News @ M-Media

ယူရို ၂၀၁၆ တွင် လူဖြူအစွန်းရောက်တစ်ဦး၏ အကြမ်းဖက်တိုက်ခိုက်ရန် စီစဉ်မှုကို ယူကရိန်း တားဆီးနိုင်ခဲ့

ဇွန် ၈၊ ၂၀၁၆
M-Media

euro 4

– မေလကုန်ပိုင်းက ယူကရိန်းနဲ့ ပိုလန်နယ်စပ်ပေါ်မှာ ဖမ်းမိထားခဲ့တဲ့ ပြင်သစ်နိုင်ငံသားတစ်ဦးဟာ ပြင်သစ်မှာကျင်းပမယ့် ယူရို ၂၀၁၆ ဘောလုံး ပြိုင်ပွဲမှာ အကြမ်းဖက်တိုက်ခိုက်မှုတွေ ပြုလုပ်ဖို့ စီစဉ်ထားတယ်လို့ ယူကရိန်းနိုင်ငံတော်လုံခြုံရေးအဖွဲ့ (SBU) အကြီးအကဲ ဗာဆိုင်းလ် ဟာရ်ဆက်က တနင်္လာနေ့မှာ ပြောကြားလိုက်ပါတယ်။

အမည်မသိရသေးတဲ့ အဆိုပါအမျိုးသားဟာ လက်နက်တွေနဲ့ ဖောက်ခွဲရေးပစ္စည်းတွေ ၀ယ်ဖို့ ယူကရိန်းက တရားမ၀င်လက်နက်ကိုင်အဖွဲ့တွေနဲ့ အဆက်အသွယ်လုပ်ထားပြီး မွတ်စလင်နဲ့ ဂျူးလူမျိုးတွေရဲ့ ဘုရားရှိခိုးကျောင်းတွေအပြင် ပြင်သစ် အစိုးရအဆောက်အဦးတွေ၊ အခွန်ဆိုင်ရာ အဆောက်အဦးတွေကို ပစ်မှတ်ထားတိုခိုက်ဖို့ စီစဉ်ထားတယ်လို့ ဆိုပါတယ်။

“ဒုက္ခသည်တွေ ပြောင်းရွှေ့အခြေချခြင်း၊ အစ္စလာမ်ပြန့်နှံ့ခြင်းနဲ့ ဂလိုဘယ်လိုက်ဇေးရှင်းဆိုင်ရာ ကိစ္စတွေနဲ့ပတ်သက်ပြီး ပြင်သစ်အစိုးရရဲ့ လုပ်ရပ်တွေအပေါ် အဲဒီပြင်သစ်သားက အဆိုးမြင်ဝါဒနဲ့ ပြောကြားခဲ့ပါတယ်။ ပြီးတော့ အကြမ်းဖက်တိုက်ခိုက်မှု တော်တော်များများ ပြုလုပ်ဖို့ အစီအစဉ်ကိုလည်း ဖွင့်ဟပြောဆိုခဲ့ပါတယ်။ SBU ဟာ ယူရို ၂၀၁၆ မတိုင်ခင်နဲ့ ပြိုင်ပွဲကျင်းပနေစဉ်မှာ ပြုလုပ်ဖို့ရှိနေတဲ့ အကြမ်းဖက်တိုက်ခိုက်မှု ၁၅ ခုလောက်ကို တားဆီးနိုင်ခဲ့ပါတယ်” လို့ SBU အကြီးအကဲက ဂျာနယ်လစ်တွေနဲ့ တွေ့ဆုံမှုမှာ ပြောကြားခဲ့ပါတယ်။

ပြင်သစ် နိုင်ငံခြားရေးဝန်ကြီးဌာနက ပြောရေးဆိုခွင့်ရှိသူကလည်း သူတို့နိုင်ငံသားတစ်ဦး ယူကရိန်းမှာ ဖမ်းဆီးခံရတယ်ဆိုတာကို အတည်ပြုခဲ့ပါတယ်။ ဒါပေမယ့် ပြင်သစ်က သူ့ရဲ့နေအိမ်မှာ ရှာဖွေမှုအတွင်း ဘာမှမတွေ့ခဲ့ရဘူးလို့ ဆိုပါတယ်။

ပြီးခဲ့တဲ့နှစ် နိုဝင်ဘာက ဖြစ်ပွားခဲ့ပြီး လူ ၁၃၀ သေဆုံးခဲ့တဲ့ အကြမ်းဖက်တိုက်ခိုက်မှုအပြီး ပြင်သစ်အာဏာပိုင်တွေဟာ ယူရိုပြိုင်ပွဲအတွက် အထူးကြပ်မတ်ထားပြီး အမေရိကန်ကလည်း ယူရိုပြိုင်ပွဲမှာ အကြမ်းဖက်တိုက်ခိုက်နိုင်ခြေ ရှိနေတယ်လို့ နိုင်ငံသားတွေကို သတိပေးထားပါတယ်။

Ref: Reuters

Comments

Leave a Reply