News @ M-Media

သီရိလင်္ကာ ကာကွယ်ရေး ၀န်ကြီးဟောင်း လူသတ်မှုဖြင့် တိုင်ချက်ဖွင့်ခံရ

ဇန်န၀ါရီ ၁၈၊ ၂၀၁၅
M-Media

tri

– သီရိလင်္ကာရှိ နာမည်ကြီးသတင်းစာတစ်စောင်၏ အယ်ဒီတာဖြစ်သူ ၂၀၀၉ ခုနှစ်က အသတ်ခံရမှုကို သီရိလင်္ကာသမ္မတဟောင်း ရာဂျာပက်ဆာ၏ ညီဖြစ်သူက စီစဉ်ခဲ့သည်ဟူသော စွပ်စွဲချက်များ ထွက်ပေါ်လာခဲ့ပြီးနောက် သိရိလင်္ကာအာဏာပိုင်များက စုံစမ်းစစ်ဆေးနေသည်ဟု သိရသည်။

အသတ်ခံရသူမှာ Sunday Leader သတင်းစာ၏ အယ်ဒီတာဖြစ်သူ လာဆန်သာ ၀စ်ကရီမာတွန်ဂါဆိုသူဖြစ်ပြီး ၂၀၀၉ ခုနှစ် ဇန်န၀ါရီက ဆိုးရွားသော သေနတ်ဒဏ်ရာဖြင့် သေဆုံးခဲ့ခြင်းဖြစ်သည်။

ထိုသတ်ဖြတ်မှုကို သမ္မတဟောင်း ရာဂျာပက်ဆာ၏ညီ၊ ထိုစဉ်က ကာကွယ်ရေး ၀န်ကြီးဖြစ်သော ဂိုတာဘာယာ ရာဂျာပက်ဆာက အဖွဲ့တစ်ဖွဲ့ ဖွဲ့စည်းကာ ဆောင်ရွက်ခဲ့ခြင်းဖြစ်သည်ဟု ယခင် ပြည်သူ့ဆက်ဆံရေးဝန်ကြီး မာဗန် ဆေးလ်ဗားက ယမန်နေ့တွင် ရဲတပ်ဖွဲ့၌ တိုင်ချက်ဖွင့်ခဲ့သည်။

`ဂိုတာဘာယာ ရာဂျာပက်ဆာဟာ ပြန်ပေးဆွဲခြင်း၊ အနိုက်အထက်ပြုခြင်းနဲ့ လူသတ်မှုတို့အတွက် တာဝန်ရှိနေတယ်လို့ ကျွန်တော်တို့ တိုင်တန်းချက် ရရှိပါတယ်။ လူသတ်မှုသုံးမှုကို အဲဒီတိုင်ချက်မှာ ဖော်ပြထားပြီး အဲဒီအထဲက တစ်ခုကတော့ ၀စ်ကရီမာတွန်ဂါ သေဆုံးမှုပါပဲ´ ဟု သီရိလင်္ကာရဲတပ်ဖွဲ့မှ ပြောရေးဆိုခွင့်ရှိသူ အဂျစ် ရိုဟာနာက ပြောကြားခဲ့သည်။

ဝစ်ကရီမာတွန်ဂါ၏ Sunday Leader သတင်းစာမှာ ရာဂျာပက်ဆာ အစိုးရကို ဝေဖန်မှုများ ပြုလုပ်ခဲ့ပြီး ထိုစဉ်က ကာကွယ်ရေးဝန်ကြီး ဂိုတာဘာယာမှာလည်း စစ်တပ်အတွက် တစ်ပါတ်ရစ် လေယာဉ်များ၊ လက်နက်များဝယ်ယူရာတွင် လာဘ်စားမှုများ ရှိခဲ့သည်ဟု ဖော်ပြခဲ့သည်။

ထို့နောက်ပိုင်းတွင် ၀စ်ကရီမာတွန်ဂါမှာ အစိုးရအား အသရေဖျက်မှုဖြင့် တရားစွဲဆိုခံခဲ့ရပြီး တရားရင်ဆိုင်နေစဉ်အတွင်းမှာပင် လုပ်ကြံခံခဲ့ရခြင်းဖြစ်သည်။ ထိုအချိန်က သီရီလင်္ကာအစိုးရကမူ ၀စ်ကရီမာတွန်ဂါ သေဆုံးမှုတွင် ၎င်းတို့ ပါဝင်ပတ်သက်ခြင်းမရှိုဟု ငြင်းဆိုခဲ့သည်။

ဇန်န၀ါရီ ၈ ရက်နေ့ သမ္မတရွေးကောက်ပွဲတွင် သမ္မတအောင်း မာဟင်ဒါ ရာဂျာပက်ဆာ ရှုံးနိမ့်ခဲ့ပြီးနောက် ၎င်းနှင့် ၎င်း၏ အစိုးရအဖွဲ့ဝင်များ တာဝန်ထမ်းဆောင်စဉ်အတွင်းက ချစားခဲ့သည်ဆိုသော မှတ်တမ်းမှတ်ရာများ ကျယ်ကျယ်ပြန့်ပြန့် ထွက်ပေါ်လာခဲ့သည်။

ရာဂျာပက်ဆာမှာ ရွေးကောက်ပွဲတွင် အခြေအနေမကောင်းသည်ကို သိရှိခဲ့ပြီးနောက်ပိုင်း စစ်တပ်ကို အာဏာသိမ်းရန် အမိန့်ပေးခဲ့ပြီး စစ်တပ်ကမူ လိုက်နာခဲ့ခြင်း မရှိချေ။

Ref: aljazeera

Comments

Leave a Reply