News @ M-Media

ဗလီဘေး လူသွားလမ်းကြားတွင် မြိုင်ကြီးငူ ဆရာတော်၏ လမ်းညွှန်ချက်ဖြင့် စေတီတစ်ဆူ ညတွင်းချင်း အပြီးတည်

ဧပြီ ၂၆၊ ၂၀၁၆
M-Media
ဖြူလေး
Buddhist Pagoda beside in Mosque at Shaw Goon 3 copy
ရန်ကုန်။ ။ ကရင်ပြည်နယ်၊ လှိုင်းဘွဲ့မြို့နယ်၊ ရွှေဂွန်းကျေးရွာရှိ ဗလီဝတ်ကျောင်း နံဘေးကပ်လျက် လမ်းကြားတွင် မြိုင်ကြီးငူဆရာတော်၏ လမ်းညွှန်ချက်ဖြင့်ဟုဆိုကာ စေတီတစ်ဆူကို ဧပြီလ ၂၅ ရက်နေ့ညက ညတွင်းချင်း တည်ဆောက်ခဲ့ကြောင်း သတင်းရရှိသည်။

အဆိုပါ စေတီတည်သောနေရာတွင် မတ်လ (၂၃) ရက်နေ့ ညသန်းခေါင်ကျော် အချိန် လူ (၆) ယောက်ခန့်က နံပါတ်မပါသည့် အနက်ရောင်ကားတစီးဖြင့် ဗလီဘေး လမ်းကြားနေရာ၌ ဥာဏ်တော်တစ်တောင်ခန့်ရှိသည့် ဘုရားဆင်းတုတော်တစ်ဆူ လာရောက်မြှပ်နှံခဲ့ကြောင်း အမည် မဖော်လိုသူ ရွှေဂွန်းဒေသခံတစ်ဦးထံမှ သိရသည်။

ဧပြီလ ၂၅ ရက် ယမန်နေ့ည (၇) နာရီဝန်းကျင်တွင် လူအင်အား (၇၀) နီးပါး ရောက်လာပြီး အဆိုပါဆင်းတုတော်မြှုပ်နှံ ထားသည့် (စည်ပင်သာယာ နယ်နမိတ် လူသွားလမ်း) နေရာအပေါ် စေတီ စတင်တည်ခဲ့ကြောင်း၊ နံနက်လင်းအားကြီး ၅ နာရီခန့်တွင် တည်ဆောက်ပြီးစီးခဲ့ကြောင်း ဒေသခံ မျက်မြင်သက်သေများက ဆိုကြသည်။

စေတီလာရောက်တည်နေစဉ် ဗလီဂေါပကအဖွဲ့ နှင့် သက်ဆိုင်ရာအဖွဲ့အစည်းများက ဒေသဆိုင်ရာ အာဏာပိုင်များထံ သွားရောက်အသိပေးပြောဆိုခဲ့ရာ သက်ဆိုင်ရာအာဏာပိုင်များနှင့် တာဝန်ရှိရဲတပ်ဖွဲ့ဝင်များ ထိုနေရာသို့ လာရောက်ခဲ့သော်လည်း တစ်စုံတစ်ရာပြောဆိုခြင်းမရှိဘဲ ဓာတ်ပုံများသာ ရိုက်ပြီး ပြန်သွားခဲ့ကြောင်း သိရသည်။

“သူတို့ အခု စေတီတည်တဲ့နေရာက ဗလီဘေးကလမ်း။ ခုလို စေတီတည်လိုက်တော့ လူသွားလမ်းကြားလေးက မလွတ်တော့ဘူး ဖြစ်သွားတယ်။ ကျွန်တော်တို့တွေ စိုးရိမ်တာက သူတို့ သိပ်မကြာခင်မှာ (လူတွေသွားလာဖို့) လမ်းနေရာ မလွတ်တော့ဘူး ဆိုပြီးတော့ ဗလီ အုတ်တံတိုင်းကို ဖြိုချခိုင်းမှာ – ဗလီကိုပါ သိမ်းလိုက်မှာကို ကျွန်တော်တို့ အရမ်းကို စိုးရိမ်နေကြပါတယ်” ဟု ဗလီအနီးနေထိုင်သူတစ်ဦးမှ စိုးရိမ်တကြီးပြောပြသည်။

မြိုင်ကြီးငူဆရာတော်၏ လမ်းညွှန်ချက်ဖြင့်ဟုဆိုလျက် ဧပြီလ ၂၃ ရက်နေ့ကလည်း လှိုင်းဘွဲ့မြို့နယ်၊ ကွမ်းတောကျေးရွာရှိ ရှင်မာကု အင်္ဂလီကန် ခရစ်ယာန် ဘုရားကျောင်းဝင်းအတွင်း၌ စေတီတဆူအား လည်းကောင်း၊ ၂၀၁၅ ခုနှစ် အောက်တိုဘာလ အတွင်းက ဘားအံ့မြို့နယ်၊ အောက်မိဇိုင်းကျေးရွာ၊ မယ်စီးထာ ကရင်နှစ်ခြင်း ခရစ်ယာန်အသင်းတော် ချာ့ခ်ျကျောင်းဝင်းအတွင်း၌ စေတီတစ်ဆူအား လည်းကောင်း သက်ဆိုင်ရာဘာသာဝင်များနှင့် ဒေသဆိုင်ရာ အာဏာပိုင်များ ကန့်ကွက်တားမြစ်နေသည့်ကြားက တည်ဆောက်သွားခဲ့ပါသည်။

Comments

Leave a Reply