ဇွန် ၁ ၊၂၀၁၅
M-Media
သတင်း- သူရိန်
ယနေ့ လူအများသုံးစွဲနေသော အင်တာနက် ဖေစ့်ဘုတ် အသုံးပြုမှုနှင့် ပတ်သက်၍ စကားရည်လုပွဲ တစ်ရပ်ကို မေလ၃၁ရက်နေ့က ရန်ကုန်မြို့ မြန်မာ မွတ်စလင်မ် လူငယ်များ(ဘာသာရေး) အဖွဲ့ မမလ ဌာနချုပ်မှာ စီစဉ်ကျင်းပခဲ့ပါတယ်။
” Facebook က တကယ့် ဆိုရှယ်မီဒီယာကြီးပေါ့။ လုံးဝအသုံး မပြုသင့်ဘူး ပြောတာက မပြောသင့်ဘူး။ အားလုံး အသုံးပြုသင့်တဲ့ဟာပဲပေါ့” ဟု စကားရည်လုပွဲတွင် ချေပပြောဆိုသူ မနွယ်နီက M-Media သို့ပြောပြပါတယ်။
အဆိုပါ စကားရည်လုပွဲ အစီအစဉ်ရဲ့ moderator အဖြစ် မမလဌာနချုပ်မှ ပညာရေးမှူး ဦးစိုးသိန်းက ဆောင်ရွက်ပြီး အမှတ်ပေး ဒိုင်များ အဖြစ် စာရေးဆရာ ဝါးခယ်မမောင်မင်းနိုင်၊ မြန်မာစာပါမောက္ခ ဒေါက်တာစိုးနိုင်၊ စာရေးဆရာ ကိုအင်းဝ စသော ပညာရှင် အသီးသီးက အကဲဖြတ်ပေးခဲ့ကြောင်း သိရပါတယ်။
Facebook အသုံးပြုမှုကြောင့် မိတ်ဆွေသူငယ်ချင်းများ တိုးပွားလာပြီး လူမှုရေးဆိုင်ရာ ကောင်းကျိုးများ သတင်းမျှဝေမှု စီးဆင်းမြန်ဆန်စေခြင်း စသော အကျိုးကျေးဇူးများ ရှိသော်လည်း မိမိတို့ တင်လိုက်သော ဓါတ်ပုံများ၊ စာသားများကို ခိုးယူကာ အလွဲသုံးမှုများလည်း ရှိနေဆဲ ဖြစ်ပါတယ်။
ယခုနှစ်ပိုင်းကာလများတွင် Facebook အသုံးပြုမှုများတွင် အမုန်းတရားများ၊ လူမျိုးရေးနှင့် ဘာသာရေးကို ပုတ်ခတ် စော်ကား တိုက်ခိုက်မှုများ စသော တလွဲ အသုံးပြုမှုများကြောင့် Facebook အမှန်တကယ်ပဲ ကောင်းကျိုးထက် ဆိုးကျိုးများ ပေးစွမ်းနေပြီလား ဆိုတာ မေးခွန်းထုတ်စရာ ဖြစ်လာခဲ့ပါတယ်။
လတ်တလောတွင် မြန်မာ ဖုန်းသုံးစွဲသူများ၏ စစ်တမ်းကောက်ယူချက်အရ Facebook သုံးစွဲမှု ၇၁ ဒသာမ ၃ရာခိုင်နှုန်း G mail အသုံးပြုမှု ၂၅ ဒသာမ ၇ရာခိုင်နှုန်း Twitter ကတော့ ၁၀ ဒသာမ ၅ရာခိုင်နှုန်း သုံးစွဲမှု အသီးသီးရှိရာ Facebook သည် မြန်မာနိုင်ငံမှ အင်တာနက် အသုံးပြုသူ များအကြား အများဆုံးနှင့် ရေပန်းအစားဆုံး လူမှုကွန်ရက် တစ်ခုဖြစ်နေကြောင်းလည်း သိရပါတယ်။
ယမန်နေ့က ကျင်းပခဲ့သော ” Facebook သည် ကောင်းကျိုးထက် ဆိုးကျိုးပိုများတယ်” ဆိုသော စကားရည်လုပွဲမှာ မမလဌာနချုပ်မှ ပထမဆုံးအကြိမ် ကျင်းပတဲ့ စကားရည်လုပွဲ တစ်ရပ်လည်း ဖြစ်ပါတယ်။
အဆိုပါ စကားရည်လုပွဲတွင် အဆိုရှင်၊ ချေပပြောဆိုသူ ပြိုင်ပွဲဝင်များမှာ တက္ကသိုလ်အဆင့် ကျောင်းသား ကျောင်းသူများ အများစုဖြစ်ပြီး မမလဌာနချုပ်မှ အခြားသော အစီအစဉ်များကိုလည်း ထပ်မံပြုလုပ်သွားမည်ဖြစ်ကြောင်း သတင်းရရှိပါတယ်။
Leave a Reply
You must be logged in to post a comment.