အောက်တိုဘာ ၁၃ ၊ ၂၀၁၄
M-Media
– အမေရိကန် အမျိုးသား လုံခြုံရေးအေဂျင်စီ NSA မှ အေးဂျင့်များမှာ တရုတ်၊ ဂျာမနီနှင့် တောင်ကိုရီးယားတို့မှ ပြည်တွင်း ကွန်ယက်ချိတ်ဆက်မှုများနှင့် အီလက်ထရောနှစ် ပစ္စည်း ကိရိယာများကို လျှို့ဝှက် ထောက်လှမ်းမှုများပြုလုပ်ခဲ့သည်ဟု သိရသည်။
NSA အေးဂျင့်ဟောင်း အက်ဒ၀ပ် စနိုးဒင်ထံမှ ရရှိခဲ့သည့် နောက်ဆုံးရ အချက်အလက်များကို ကိုးကား၍ The Intercept အွန်လိုင်း မဂ္ဂဇင်းက အောက်တိုဘာ ၁၁ ရက်နေ့တွင် ဖော်ပြခဲ့ခြင်းဖြစ်ပြီး၊ NSA ၏ အဆိုပါ ထောက်လှမ်းမှုတွင် အမေရိကန်ကုမ္ပဏီများမှာလည်း ပစ်မှတ်ထား ခံခဲ့ရသည်ဟု ထည့်သွင်းရေးသားခဲ့သည်။
NSA မှ အမေရိကန်နှင့် နိုင်ငံခြားရှိ ကုမ္ပဏီများနှင့် ပူးပေါင်းကာ ၎င်းတို့၏ အချက်အလက် ပုံဖျက်စနစ်ကို အားနည်းစေရန် ဆောင်ရွက်ပြီး၊ ထိုလုပ်ငန်းအတွက် ကန်ဒေါ်လာ သန်းရာချီ၍ သုံးစွဲနေသည်ဟုလည်း စနိုးဒင်ထံမှ ရရှိသည့် မှတ်တမ်းများအရ သိရသည်။
ထို့ပြင် NSA က “core secrets” ဟု အမည်ပေးထားသည့် နိုင်ငံများထဲမှ အချို့တွင် အဆိုပါ လျှို့ဝှက်ထောက်လှမ်းမှုများကို ယခုအချိန်အထိ ဆက်လက်ဆောင်ရွက်နေပြီး NSA ပြင်ပမှ တာဝန်ရှိသူအချို့နှင့် မျှဝေဆောက်ရွက်နေသည်ဟုလည်း ဆိုသည်။
စနိုးဒင်မှာ ၂၀၁၃ ခုနှစ် ဇွန်လမှစ၍ NSA ၏ လျှို့ဝှက်ထောက်လှမ်းရေး အချက်အလက်များကို ဖော်ထုတ်ခဲ့သူဖြစ်သည်။ ၎င်း၏ ဖော်ထုတ်မှုအရ NSA မှာ အမေရိကန်ပြည်သူများ၊ နိုင်ငံခြား တိုင်းပြည်များမှ အစိုးရများနှင့် ပြည်သူများ၏ ဖုန်းခေါ်ဆိုမှုများကို ကြားဖြတ်နားထောင်ခြင်း၊ အချက်အလက်များအား လျှို့ဝှက်ထောက်လှမ်းခြင်းများပြုလုပ်ခဲ့ကြောင်း သိရှိခဲ့ရသည်။
GJH/GJH
Leave a Reply
You must be logged in to post a comment.