ဒီဇင်ဘာ ၂၀ ၊ ၂၀၁၄
M-Media
သူရိန်
နည်းပညာတက္ကသိုလ်များ၏ ပေါင်းကူးစာမေးပွဲများကို လာမည့်နှစ် ဇွန်လကုန်တွင် ကျင်းပပေးမည်ဖြစ်ကြောင်း သက်ဆိုင်ရာက ဒီဇင်ဘာလ၁၉ ရက်နေ့ထုတ် နိုင်ငံပိုင်သတင်းစာများမှ တဆင့်ကြေညာလိုက်သည်။ ထိုသို့ ပေါင်းကူးနှစ်တွင် နစ်နာခဲ့သော ကျောင်းသားကျောင်းသူများ ပြန်လည် ပညာသင်ခွင့်ရရန် စာမေးပွဲကျင်းပပေးမှုကို အဆိုပါ ကျောင်းသားကျောင်းသူအချို့က အယုံအကြည် ကင်းမဲ့လျက်ရှိကြသည်။ သမာသမတ်ရှိမှု အားနည်းခြင်း ဗဟိုချုပ်ကိုင်မှုများရှိနေသည်ဟု ယူဆခြင်း ပွင့်လင်းမြင်သာမှု အားနည်းခြင်းများကြောင့် ကျောင်းသားများအကြား ယခုကဲ့သို့ သံသယစိတ်များ ဖြစ်ပေါ်ရခြင်းဖြစ်ကြောင်းသိရသည်။
ဝင်ခွင့်ဖြေဆိုမည့် ကျောင်းသားများအနေဖြင့် သက်ဆိုင်ရာ ဘာသာအလိုက် ဖြေဆိုရမည့် scope များအားသင့်လျော်မျှတစွာ သတ်မှတ်ပေးရန်တောင်းဆို ထားကြပြီး အောင်စာရင်းမူဝါဒများကိုလည်းဝင်ခွင့်မဖြေဆိုမှီ အများပြည်သူသိရှိရန် ထုတ်ပြန်ပေးရန် မျှော်မှန်းထားကြသည်။ ဒါ့အပြင် ဝင်ခွင့်အောင်မြင် သူများကို ကျောင်းပြန်လည် တက်ရောက်ခွင့်ပေးရန် အတွက် ရာခိုင်နှုန်းဖြင့် သတ်မှတ် ခေါ်ယူခြင်းမျိုးကိုလည်း ကျောင်းသားများက မလိုလားကြပေ။ ကျောင်းသား အများစုက စာစစ်ဇုန်အလိုက်သာ အဖြေလွှာ စစ်ဆေးခြင်းနှင့် ဝင်ခွင့်အောင်စာရင်း ထုတ်ပြန်ပေးရန် လိုလားလျက်ရှိပြီး သက်ဆိုင်ရာ ဝန်ကြီးဌာန အဆင့်ဆင့်က ဝင်ရောက်စွတ်ဖက်မှုများကို ပပျောက်စေလိုကြသည်။ ပြီးခဲ့သည့် နိုဝင်ဘာလလယ်က ထုတ်ပြန်ခဲ့သော နည်းပညာ တက္ကသိုလ်များ၏ အောင်စာရင်း ရလဒ်တွင် အောင်မြင်သူ ကျောင်းသား အများအပြားကို ရာခိုင်နှုန်းဖြင့် ဖြုတ်ချခဲ့ပြီး ကျောင်းသားအများစု နစ်နာခဲ့ရကြောင်းသိရသည်။
ယခုနှစ် ၂၀၁၄ခုနှစ်တွင်လည်း ပေါင်းကူးစာမေးပွဲများကို ကျင်းပပေးခဲ့ပြီး အချို့သောကျောင်းများတွင် အောင်မြင်သူမရှိ အနေအထားဖြင့် အောင်စာရင်းများ ထုတ်ပြန်ခဲ့ရကြောင်းသိရှိရသည်။
Leave a Reply
You must be logged in to post a comment.