တ်ဆိုရင် ဖမ်း။ မဟုတ်ရင် စဖွတဲ့ သစ်ထူးလွင်ကို အရေးယူ။ ပြီးပြီ။ လူစုစရာကိစ္စ မဟုတ်ဘူး။ ဘာမှ မဆိုင်ဘူး။ မြင်းအလုပ် မြင်းလုပ်ရင် ခွေးဝင်ရှုပ်စရာ မရှိပါဘူး။

၅။ ဒီသတင်း မဟုတ်မမှန်ခဲ့ရင်ကော…. ဒီနေရာမှာအဖြေတစ်ခု ထုတ်ပေးရတော့မှာပါ။ ရောချလို့ မရတော့ပါဘူး။ NLD လို နိုင်ငံရေးပါတီတွေအနေနဲ့လည်း လက်ရှောင်မနေသင့်ဘူး။ မဟုတ်မှန်း သိရင် သစ်ထူးလွင်ကို အမြစ်ကနေလှန်ပစ်လို့ ရတဲ့အထိ တွန်းတိုက်ပစ်သင့်တယ်။ ဒီလောက်လုပ်စရာ လိုသလား။ ၁၀၀ % လိုအပ်တာပေါ့။ အမှိုက်က စတဲ့မီးပဲ။ ဒီမီးကို မဟုတ်မှန်း သိပါလျှက် စရှို့တဲ့ကိစ္စဟာ ပေါ့သေးသေး မဟုတ်ပါဘူး။ တကယ် ကျယ်ပြန့်လာရင် NLD လည်း မြောင်းထဲရောက်မယ့် လမ်းစတစ်ခုပဲ။ နောက်ထပ်တစ်ကြိမ်ပဲ အဓိကရုဏ်းအကြီးအကျယ်ထပ်ဖြစ်ခွင့် ပေးလိုက်ပါ။ အခြေခံဥပဒေပြင်ဆင်ရေး သွားပါပြီ။ လူတိုင်း မြင်တတ်ပါတယ်။ ရှောင်သင့်တဲ့ ကိစ္စကို တမင် မီးထိုးပြတာ ကောင်းမွန်တဲ့ ရည်ရွယ်ချက် မဟုတ်မှန်း ထမင်းစားသူတိုင်း သိကြမှာပါ။

၆။ ဒီလောက်ကြီးကျယ်တဲ့ ပြသနာကို ဖန်တီးပြပြီးတဲ့နောက် ဒီညီအကို နှစ်ယောက်ကို ဘာလုပ်ပြတော့မလဲ။ ဒီညီအကို နှစ်ယောက်ဟာ တကယ်ဟုတ်ခဲ့ရင် ပြသနာ မရှိပါဘူး။ သူ့လမ်း သူရွေးတာပါပဲ။ တကယ်မုဒိမ်းမှု မကျူးလွန်ဘဲ စွပ်စွဲခံခဲ့ရတာဆိုရင် သူတို့ဘ၀မှာ ပြန်ဖာထေးလို့ မရလောက်အောင် ဂုဏ်သိက္ခာကျဆင်းစေခဲ့တာ ဖြစ်ပါတယ်။ ဒီလိုသာ ခံစားရကြေးဆိုရင် သစ်ထူးလွင် ဘလော့ပိုင်ရှင်ကို ထိုက်သင့်တဲ့ တုန့်ပြန်မှုတစ်ခုတော့ နောက်နောင်ဒီလို မလုပ်ရဲအောင် ပြန်ပေးသင့်ပါတယ်။

ဒါတွေအားလုံးဟာ အတွေးတွေပဲ ဖြစ်နေပါသေးတယ်။ လက်တွေ့မြင်မိတာကတော့ ဒီနေ့ည မန္တလေးဘာမှ မဖြစ်ဖို့ပါပဲ။

မြန်မာပြည်သူ ပြည်သားအားလုံး လှည့်ကွက် အသွယ်သွယ်မှ လွတ်ကင်းကြပါစေ။

ဆွေမွန်
၁ ဇူလိုင် ၂၀၁၄

Comments

Leave a Reply