ဇူလိုင် ၁၈ ၊ ၂၀၁၄
M-Media
– မျက်စိအလင်းမရသူများနှင့် အမြင်အာရုံချို့တဲ့သူများအတွက် ကုရ်အာန်ကျမ်းတော်မြတ်နှင့် အစ္စလာမ်ဘာသာရေး စာပေများ လေ့လာ ဖတ်ရှုနိုင်မည့် စင်တာ တစ်ခုကို ရုရှားနိုင်ငံ တာတာစတန် ကိုယ်ပိုင်အုပ်ချုပ်ခွင့်ရဒေသရှိ Almetyevsk မြို့တွင် ဇူလိုင် ၁၀ ရက်နေ့က ဖွင့်လှစ်ခဲ့သည်ဟု သိရသည်။
“ရမ်ဇာန်- ကောင်းမြတ်သောအကျင့်သီလများကို ကျင့်မူရသည့်လ” ဟူသော ခေါင်းစဉ်ဖြင့် ပြုလုပ်သော လှုပ်ရှားမှု၏ တစ်စိတ်တစ်ပိုင်းအဖြစ် အဆိုပါ စင်တာကို တာတာစတန် အစ္စလာမ် ဘာသာရေးအဖွဲ့မှ စီစဉ်ကာ Almetyevsk ခရိုင် ဗလီဝတ်ကျောင်းတော်တွင် ဖွင့်လှစ် ခဲ့ခြင်းဖြစ်သည်။
ဖွင့်ပွဲအခမ်းအနားသို့ တာတာစတန်ဒေသ လက်ထောက်မွဖ်သီချုပ် ရက်စတန် ဟာဇရသ် ဘာထရောဗ့် တက်ရောက်ဂုဏ်ပြုခဲ့ပြီး မျက်မမြင်များ ဖတ်ရှုနိုင်ရန် အထူးစီစဉ်ထားသော ကုရ်အာန်ကျမ်းတော်မြတ်နှင့် အစ္စလာမ်ဘာသာရေး စာအုပ်များကို လက်ဆောင်ပေးအပ်ခဲ့သည်။
Almetyevsk ခရိုင်မှ မျက်မမြင်များနှင့် အမြင်အာရုံချို့တဲ့သူများမှာလည်း အဆိုပါအခမ်းအနားသို့ တက်ရောက်ခဲ့ပြီး ထိုကဲ့သို့ စီစဉ်ပေးခဲ့သည့် တာတာစတန်အစ္စလာမ်ဘာသာရေးအဖွဲ့ လူကြီးများအား ကျေးဇူး တင်ကြောင်းပြောကြားခဲ့သည်။
အဆိုပါ စင်တာတွင် အစ္စလာမ်ဘာသာရေး စာအုပ်များအပြင် မျက်စိအလင်းမရသူများနှင့် အမြင်အာရုံချို့တဲ့သူများအတွက် အစ္စလာမ့် သင်ခန်းစာများကို ပို့ချပေးနိုင်ရန် အခန်း တစ်ခုကိုလည်း ပြုလုပ်ပေးထားသည်။ တစ်ပတ်တစ်ကြိမ် ပြုလုပ်မည့် အဆိုပါ သင်တန်းကို တက်ရောက်မည့်သူများအား ဒေသတွင်းရှိ တက္ကစီကုမ္ပဏီတစ်ခုက အခမဲ့ အကြိုအပို့ ပြုလုပ်ပေးသွားမည်ဖြစ်သည်။
Ref: islam.ru
Leave a Reply
You must be logged in to post a comment.