နိုဝင်ဘာ ၁၅၊ ၂၀၁၅
M-Media
– ကလေးများအား ရေနစ်ခြင်းမှ ကာကွယ်ပေးမည့် အထူး ရေကူးဝတ်စုံတစ်ခုကို ဆော်ဒီကျောင်းသူတစ်ဦးက တီထွင်နိုင်ခဲ့သည်ဟု သိရသည်။
သြစတေးလျရှိ Royal Melbourne နည်းပညာတက္ကသိုလ်တွင် မဟာတန်း တက်ရောက်နေသည့် အက်စ်မာ ဘင်တီ အဘ်ဒူလာ အလ်-ဟာကာမီ ဆိုသူ ဖြစ်ပြီး ကမ္ဘာတစ်ဝှမ်းတွင် ကလေးငယ်များ ရေနစ်သေဆုံးမှု မြင့်တက်လာခြင်းကို တွေ့မြင်ခဲ့ပြီးနောက် ထိုရေကူးဝတ်စုံကို တီထွင်ခဲ့ခြင်းဟု ပြောကြားခဲ့သည်။
ယခင်က နဂ်ျရန်ရှိ စက်မှုကောလိပ်တစ်ခုတွင် အလုပ်လုပ်ခဲ့သည့် အလ်-ဟာကာမီက သူမ တီထွင်ထားသော အဆိုပါ ရေကူးဝတ်စုံ၏ ခန္ဓာကိုယ်ပိုင်းတွင် လေအိတ်များ ပါဝင်ပြီး ဆင်းမ်ကဒ် ထည့်သွင်းအသုံးပြုနိုင်မည့် နေရာအချက်ပြစနစ်၊ ရေဖိအား ဆင်ဆာ၊ လေထိုးပန့်ငယ်တစ်ခုနှစ့် ဗဟိုထိန်းချုပ်မှုစနစ် ပါဝင်သည်ဟု ဆိုသည်။
ဆင်ဆာမှာ ၀တ်စုံအား ရေထိသည့်စနစ်ဖြင့် အလုပ်လုပ်မည် ဖြစ်သည်။ သတ်မှတ်ထားသည့် ရေဖိအားအထိ ရောက်ရှိလာပါက ရေကူးဝတ်စုံမှ လေအိတ်မှာ အလိုအလျောက် ပွင့်လာမည်ဖြစ်ပြီး ဆင်ဆာက မိဘ၊ သို့မဟုတ် အုပ်ထိန်းသူများထံတွင် ရှိနေသည့် မိုဘိုင်းဖုန်းသို့ အချက်ပြသွားမည်ဖြစ်သည်။
လက်ရှိအချိန်တွင် ထိုရေကူးဝတ်စုံကို သူမက စမ်းသပ်နေဆဲဖြစ်ပြီး မကြာမီ ထုတ်ဖော်ပြသသွားမည်ဟု ထည့်သွင်းပြောကြားခဲ့သည်။
Ref: Arabnews
Leave a Reply
You must be logged in to post a comment.